दोलखा — रैथाने खाना प्रवर्द्धन गर्न चरिकोटमा आइतबारबाट सडक खाना महोत्सव सुरु भएको छ । ‘सडकमा खाऔं सडकमा रमाऔं’ नारा दिइएको महोत्सवमा रैथाने परिकारदेखि अन्य परिकारका स्टल राखिएका छन् ।

महोत्सवको संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेले रैथाने खानको स्वाद लिएर शुभारम्भ गरेका थिए । चेम्बर अफ कमर्स दोलखा र दोलखा जिल्ला होटल तथा पर्यटन व्यवसायी संघको संयुक्त आयोजनामा भएको महोत्सव तीन दिनसम्म चल्नेछ ।

महोत्सवमा आइतबार विभिन्न जातजातिको झाँकी प्रदर्शन गरिएको थियो । रैथाने खाना चिनाउन र नयाँ वर्ष मनाउन आएका आन्तरिक पर्यटकलाई लक्षित गरेर सडक खाना महोत्सव आयोजना गरिएको चेम्बर अफ कमर्सका अध्यक्ष रुद्रजंग बुढाथोकीले बताए ।‘दोलखामा नयाँ वर्ष मनाउन आएका पर्यटकलाई लक्षित गरेर खाना महोत्सव आयोजना गरेका हौं,’ बुढाथोकीले भने, 'आइतबार मध्यरात आतिसबाजी गरेर यो वर्षको बिदाइ र नयाँ वर्षलाई सांगीतिक कार्यक्रमसहित स्वागत गर्नेछौं ।