काठमाडौँ — सन् १९५४ मा आजकै दिन (जनवरी २९) मा अमेरिकी टेलिभिजन कार्यक्रम निर्माता तथा सञ्चालिका, अभिनेत्री तथा लेखिका ओप्रा विन्फ्रेको जन्म भएको थियो । विन्फ्रे मिसिसिपीको ग्रामीण भेगको एक गरिब परिवारमा जन्मिएकी थिइन् ।
१४ वर्षको उमेरमा एक रेडियोबाट आफ्नो करिअर सुरु गरेकी विन्फ्रे १९ वर्षकी हुँदा समाचारवाचिक बनेकी थिइन् ।
सन् १९९० को दशकमा आइपुग्दा उनी अमेरिकाकै बिख्यात टेलिभिजकर्मीका रूपमा चिनिइसकेकी थिइन् । उनी अमेरिकाको सिकागोबाट प्रसारण हुने ‘द ओप्रा विन्फ्रे शो’ नामक टक शोबाट निकै चर्चित भएकी थिइन् । उक्त कार्यक्रम सन् १९८६ देखि २०११ सम्म राष्ट्रिय सिन्डिकेसनमार्फत प्रसारण भएको थियो ।
सन् १९९३ मा विन्फ्रेले चर्चित गायक माइकल ज्याक्सनसँग लिएको अन्तर्वार्ता अमेरिकी टेलिभिजनको इतिहासमा सबैभन्दा बढी हेरिएको चौथो अन्तर्वार्ता बनेको थियो । उक्त अन्तर्वार्ता हालसम्मकै धेरै हेरिएकोमध्येमा पर्छ । कुनै समय एकमात्र अश्वेत अर्बर्पति बनेकी विन्फ्रे २० औं शताब्दीमा अफ्रिकी मूलकी अमेरिकीमध्येमा सबैभन्दा धनी थिइन् । सन् २००७ सम्म उनी विभिन्न समयमा विश्वकै सबैभन्दा प्रभावशाली महिलासमेत घोषित भएकी थिइन् ।
विन्फ्रेले विभिन्न पाँचवटा पुस्तकको सहलेखन गरेकी छन् । उनले ‘द कलर पर्पल’, ‘विलोभेड’, ‘द प्रिन्सेस एन्ड द फ्रग’, ‘द बट्लर’, ‘सेल्मा’ लगायतका फिल्ममा अभिनयसमेत गरेकी छन् । सन् २०२१ मा विन्फ्रेले बेलायती राजकुमार ह्यारी र मेघनसँग लिएको अन्तर्वार्ताले अन्तर्राष्ट्रिय सञ्चारमाध्यममा चर्चा चुलिएको थियो ।
प्रकाशित : माघ १५, २०७९ ०८:०९
