मियामी — इंग्ल्यान्डको छ दशकयता पहिलो पटक विश्वकप जित्ने अभियान यसपल्ट पनि पूरा भएन्, तर पनि प्रशिक्षक थोमस टुचेल मान्छन्, विश्वकप २०२६ मा तेस्रो स्थानमा आउनु पनि आफैमा ठूलो हो । इंग्ल्यान्डले आइतबार तेस्रो स्थानका लागि भएको रोमाञ्चक खेलमा फ्रान्समाथि ६–४ को जित निकाल्यो ।

त्यसमा इंग्ल्यान्डका  लागि बुकायो साकाले ह्याट्रिक गरे । फ्रान्सले खेलमा पुर्नआगमनका लागि प्रयास गरेपछि त्यो पूर्णतः सफल रहेन् । यस्तोमा इंग्ल्यान्ड सन् १९६६ यता विश्वकप इतिहासमै आफ्नो उत्कृष्ट प्रदर्शन दर्ता गर्न सफल रह्यो । पहिलो हाफको अन्त्यमा इंग्ल्यान्ड चार गोलले अगाडि रहेको थियो, तर किलियन एमबापे दुई गोल गरेपछि खेल सनसनीपूर्ण रह्यो । साकाले पेनाल्टीबाट आफ्नो ह्याट्रिक पूरा गरे ।

खेलको अन्त्यतिर ओसमन डेम्बलेले फ्रान्सका लागि एक गोल फर्काए लगतै सब्टिच्युट जुड बेलिङ्घमले पनि एक गोल गरे । यससँगै प्रतियोगितामा उनको कुल गोल संख्या सात पुगेको छ र उनी एक संस्करणको विश्वकपमा इंग्ल्यान्डबाट सबैभन्दा बढी गोल गर्ने खेलाडी भएका छन् । 

टुचेलले खेलपछि भने, ‘इंग्ल्यान्डले ६० वर्षपछि विश्वकपमा पदक जितेको छ, विदेशी भूमिमा यो नै इंग्ल्यान्डको अहिलेसम्मको उच्च प्रदर्शन हो ।’ उनले थपे, ‘त्यसैले पनि इंग्लिस खेलाडीले यो प्रदर्शनमा गर्व गर्न सक्नु पर्छ । पूरा प्रतियोगितामा हामीले बलियो चुनौती पेस गर्न सफल रह्यौं । हामीले १८ महिना अगाडि आफ्नो यात्रा सुरु गर्दा विश्वकप जित्ने अभियान सुरु गरेका थियौं, हामी फाइनल पुगेर उपाधि जित्न चाहन्थ्यौं । त्यसैले पनि केहीलाई अहिलेको प्रदर्शन सफल नलाग्न सक्छ, तर त्यस्तो होइन् ।’

टुचेलकै रक्षात्मक रणनीतिका कारण इंग्ल्यान्ड सेमिफाइनलमा अर्जेन्टिनासँग २–१ ले पराजित भएको मानिएको छ र यसक्रममा उनको चर्को आलोचना पनि भएको छ । इंग्ल्यान्डले अर्जेन्टिनाविरुद्ध एक गोलले अगाडि रहेर पनि त्यसलाई कायम राख्न सकेको थिएन् । जर्मन प्रशिक्षकले थपे, ‘केहीले प्रेस कन्फ्रेन्समा यसरी कुरा गरिरहेका थिए कि हामी लिग चरणबाटै बाहिरिएका छौं, त्यो पनि कुनै जित विना नै ।’

उनले अगाडि भने, ‘यस्ता आलोचनाको सबैभन्दा राम्रो जवाफ भनेकै मैदानबाट दिनु हो । कुरा मात्र गर्ने हो भने केही नि जितिन्न । न त यसले अंक दिलाउने गर्छ । मलाई खुसी के तथ्यमा छ भने हामीले अन्ततः मैदानबाट उत्तर दिएका छौं । हामीले यस्तै नतिजाको अपेक्षा गरेका थियौं र यो प्रभावशाली पनि रह्यो ।’