नोभेम्बरदेखि अस्ट्रेलियाका सीमा नाका खुल्ने- विश्व - कान्तिपुर समाचार

नोभेम्बरदेखि अस्ट्रेलियाका सीमा नाका खुल्ने

अस्ट्रेलिया प्रवेशमा लगाइएको बन्देज हट्ने
नारायण खड्का

अस्ट्रेलिया — अस्ट्रेलिया सरकारले करिब २ वर्षदेखि बन्द गरेको अन्तर्राष्ट्रिय सीमा नाका नोभेम्बरदेखि खुला गर्ने भएको छ । सीमा नाका खुला गर्ने निर्णयसँगै २० महिनादेखि अस्ट्रेलिया प्रवेशमा लगाइएको बन्देज र पछिल्लो समयमा अस्ट्रेलिया आगमनमा लगाइएको कोटा समेत हट्नेछ ।

तत्काललाई अस्ट्रेलियाली नागरिक तथा स्थायी बासिन्दाका लागि मात्र सीमा नाका खुला गर्न लागिएको हो ।

प्रधानमन्त्री स्कट मरिसनले मान्यता पाएका दुवै डोज खोप लगाइसकेका नागरिकलाई ७ दिनमात्र आफ्नै घरमा क्वारेन्टाइन बस्न पाउने नियम समेत सार्वजनिक गरेका छन् । विस्तारै दुवै खोप लगाइसकेका विद्यार्थीका लागि समेत सीमा नाका खुला गरिने समाचारमा जनाइएको छ । जसअन्तर्गत अस्ट्रेलियास्थित नियमन निकाय थ्यूरापेटिक गुड्स एडमिनिस्ट्रेसन (टीजीए) ले चीन र भारतमा उत्पादित कोरोना भाइरसविरुद्धको खोपलाई समेत यात्रा प्रयोजनका लागि स्वीकृति दिने बताएको छ । विद्यार्थीलाई समेत भित्र्याउने निर्णयले दुवै खोप लगाएका नेपालका विद्यार्थीले अस्ट्रेलियामा समेत सहज प्रवेश पाउनेछन् ।

टीजीएले मुख्य चार खोप फाइजर, जोन्सन एण्ड जोन्सन, अस्ट्राजेनेका र मोर्डनालाई मात्र अहिलेसम्म पूर्णरुपमा स्वीकृति दिएको छ । यात्रा प्रयोजनका लागि सिनोभ्याक्स र कोभिसिल्डलाई समेत अनुमति दिइने भएपछि नेपालमा अड्किएर रहेका हजारौं विद्यार्थी समेत सहज रुपमा यहाँ आउन पाउने भएका हुन् ।

नेपालमा मुख्य रुपमा यिनै दुई खोप प्रचलनमा आएका कारण समेत टीजीएको निर्णयले नेपाली विद्यार्थीलाई यहाँ आउन सहज हुने देखिएको हो । प्रधानमन्त्री मरिसनले अस्ट्रेलियामा केही साताभित्रैमा ८० प्रतिशत पूर्ण खोप लगाइसक्ने सम्भावना हुने भएकाले आउने महिनादेखि सीमाना खोल्‍ने निर्णय गरिएको जनाएका छन् ।

अस्ट्रेलियाले गतवर्षको मार्चदेखि नै सम्पूर्ण विदेशीका लागि सीमाना बन्द गर्ने निर्णय गरेको थियो भने आफ्ना नागरिक तथा स्थायी बासिन्दाले यात्रा गर्नुपरे सरकारबाट अनुमति लिनुपर्ने नियम लगाएको थियो । अन्तर्राष्ट्रिय सीमाना खुलेसँगै विदेशमा रहेका आफ्ना नागरिकलाई भित्र्याउनका लागि आवश्यक्ता अनुसार राज्य सरकारसँगको सल्लाहमा उडान सेवामा समेत सहयोग पुर्‍याउनेछ ।

प्रधानमन्त्री कार्यलयले जारी गरेको प्रेस विज्ञप्ति अनुसार अस्ट्रेलियास्थित नियमन निकायले स्वीकृति दिएको दुवै खोप लगाएका नागरिकले जम्मा ७ दिन मात्र आफ्नै घरमा क्वारेन्टाइनमा बस्नुपर्नेछ । विदेशमा रहेका तर खोप नलगाएका वा मान्यता नदिइएको खोप लगाएका अस्ट्रेलियाली नागरिकलाई समेत प्रवेश दिइनेछ तर उनीहरुले भने पूर्ण १४ दिनसम्म सरकारद्वारा निर्धारण गरिएको स्थानमा क्वारेन्टाइनमा बस्नुपर्नेछ । त्यसका साथै १२ वर्षभन्दा मुनिका बालबालिकालाई भने यात्रा उद्देश्यका लागि पूर्ण खोप लगाए बराबर मान्यता दिइनेछ ।

सरकारले सार्वजनिक गरेको यो नियम नागरिक तथा स्थायी बासिन्दा बाहेकका हकमा भने कहिलेदेखि लागू हुने भन्नेबारेमा प्रधानमन्त्री कार्यलयको विज्ञप्तिमा केही उल्लेख गरिएको छैन । तर, यस क्षेत्रमा काम गरिरहेका भने कम्तिमा पनि जुलाइदेखि ठूलो संख्यामा विद्यार्थी भित्रने बताउँछन् । अहिले न्यू साउथ वेल्स राज्य सरकारले डिसेम्बर महिनाको पहिलो सातादेखि हरेक महिना ५ सयका दरले विदेशी विद्यार्थीलाई अस्ट्रेलिया प्रवेश दिने नमुना कार्यक्रम सुरु गर्ने बताइसकेको छ ।

प्रकाशित : आश्विन २१, २०७८ १३:५०
प्रतिक्रिया
पठाउनुहोस्

ओली सबै हिसाबले कम्युनिस्ट आन्दोलन र आदर्शबाट च्युत भइसके : नेपाल

कान्तिपुर संवाददाता

काठमाडौँ — नेकपा (एकीकृत समाजवादी) का अध्यक्ष माधवकुमार नेपालले नेकपा एमालेका अध्यक्ष केपी शर्मा ओली सबै हिसाबले कम्युनिस्ट आन्दोलन र आदर्शबाट च्युत भइसकेको आरोप लगाएका छन् । 

बिहीबार पार्टी काठमाडौंमा एमाले नेता भानुभक्त जोशीलाई पार्टीमा प्रवेश गराउँदै अध्यक्ष नेपालले ओली सबै हिसाबले कम्युनिस्ट आन्दोलन र आदर्शबाट च्युत भएको आरोप लगाएका हुन् । नेकपा एमालेमै रहनका लागि अन्तिमसम्म प्रयास गर्दा र पछिल्लो समय राष्ट्रिय विधान महाधिवेशनमा भएको गतिविधि र सिद्धान्तका कारण जोशीले नयाँ क्रान्तिकारी पार्टी रोजेको नेपालको भनाइ थियो । जोशीलाई नेकपा (एकीकृत समाजवादी) को स्थायी कमिटी सदस्यमा लैजानेसमेत नेपालले घोषणा गरे ।

नेकपा एमाले सबै हिसाबले पतनको दिशामा गएको बताउँदै नेकपा एमाले सामूहिक नभएर एक व्यक्तिको पार्टी जस्तो भएको नेपालको आरोप थियो । ‘परित्याग गरेर आएको पार्टी नेकपा एमाले सबै हिसाबले पतनको दिशामा गएको व्यहोरा पनि हामीले भर्खरै सुन्यौँ, अन्तिसम्म प्रयत्न गर्दा पनि त्यो पार्टीलाई ठीक ठाउँमा ल्याउन नसकिने भयो भन्ने निष्कर्षमा पुगेर र पछिल्लो कालको तमासा विधान महाधिवेशनको नाममा भेला गरिएका मानिसहरुको जमात, त्यहाँ अघि सारिएका मान्यताहरु सबै चिजहरु देखेर भानुभक्त जोशी पार्टी परित्याग गरेर एकीकृतमा प्रवेश गर्नुभयो, नयाँ यात्रामा प्रवेश गर्नुभएको छ,’ नेपालले भने । अध्यक्ष ओलीले एमालेलाई प्राइभेट लिमिटेडका रूपमा चलाएको नेपालले आरोप लगाए ।

उनले भने, ‘केपी ओली सबै हिसाबले कम्युनिस्ट आन्दोलन र आददर्शबाट च्युत भइसकेका छन्, च्युत भइसकेको अब औपचारिक रुपमा दिन हेर्नमात्रै बाँकी छ, त्यहाँ कुनै सामूहिक छलफल छैन, त्यो एउटा व्यक्तिको प्रा.लि.को रूपमा रुपान्तरित हुन थालेको छ ।’

कार्यक्रममा नेकपा एमालेबाट नेकपा (एकीकृत समाजवादी) पार्टीमा मा प्रवेश गरेका नेता भानुभक्त जोशीले १० बुँदे सहमति तथा अन्तर पार्टी निर्देशनका निर्णयसमेत कार्यान्वयन नभएकोले पार्टी परिवर्तन गरेको बताए । पछिल्लो समय पार्टीमा फेरि आग्रह पूर्वाग्रह यथावत रहेको पाइएको भन्दै नेकपा एकीकृत समाजवादी प्रवेश गरेको उनको भनाइ छ ।

बिहीबार नेकपा एसले मन्त्रीको टुंगो लगाउन र नेता कार्यकर्ताको जिम्मेवारी बाँडफाँडका लागि स्थायी कमिटी बैठक बोलाएको हो । सत्तारुढ गठबन्धनबीच भएको भागबन्डाअनुसार समाजवादीले संस्कृति, पर्यटन तथा नागरिक उड्डयन, कानुन, न्याय तथा संसदीय मामिला, श्रम रोजगार तथा सामाजिक सुरक्षा र सहरी विकास मन्त्रालयले पाउने भएको छ ।

प्रकाशित : आश्विन २१, २०७८ १३:१५
पूरा पढ्नुहोस्
प्रतिक्रिया
पठाउनुहोस्
×