भारतमा कोरोना संक्रमितको संख्या ५० लाख नाघ्यो- विश्व - कान्तिपुर समाचार
कान्तिपुर वेबसाईट
AdvertisementAdvertisement

भारतमा कोरोना संक्रमितको संख्या ५० लाख नाघ्यो

८२ हजार ६६ जनाको मृत्यु, ३९ लाखभन्दा बढी निको भए
कान्तिपुर संवाददाता

काठमाडौँ — भारतमा कोरोना संक्रमितको संख्या ५० लाख नाघेको छ । पछिल्लो २४ घण्टामा ९० हजारभन्दा बढीमा कोरोना भाइरसको संक्रमण पुष्टि भएसँगै संक्रमितको संख्या ५० लाख नाघेको हो ।

भारतको स्वास्थ्य तथा परिवार कल्याण मन्त्रालयका अनुसार मंगलबार मात्रै थप ९० हजार १ सय २३ जनामा कोरोना संक्रमण पुष्टि भएको छ । मंगलबार साँझसम्मको तंथ्याकअनुसार भारतमा कोरोना भाइरसबाट संक्रमित हुनेको संख्या ५० लाख २० हजार ३ सय ५९ पुगेको छ ।

त्यस्तै पछिल्लो २४ घण्टामा कोरोनाबाट थप एक हजार २ सय ९० जनाको मृत्यु भएको छ । योसँगै भारतमा कोरोना संक्रमणबाट मृत्यु हुनेको संख्या ८२ हजार ६६पुगेको छ ।

भारतीय स्वास्थ्य मन्त्रालयका अनुसार भारतमा करिब ७८.५३ प्रतिशत संक्रमित निको भएका छन् । पछिल्लो २४ घण्टामा मात्रै भारतमा थप ८२ हजार सय ६१ जना संक्रमणमुक्त भएका छन् । भारतमा अहिलेसम्म ३९ लाख ४२ हजार ३ सय ६० जना निको भएका छन् भने करिब ९ लाख ९५ हजार संक्रिय केस रहेका छन् ।

भारतमा पछिल्लो समय परीक्षणको दायरा बढाएसँगै संक्रमितको संख्या पनि बढिरहेको छ । भारतीय आयुर्विज्ञान अनुसन्धान परिषद्(आईसीएमआर)का अनुसार मंगलबार ११ लाख १६ हजार ८ सय ४२ नमुना परीक्षण भएको छ । भारतमा मंगलबार साँझसम्म ५ करोड ९४ लाख २९ हजार १ सय १५ नमुना परीक्षण भएको छ ।

कोरोना संक्रमणका हिसाबले भारत विश्वमै दोस्रो प्रभावित मुलुक हो । कोरोना महामारीबाट सबैभन्दा बढी प्रभावित अमेरिकामा बुधबार बिहानसम्म ६६ लाखभन्दा बढीमा संक्रमण पुष्टि भएको छ । अमेरिकामा हालसम्म एक लाख ९५ हजारभन्दा बढीको मृत्यु भइसकेको छ भने करिब २५ लाख निको भएका छन् ।

त्यसैगरी बुधबार बिहानसम्म विश्वभर दुई करोड ९४ लाखभन्दा बढीमा कोरोना पुष्टि भएको छ भने ९ लाख ३३ हजारभन्दा बढीको मृत्यु भइसकेको छ । त्यस्तै संक्रमण पुष्टि भएकामध्ये करिब २ करोड बढी निको भइसकेका छन् ।

प्रकाशित : भाद्र ३१, २०७७ १०:०५
प्रतिक्रिया
पठाउनुहोस्

चितवनमा ५० प्रतिशत संक्रमणको स्रोत अस्पताल

रमेशकुमार पौडेल

चितवन — चितवनका ५० प्रतिशत कोरोना संक्रमितको संक्रमणको स्रोत अस्पताल भएको पाइएको छ । संख्या र अवस्था विश्लेषण गरेर सोमबार जिल्ला कोभिड क्राइसिस म्यानेजमेन्ट सेन्टरले उक्त तथ्यांक सार्वजनिक गरेको हो ।

जिल्लाका १ हजार २ सय ७७ संक्रमितको तथ्यांक विश्लेषण गर्न प्रतिवेदन तयार गरिएको हो । कुल संक्रमितमध्ये चितवनमा २ सय ५४ जना अस्पतालका स्वास्थ्यकर्मी र कर्मचारी छन् । यो जम्मा संक्रमितको २० प्रतिशत हो ।

स्वास्थ्यकर्मी संक्रमित भएपछि उनीहरूका परिवारमा कम्तीमा थप एक जना संक्रमित भएको प्रतिवेदनमा छ । संक्रमित स्वास्थ्यकर्मी र उनीहरूका परिवारको संख्या जोड्दा जम्मा संक्रमितको ४० प्रतिशत हुन आउने प्रतिवेदनमा उल्लेख छ । १ सय १ जनाले आफू उपचारका लागि अस्पताल जाँदा वा कुरुवा बस्दा संक्रमण भएको बताएका छन् ।

यसरी जोड्दा ५० प्रतिशतमा संक्रमणको हिस्सा अस्पतालसँग जोडिएको चितवन स्वास्थ्य कार्यालयका प्रमुख दीपक तिवारीले बताए । ‘संक्रमण बढ्दै गएपछि कारण पत्ता लगाउन तथ्यांकमा आधारित रहेर विश्लेषण गरिएको हो,’ उनले भने । कुरुवाबाट पनि संक्रमण धेरै फैलन सक्ने जोखिम देखिएपछि अस्पतालहरूमा बिरामीसँग एक जना मात्रै कुरुवा राख्न कडाइ गरेको उनको भनाइ छ ।

बिरामीको व्यवस्थापन र कर्मचारीको सुरक्षामा सुधार गरेर सेवा सञ्चालन भइरहेको अस्पताल सञ्चालकहरूको भनाइ छ । ‘पछिल्लो समय विशेष सतर्कता अपनाएका छौं । हाम्रो अस्पतालमा पनि ९० जना हाराहारीमा स्वास्थ्यकर्मी संक्रमित भए, ७० जना निको भए । नयाँ संक्रमित देखिएका छैनन्,’ चितवन मेडिकल कलेजका सञ्चालक डा.हरिशचन्द्र न्यौपानेले भने ।

भरतपुरको सरकारी अस्पताल विकास समितिका अध्यक्ष डा.भोजराज अधिकारी पनि होसियारी अपनाए संक्रमणबाट जोगिन सकिने बताउँछन् ।

चितवनमा अहिलेसम्म उद्योगी, व्यापारी, होटल तथा फलफूल तरकारी पसल सञ्चालक १ सय ११ जनामा कोरोना पुष्टि भएको छ । बैंकमा काम गर्नेमात्रै १६ जना संक्रमित भइसकेका छन् ।

प्रकाशित : भाद्र ३१, २०७७ १०:०१
पूरा पढ्नुहोस्
प्रतिक्रिया
पठाउनुहोस्
×