टोरन्टो — कोभिड–१९ विरुद्ध फाइजर र यसको साझेदार बायोएनटेकले विकास गरेको खोप सार्वजनिक प्रयोगका लागि क्यानाडाले पनि स्वीकृति दिएको छ । क्यानाडाको स्वास्थ्यसम्बन्धी एक संस्था हेल्थ क्यानाडाले खोप प्रयोगका लागि अनुमति दिने विषयमा व्यापक अनुसन्धान भएको र सरकारले १६ वर्षभन्दा माथिको उमेरका नागरिकमा तत्काल लगाउने गरी अनुमति दिइएको जनाएको छ ।

अमेरिकी अखबार द न्युयोर्क टाइम्सले क्यानाडा सरकारले फाइजर खोपको प्रभावकारिता र यसको स्वास्थ्य सुरक्षाका सम्बन्धमा गरेको व्यापक खोजी र अनुसन्धानका आधारमा खोप प्रयोगका लागि सुरक्षित देखिएको भन्दै सिफारिस गरेको हो । 

स्वास्थ्य अधिकारीहरूले उक्त खोप अर्को सातासम्ममा क्यानाडा आइपुग्ने र नागरिकलाई लगाउन थालिने जनाएका छन् । क्यानाडाका प्रधानमन्त्री जस्टिन ट्रुडोले खोपको प्रभावकारिताबारे अनुसन्धान भएको र क्यानाडाका १४ वटा वितरक कम्पनीहरूले उक्त खोप देशभित्र वितरण गर्ने बताए । कोभिड–१९ को संक्रमणबाट युरोपमा सबैभन्दा प्रभावित बेलायतले मंगलबारदेखि नै फाइजरको खोप प्रयोगमा ल्याइसकेको छ । फाइजर–बायोएनटेक खोप प्रयोगका लागि बेलायतको नियामक निकायले करिब एक साताघघि नै अनुमति दिएको थियो । बेलायती अधिकारीका अनुसार पहिलो चरणमा जोखिममा रहेका वर्गमा खोप लगाउन थालिएको हो ।