खोप नलगाएका कामदार खाडी जान नपाउने- समाचार - कान्तिपुर समाचार
कान्तिपुर वेबसाईट
AdvertisementAdvertisement

खोप नलगाएका कामदार खाडी जान नपाउने

होम कार्की

काठमाडौँ — सरकारले खाडी देशमा काम गर्न जाने कामदारका लागि खोपको व्यवस्था गर्न नसके वैदेशिक रोजगार धराशायी हुने जोखिम बढेको छ । खाडीका मुलुकहरूले खोप लगाएका कामदार मात्र लैजाने आदेश जारी गरेपछि नेपाली श्रमिक जान नपाउने भएका हुन् ।


संयुक्त अरब इमिरेट्स (यूएई) मा गत वैशाख २३ देखि नेपालबाट कामदारसहितको यात्रुलाई प्रवेश निषेध छ । सातामा यूएई–नेपाल चारवटा चार्टर उडान भइरहेको छ । जसमा नेपाल र यूएईका दुई/दुई हवाई कम्पनीहरूले अनुमति पाएका छन् । यी विमानहरूले यूएईबाट नेपालमा यात्रु ल्याउन मात्रै पाउँछन्, लैजान पाउँदैनन् । वैदेशिक रोजगार व्यवसायी संघका महासचिव सुजितकुमार श्रेष्ठका अनुसार यूएईले उडानमा रोक लगाउँदा मात्रै ५ हजार जना नयाँ र बिदामा घर आएका कामदार रोकिएका छन् ।

असार ९ गते जारी खोपसम्बन्धी अर्को सूचनाले नेपालीको खाडीमा रोजगारी थप अन्योलमा परेको छ । ‘हामी त चार्टर उडान भएपछि पठाउन पाउँछौं होला भनेर अन्तिम श्रम स्वीकृति पाएका कामदारलाई काठमाडौं बोलाएका थियौं । टिकट कन्फर्म गर्ने कोसिसमा थियौं, चार्टरमा जान नै पाएन,’ श्रेष्ठले भने, ‘अब त खोप लगाइसकेकालाई मात्रै आउन पाउने खालको नीति लिएको छ ।’

कोरोना संक्रमणविरुद्ध दिइने खोपमध्ये यूएईको स्वास्थ्य मन्त्रालयले फाइजर–बायोटेक, स्पुतनिक–५, सिनोफार्म, अक्सफोर्ड–अस्ट्राजेनेकालाई मात्रै मान्यता दिएको छ । यी खोप लगाएकाले मात्रै यूएई प्रवेश पाइन्छ । यी खोप नेपालमा अभाव छ ।

कोरोनाको पहिलो संक्रमणको लहर देखिएलगत्तै कुवेतले नेपालबाट कामदार लगेको छैन । नयाँ भिसा पनि जारी गरेको छैन । आउँदो साउन १७ देखि भने खोप लगाइसकेको कामदार भने

आउन पाउने सूचना जारी गरेको छ । कुवेतले कोभिडबाट उच्च र कम जोखिममा रहेको देशको सूचीलाई हटाउँदै कुवेतले अनुमोदन गरेको खोप लगाएकालाई प्रवेशको अनुमति दिने नीति लिएको हो ।

कुवेतको १७, १८, २० र २२ नम्बर भिसा पाएर नेपालमा रोकिएका कामदारले अनलाइनबाट नै नवीकरण गर्न पाउने बाटो खोलिदिएको छ । नवीकरण गरी उनीहरू साउन १७ देखि कुवेत जान पाउनेछन् । त्यसका लागि कुवेतले अनुमोदन गरेको खोप भने लगाइसक्नुपर्नेछ । कुवेतले अक्सफोर्ड–अस्ट्राजेनेका, फाइजर, मोडर्ना र जोनसन एन्ड जोनसनलाई अनुमोदन दिएको छ । सेप्टेम्बरपछि भने खोप नलगाएकाको भिसा नवीकरण नगरिने जनाएको छ । ‘कुवेतले भनेको खोप हाम्रोमा छैन । यसबारे अझै स्पष्ट हुन जरुरी छ । हामीले नेपालको यथार्थ जानकारी गराउने प्रयासमा छौं,’ कुवेतका लागि नेपाली राजदूत दुर्गाबहादुर भण्डारीले भने, ‘हामीसँग एक महिनाको समय छ ।’

नेपाली कामदारको माग भइरहेको साउदी अरबले पनि एयरलाइन्स कम्पनीहरूलाई खोप नलगाएका यात्रुलाई नबोक्न निर्देशनात्मक आदेश जारी गरेको छ । साउदी प्रवेश गर्ने यात्रुले बोर्डिङ पास लिने बेला खोप लगाएको प्रमाणपत्र पेस गर्नुपर्छ । आन्तरिक मन्त्रालय, साउदीको सूचनाअनुसार आउँदो साउन १७ देखि खोपको मात्रा पूरा भएका कामदार मात्रै कार्यक्षेत्रमा काम गर्न पाउनेछन् । बिनाखोप काम गरेको भेटिएमा जरिवाना, निलम्बनदेखि डिपोर्टसम्म गर्न सक्ने नीति ल्याइएको छ ।

कोभिड–१९ महामारी गन्तव्य मुलुकमा फैलिएको डेढ वर्षदेखि वैदेशिक रोजगारमा जाने नेपालीको संख्या न्यून छ । दोस्रो चरणको कोरोनाको संक्रमण लहर भइरहेका बेला मलेसियाबाहेकका प्रमुख गन्तव्यका रोजगारदाता कम्पनीले झन्डै १ लाख १७ हजार कामदार लैजानका लागि मागपत्र प्रमाणीकरण गरे पनि कामदारको भर्ना प्रक्रिया अगाडि बढ्न सकेको छैन ।

संघका महासचिव श्रेष्ठका अनुसार सबैभन्दा बढी कतारबाट ५० हजार, साउदी अरबबाट २६ हजार, साइप्रसबाट १७ हजार, संयुक्त अरब इमिरेट्स (यूएई) बाट ५ हजार, रोमानियाबाट ९ हजार, बहराइनबाट १७ सय र ओमानबाट १५ सय जना नेपाली कामदारको माग भएको हो । वैदेशिक रोजगारबाट घर बिदामा आएका हजारौं कामदार खोप नपाएका कारण पुनः रोजगारीमा जान नमिल्नाले रोजगार गुम्न लागेको छ । नेपालमा कोभिसिल्ड र भेरोसेल खोप ल्याइएको थियो । निकै कम परिमाणमा ल्याइएकाले वैदेशिक रोजगारीमा जानेहरू सरकारको खोपको प्राथमिकतामै परेनन् ।

वैदेशिक रोजगार व्यवसायी संघका पुर्व अध्यक्ष रोहण गुरुङले अबको वैदेशिक रोजगार अनिवार्य खोपसँग जोडिएको बताए । ‘खोप नलगाएका कामदारलाई गन्तव्य मुलुकहरूले प्रवेश अनुमति नदिने निश्चित देखिन्छ । खोप व्यव स्थापन गर्न नेपाल सरकारले बुद्धिमानी ढंगले योजना बनाउन नसकेको खण्डमा नेपालको बैदेशिक रोजगार कोल्याप्स हुनसक्दछ’, उनले भने,‘जुन खोपलाई गन्तव्य देशले प्रयोग गरेको छ । त्यो नेपालमा छैन ।’

प्रकाशित : असार १२, २०७८ ०६:२०
प्रतिक्रिया
पठाउनुहोस्

पोखरामा पनि केबलकार

प्रतीक्षा काफ्ले

कास्की — आगामी असोजदेखि सञ्चालनमा आउने गरी पोखरामा केबलकार जडान गरिएको छ ।

पोखरा महानगरपालिका–१८ सेतीबगरदेखि सराङकोटको डाँडासम्म पुग्नेगरी अन्नपूर्ण केबलकार निर्माण गरिएको सञ्चालक तिर्थराज त्रिपाठीले जानकारी दिए । उनका अनुसार केबलकारको निर्माण कार्य ९७ प्रतिशत सम्पन्न भएको छ । केबलकारबाट फेवातालको किनार सेतीबगरदेखि सराङकोट पुग्न ८ मिनेट लाग्ने उनले बताए ।

‘अहिलेसम्म केबलकार सञ्चालनमा आइसक्थ्यो,’ त्रिपाठीले भने, ‘कोरोनाले गर्दा असोजै पुग्ने भयो । कोरोनाको महामारी सामान्य भएपछि परीक्षण गरेर जतिसक्दो छिटो सञ्चालनमा ल्याउँछौं ।’ उनले केबलकारका निर्माणाधीन सामाग्री जापानबाट ल्याएको बताए । ‘काम गर्ने सबै प्राविधिक जापानी हुन् । कोरोनाका कारण लकडाउन भएपछि प्राविधिक जापान फर्किएकाले परीक्षण लगायतका काम बाँकी छन्,’ उनले भने ।

करिब दुई वर्षमा ६ जना जापानी प्राविधिकको टोलीले केबलकार निर्माण गरेको कम्पनीले जनाएको छ । त्रिपाठीका अनुसार केही दिनअघि केबलकारको लठ्ठा तीन मिनेट चलाएर परीक्षण गरिएको थियो । उक्त परीक्षण सफल भएको पनि उनले बताए ।

केबलकारको लागि हाल १८ वटा गुण्डला ९डब्बा० सहित लठ्ठा ९डोरी० टाँगेर तयारी अवस्थामा राखिएको निर्देशक त्रिपाठीले बताए । २ हजार २ सय ७५ मिटर लम्बाइको केबलकारमा प्रति डब्बामा ८ जनाको सिट क्षमता रहनेछ ।

यस केबलकार कम्पनीमा विदेशी र स्थानीयको १०र१० र नेपालीको ८० प्रतिशत लगानी रहेको त्रिपाठीले बताए । सुरुमा ९० करोड लगानी गरेर सञ्चालनमा ल्याउने लक्ष्य भएपनि हाल केबलकारको लगानी करिब २ अर्ब पुगेको उनले बताए । केबलकार सञ्चालन गर्ने १० वर्षअघिको सपना भएपनि ५ वर्षदेखि यस क्षेत्रमा खटिएको त्रिपाठी बताए ।

प्रकाशित : असार ११, २०७८ २१:३९
पूरा पढ्नुहोस्
प्रतिक्रिया
पठाउनुहोस्
×