काठमाडौँ — लगातार दुईपल्टको डिफेन्डिङ च्याम्पियन मछिन्द्र क्लबले सहिद स्मारक ‘ए’ डिभिजन लिग २०७९–८० को तेस्रो चरणमा आएर बल्ल अंकको खाता खोलेको छ । मछिन्द्रले आइतबार एन्फा कम्प्लेक्समा मनाङ मर्स्याङदीविरुद्ध गोलरहित नतिजा निकाल्दै एक अंक जोडेको हो ।

जावलाखेल र आर्मीसँग हारेको मछिन्द्रले कीर्तिमान आठपल्टको च्याम्पियन मनाङविरुद्ध केही सकारात्मक प्रदर्शन गर्‍यो । गोलका केही अवसर सिर्जना गर्‍यो । सुरुमै पूजन उपरकोटीको प्रहारमा मनाङका गोलकिपर दीप कार्कीले राम्रो बचाउ गरे । डिफेन्डर देवेन्द्र तामाङ र मैदानमा फर्किएका स्ट्राइकर विमल घर्तीमगरको प्रयास पनि असफल रह्यो । अन्त्यतिर ओमालाजा करिमले प्रहार गरेको बलमा पोस्ट बाधक बनेपछि मछिन्द्र पहिलो जित हात पार्न चुक्यो ।

तेस्रो चरणको खेल सकिदा मछिन्द्र एक अंकसहित रेलिगेसन क्षेत्रमै रहेको छ । तीनै खेल हारेको पुलिसले मात्रै अंक जोड्न सकेको छैन । मनाङले एक जित र दुई बराबरीसँगै ५ अंक बनाएको छ ।

च्यासल रंगशालामा आइतबारै भएको खेलमा दुई गोलले पछाडि परेको स्थितिमा सुधार गरेर एनआरटीलाई ३–३ मा रोकेको आर्मीको पनि ५ अंक नै छ । ए डिभिजन लिगको नवप्रवेशी चर्च ब्वाइज युनाइटेड र सातदोबाटो युवा क्लबले सबै खेल जितेर ९–९ अंक जोडेका छन् । जावलाखेल ७ अंकसहित तेस्रोमा छ । चर्च ब्वाइज, सातदोबाटो, जावलाखेल, आर्मी र मनाङबाहेक बाँकी सात टिमले चौथो चरणको प्रतिस्पर्धाअघि नै हार खेपिसकेका छन् ।

च्यासलमा नवयुग श्रेष्ठले पेनाल्टीमा गोल गर्दै १५ औं मिनेटमा अग्रता दिलाएका थिए । तर, एनआरटीले दोस्रो हाफमा १० मिनेटभित्र तीन गोल गर्दै ३–१ को अग्रता लियो । आर्मीका गोलकिपर विकेश कुथुको कमजोरीको फाइदा लिँदै लालनुन्जानाले ५२ औं मिनेटमा १–१ को बराबरी गरेपछि जिन एनिसेन्ट एम्बोउमीले पेनाल्टी अवसरमा गोल गर्दै ५७ औं मिनेटमा एनआरटीलाई २–१ को अग्रता दिलाए । लालनुन्जानाले ६२ औं मिनेटमा व्यक्तिगत दोस्रो गोल गरेपछि एनआरटी ३–१ ले अघि बढेको थियो ।

दुई गोलले पछाडि परे पनि आर्मीले खेलमा फर्किने प्रयास गरिरह्यो । आर्मीका सुदील राईले ६८ औं मिनेटमा गोल गर्दै एनआरटीको अग्रता ३–२ मा छोट्याए । दिनेश हेन्जनले फ्रि–किकमा ८६ औं मिनेटमा गोल गरेपछि आर्मीले खल बराबरीमा खेल टुंग्याउँदै अंक हात पारेको हो । यस नतिजासँगै एनआरटीले पनि अंकको खाता खोल्यो ।