कोरोना उत्पत्तिबारे अनुसन्धान गर्न डब्लूएचओ टिमले चीन जाने अनुमति अझै पाएन

डब्लूएचओका महानिर्देशक डाक्टर टेड्रोस एड्हानोम गेहब्रेयससले संयुक्त राष्ट्र संघका दुई जना वैज्ञानिक अनुसन्धानका लागि आफ्नो मुलुक छाडिसकेको बताएका छन् ।

उनीहरु कोरोना भाइरसको उत्पत्तिका बारेमा अनुसन्धान गर्न चीनको वुहान जान घरबाट हिँडे पनि चीनको अनुमति पर्खिरहेको महानिर्देशक गेहब्रेयससले बताए । यसअघि चीनले संयुक्त राष्ट्र संघको टोलीलाई वुहान आएर अनुसन्धान गर्न अनुमति दिन सहमत भएको थियो ।

जेनेभामा मंगलबार आयोजित पत्रकार सम्मेलनमा महानिर्देशक गेहब्रेयससले भने, ‘यो खबरले म निकै दु:खी छु । मैले वरिष्ठ चिनियाँ अधिकारीहरुसँग कुराकानी पनि गरिरहेको छु । मैले उनीहरुसँग डब्लूएचओ र अन्तर्राष्ट्रिय टिमको मिसनका बारेमा प्राथमिकता दिएको छु ।’