काठमाडौँ — यही भदौ २३ र २४ मा गरिएको प्रदर्शनमा भौतिक संरचनामा भएको क्षतिको धमाधम बिमा दाबी आउन थालेको छ । सोमबारसम्म करिब २५ अर्ब रुपैयाँ बराबरको दाबी भुक्तानी आइसकेको नेपाल बिमक संघले जनाएको छ ।

गत मंगलबार र बुधबारदेखि नै दाबी आउन थालेको र सोमाबारसम्म सबै निर्जीवन बिमा कम्पनीमा करिब २५ अर्ब रुपैयाँ बराबरको दाबी परिसकेको बताइएको छ । ‘सुरुको दाबीमा धेरै रकमको आएको हुन्छ, यसकारण परेकामध्ये सबै नै वास्तविक भुक्तानी हुँदैनन्,’ एक बिमा कम्पनीका प्रमुख कार्यकारी अधिकृतले भने, ‘हालसम्म करिब एक हजार दाबी आएको र यो क्रम भर्खर सुरु भएकाले यो संख्या धेरै बढ्ने अनुमान छ ।’

क्षतिमा के–कसरी छिटो बिमा दाबी भुक्तानी दिन सकिन्छ भन्ने सम्बन्धमा आइतबार नेपाल बिमा प्राधिकरणले बिमा कम्पनीहरूसँग छलफल गरेको छ । छलफलका क्रममा छिटो भुक्तानीका लागि बिमा प्राधिकरणले के–कस्तो नीतिगत व्यवस्था गर्नुपर्छ भन्ने सम्बन्धमा कम्पनीहरूसँग तीन दिनभित्र राय मागेको छ । प्राधिकरणले दिएको समय मंगलबारसम्म हो । मंगलबारसम्म प्राप्त राय सुझावका आधारमा नीतिगत व्यवस्थासहित निर्देशन जारी गरिने नेपाल बिमा प्राधिकरणका कार्यकारी निर्देशक सुशीलदेव सुवेदीले बताए ।

बिमितलाई छिटो बिमा दाबी गर्न र बिमा कम्पनीले छिटो भुक्तानी गर्न बिमक संघले आग्रह गरेको छ । ‘असहज परिस्थितिका कारण सिर्जित क्षतिको जानकारी गर्न सम्पूर्ण बिमित तथा ग्राहकलाई सम्बन्धित बिमा कम्पनीमा सम्पर्क गरी सहयोग गर्नुहुन अनुरोध छ,’ संघको विज्ञप्तिमा भनिएको छ ।

आगजनी तथा तोडफोडमा धेरै कार्यालयमा पूर्ण क्षति पुगेको छ । केहीमा आंशिक छ । एकै पटक धेरै क्षति भएकाले बिमा कम्पनीले सबै दाबी भुक्तानी गर्न सक्छन्–सक्दैनन् भन्ने चासो सबैतिर छ । यही चासोलाई ध्यानमा राखेर हालसम्म परेको बिमा दाबी, भुक्तानी प्रक्रिया, र्फ्छ्योटलगायत विषय छिटो र सहज तरिकाले टुंग्याउन बिमक संघको आग्रह छ ।

क्षतिको अवस्था हेर्दा धेरै बिमा दाबी आउने देखिन्छ । तर धेरै सरकारी संरचनाको बिमा भएको छैन । निजीलगायत अन्य क्षेत्रको बिमा भएकाले धेरै दाबी आउन सक्ने अनुमान छ । सवारी साधनको हकमा तेस्रो पक्ष बिमा गरेको रहेछ भने उसले भुक्तानी पाउँदैन ।

अहिले बिमा पाउन सवारी साधनको पूर्ण बिमा भएको हुनुपर्छ । घर, कार्यालय र सम्पत्तिको हकमा भने बिमा पाइन्छ । हाम्रोमा सबै सम्पत्ति बिमा गर्ने प्रचलन निकै कम छ । यसकारण भएको सबै क्षतिको बिमा दाबी आउने भन्ने हुँदैन । कति रकमको बिमा भएको र त्यसमा कति क्षति भएको छ, त्यसका आधारमा बिमा पाइन्छ ।

बिमा कम्पनीले आफूले गरेको बिमाको पुनर्बिमा कम्पनीमा बिमा गरेका हुन्छन् । बिमितलाई बिमा कम्पनीले भुक्तानी दिए पनि त्यो रकम उसले पुनर्बिमा कम्पनीबाट भुक्तानी पाउँछ । पुनर्बिमा कम्पनीले पनि अरु पुनर्बिमा कम्पनीसँग बिमा गरेका हुन्छन् । बिमा भनेको जोखिम स्थानान्तरण गर्ने व्यवसाय पनि हो । यसकारण जति धेरै दाबी भुक्तानी आए पनि बिमा कम्पनीले तिर्न सक्ने बिमा कम्पनीहरूको दाबी छ ।