कोरोना भाइरस फैलिएपछि मोदीले सम्झिए सार्क, साझा रणनीति बनाउन प्रस्ताव
नयाँदिल्ली — विश्वव्यापी बनेको कोरोना महामारीविरुद्ध लड्न दक्षिण एसियाली सहयोग संगठन (सार्क) को साझा रणनीति बनाउन भारतले प्रस्ताव गरेको छ । भारतीय प्रधानमन्त्री नरेन्द्र मोदीले महामारीको रुप लिएको कोरोनाविरुद्ध लड्न त्यस्तो साझा रणनीतिको प्रस्ताव गरेका हुन् ।
‘सार्क मुलुकहरुलाई कोरोनाविरुद्ध लड्न एउटा बलियो साझा रणनीति बनाउन प्रस्ताव गर्छु’ शुक्रबार ट्विट गर्दै मोदीले भनेका छन् । भारतले पाकिस्तानले सीमापार आतंकवादलाई प्रश्रय दिएको आरोप लगाउँदै त्यो नरोकिएसम्म सार्क अघि बढ्न नसक्ने बताउँदै आएको थियो ।
भारत र पाकिस्तानबीचको सम्बन्धकै कारण सार्क विगत चार वर्षदेखि प्रायः निस्क्रिय बन्न पुगेको छ । ३० फागुन २०७२ मा पोखरामा भएको सार्क मन्त्रिपरिषद् बैठकले, जसमा तत्कालीन भारतीय विदेशमन्त्री सुष्मा स्वराज आफैं सहभागी थिइन्, १९ औं सार्क सम्मेलन कार्तिक २०७३ मा इस्लामावादमा गर्ने निर्णय गरेको थियो । तर, सोही वर्ष भदौमा भारत नियन्त्रित जम्मुकश्मिरको उरीमा पाकिस्तानी उग्रवादीको हमलामा १७ जना भारतीय सैनिक मारिएपछि सम्मेलन त स्थगित भयो नै भारत-पाकिस्तान सम्बन्ध पनि थप चिसिन पुग्यो ।
गत फागुनमा जम्मुकश्मिरको पुलवामामा भएको आत्मघाती बम हमलामा भारतको केन्द्रीय सुरक्षा बलका ४० जवानको ज्यान गएपछि त यी दुई छिमेकीबीचको सम्बन्ध थप तनावपूर्ण बन्यो । त्यसयता सार्क सम्मेलन कहिले हुने भन्ने टुंगो लाग्न सकेको छैन । जसकारण पुरै संगठनकै भविष्यमाथि प्रश्न उठ्न थालेको छ । सार्कलाई सक्रिय बनाउनका लागि प्रधानमन्त्री केपी शर्मा ओलीले समेत समकक्षी मोदीलाई धेरै पटक आग्रह गरिसकेका छन् । मोदीले भने पाकिस्तानले सीमापार आतंकवाद नरोकेसम्म सार्क अगाडि बढ्ने सम्भावना नरहेको बताउँदै जवाफ दिँदै आएका थिए । तर, कोरोनाले पुरै दक्षिण एसियाली चपेटामा लिँदै गएपछि मात्र मोदीले सार्कलाई सम्झेका हुन् ।
मोदीले ट्विटमार्फत सार्क मुलुकका नागरिकहरुलाई स्वस्थ राख्नका लागि आपसमा भिडियो कन्फरेन्समार्फत पनि छलफल गर्न सकिने उल्लेख गरेका छन् । ‘सबै मिलेर स्वस्थ ग्रह निर्माणमा योगदान गरेर विश्वसामु उदाहरण पेस गर्न सक्छौं’ मोदीले लेखेका छन् । त्यसैगरी उनले पुरै विश्व कोरोना भाइरसविरुद्ध लडिरहेको र यसमाथि नियन्त्रण पाउन विभिन्न तहमा सरकार तथा जनताले सक्दो प्रयास गरिरहेको समेत जनाएका छन् । विश्वको ठूलो जनसंख्याको घर दक्षिण एसियाले आफ्ना नागरिकहरुलाई विश्वस्त बनाउन छाड्न नहुने पनि मोदीले उल्लेख गरेका छन् ।
I would like to propose that the leadership of SAARC nations chalk out a strong strategy to fight Coronavirus.
— Narendra Modi (@narendramodi) March 13, 2020
We could discuss, via video conferencing, ways to keep our citizens healthy.
Together, we can set an example to the world, and contribute to a healthier planet.
पुस दोस्रो साता चीनको वुहानबाट सुरु भएर विश्वका १२७ देशमा फैलिएको कोरानाले हालसम्म सवा लाखभन्दा बढी मानिस संक्रमित भइसकेका छन् । करिब ५ हजारको ज्यान गइसकेको छ । सार्क मुलुकभित्र भने ११८ जनामा कोरोना पुष्टि भएको छ । शुक्रबार बिहानसम्म भारतमा ७५ जनामा कोरोना पुष्टि भएको छ । जसमध्ये १ को मृत्यु भइसकेको छ भने ३ जना निको भइसकेका छन् ।
दक्षिण एसियाका ८ मुलुकमध्ये भारत र पाकस्तिानमा कोरोनाका कारण एक/एक जनाको मृत्यु भएको छ भने भारतमा ७५ र पाकिस्तानमा २२ जना संक्रमण भएको पाइएको छ । अफगानिस्तानमा ९, माल्दभ्सिमा २, श्रीलंकामा ३, बंगलादेशमा ३, भुटानमा १ (अमेरिकी नागरिक), र नेपालमा १ (निको भइसकेको) जना संक्रमति फेला परेका छन् ।
यसैबीच, प्रधानमन्त्री केपी शर्मा ओलीले कोरोना भाइरसविरुद्ध सार्क मुलुक मिलेर लड्ने भारतीय समकक्षी मोदीको प्रस्तावलाई स्वागत गरेका छन् । दोस्रो पटक मिर्गौला प्रत्यारोपणपछि त्रिवि शिक्षण अस्पताल महाराजगन्जमा स्वास्थ्य लाभ गरिरहेका ओलीले ट्वीट गर्दै नेपाल सरकार आफ्ना नागरिकलाई महामारीबाट बचाउन सार्कको सदस्य राष्ट्रको हैसियतले मिलेर काम गर्ने प्रस्ट्याएका छन् ।
प्रकाशित : फाल्गुन ३०, २०७६ १५:५७I welcome the idea advanced by Prime Minister Modiji @narendramodi for chalking out a strong strategy by the leadership of the SAARC nations to fight Coronavirus. My government is ready to work closely with SAARC Member States to protect our citizens from this deadly disease.
— KP Sharma Oli (@PM_Nepal) March 13, 2020