कञ्चनपुर — कोरोना संक्रमण तीव्र रुपमा बढ्न थालेपछि कञ्चनपुरमा बिहान ८ बजेदेखि दिउँसो ३ बजेसम्म मात्रै खोल्न पाइने भएको छ ।
सोमबार बसेको जिल्ला विपद् व्यवस्थापन समितिको बैठकले महेन्द्रनगर लगायत जिल्लाका ग्रामिण भेगका बजारहरु मंगलबारदेखि आधा दिन बन्द गर्ने निर्णय गरेको हो ।
जिल्ला प्रशासन कार्यालयले जारी गरेको सूचना अनुसार दिउँसो ३ बजेदेखि र बिहान ८ बजेसम्म महेन्द्रनगर लगायत जिल्लाका सबै स्थानीय तहमा रहेका बजारहरु बन्द रहनेछन् । यसैगरी सरकारी, अत्यावश्यक र मालबाहक बाहेकका सवारी साधन जोर विजोर प्रणालीमा चल्न पाउनेछन् ।
‘यसलाई थप कडा गर्दै लगिनेछ, सतर्कता बढाउनु आवश्यक छ,’ कञ्चनपुरका प्रमुख जिल्ला अधिकारी रामकुमार महतोले भने, ‘महेन्द्रनगर लगायत दोधारा चाँदनीदेखि पुनर्वाससम्मका सबै स्थानीय तहमा रहेको बजारहरु बन्द हुनेछन् ।’
