मियामी — विश्वकप २०२६ को तेस्रो स्थानका लागि शनिबार भएको खेलमा इंग्लिस टिमको कप्तानी गरेका डेक्लन राइसले आफूहरू ठूलो सफलता अझ नजिक पुगेको दाबी गरेका छन् । उनले फ्रान्सलाई हराएयता मिडियासँगको कुराकानीमा भने, ‘लामो समयपछि अहिलेको इंग्लिस टिम नै सबैभन्दा राम्रो हो, यसमा सत्ययता छ, यसलाई कसैले नकार्न सक्दैन् ।’

इंग्ल्यान्ड सेमिफाइनलमा अर्जेन्टिनाविरुद्ध पराजित रहेको थियो र यससँगै तेस्रो स्थानका लागि खेल्न बाध्य रहेको थियो । तर यसमै राइस सकारात्मक रहे । उनकै गोलले इंग्ल्यान्डले तेस्रो मिनेटमै अग्रता लिएको थियो र यो ठूला प्रतियोगितामा इंग्ल्यान्डबाट सम्भव दोस्रो सबैभन्दा छिटो गोल पनि रह्यो । उनले भने, ‘एउटा टिमका रूपमा हामीले गर्व महसुस गरिरहेका छौं, हामी खालि सेमिफाइनलमा पराजित रह्यौं ।’

उनलाई गोलको खाता खोल्नका लागि दुई मिनेट १४ सेकेन्डको मात्र आवश्यकता परेको थियो । यसअघि ब्रायन रोब्सनले सन् १९८२ मा फ्रान्सविरुद्धकै लिग चरणको खेलमा २८ सेकेन्डभित्र गोल गरेका थिए । विश्वकपमा सबैभन्दा छिटो गोल भने टर्कीका हाकन सुकरको नाममा छ । उनले दक्षिण कोरियाविरुद्ध २००२ मा ११ सेकेन्डभित्र गोल गरेका थिए ।

राइसले अगाडि भने, ‘हामी सेमिफाइनल अथवा क्वाटरफाइनल पुग्यौ भनेर भन्न थालेको पनि धेरै भयो । हाम्रो अन्तिम लक्ष्य त इंग्ल्यान्डका लागि ठूलो उपाधि जित्नु नै हो । यसबीच पनि विश्वकप जत्तिको ठूलो प्रतियोगितामा तेस्रो हुनु पनि कम्तीमा उपलब्धी चाहिँ होइन् । मलाई लाग्छ, हामी ठूलो उपाधि जित्न सक्ने संघारमा पुगेका छौं । हामीले अगाडि बढ्ने क्रम जारी राख्नु पर्छ ।’