बैतडी — बैतडीमा अस्पताल भर्ना हुने कोरोना संक्रमितको सख्या शून्यमा झरेको छ । जिल्लाका कुनै पनि स्वास्थ्यसंस्थाहरुमा कोरोनाका बिरामी भर्ना भएका छैनन् । 

गत सोमबारबाट जिल्ला अस्पतालमा पनि कोरोनाका बिरामी नरहेका अस्पतालका प्रमुख डा. वसन्तराज जोशीले बताए । अहिले कोरोनाको संक्रमण दर जिल्लामा धेरै कम भएको उनले बताए । परीक्षण गरिएकामध्ये पनि थोरैमा कोरोना संक्रमण पुष्टि भएको छ ।

अहिले बैतडीमा कोरोनाको संक्रमण दर १ दशमलव ४ प्रतिशत मात्र रहेको स्वास्थ्य कार्यालय बैतडीका प्रमुख योगेशप्रसाद भट्टले बताए । उनले भने, ‘अघिल्लो हप्ता ४ प्रतिशतमा रहेको संक्रमण दर अहिले झरेको छ । त्यसअघि उक्त दर  ११ प्रतिशतसम्म रहेको थियो ।’  पछिल्ला ७ दिनमा १६ सय ६३ जनाको कोरोना परीक्षण गरिएकोमा २४ जनालाई मात्र संक्रमण देखिएको उनले बताए । पछिल्लो समय संक्रमण पुष्टि भएकाहरुको स्वास्थ्य अवस्था सामान्य रहेको र उनीहरु होम आइसोलेसनमै रहेको पनि स्वास्थ्य कार्यालयले जनाएको छ । 

बैतडीमा  लकडाउन खुकुलो हुने

कोरोनाको संक्रमण दर घटेसंँगै जिल्लामा लकडाउन पनि खुकुलो गरिने भएको छ । जिल्ला कोरोना व्यवस्थापन समितिको शुक्रबार बसेको बैठकले असार १६ गतेबाट जिल्लामा लकडाउन खोल्ने निर्णय गरेको हो ।