ह्युस्टन — जबसम्म आफ्नो नम्बर एक खेल फुटबल हुँदैन, जापानले कहिल्यै पनि विश्वकप जित्ने छैन । यो भनाइ हो, दाइची कमादाको । जापान विश्वकप २०२६ को अन्तिम ३२ मा ब्राजिलसँग पराजित भएपछि यो भनाइ आएको हो । 

एसियाकै सबैभन्दा राम्रो टिम विश्वकप उपाधि जित्ने ठूलो महत्त्कांक्षासहित उत्तर अमेरिका आइपुगेको थियो । तर अहिले जापानको विश्वकप जित्ने सपना धेरै टाढाको साबित भएको छ । जापानले पाँचपल्ट विश्वकपको नकआउट चरण खेलेको छ । 

अहिलेसम्म एकै खेलमा पनि जित निकाल्न सकेको छैन । जापानमा फुटबलको तुलनामा बेसबल बढी लोकप्रिय मानिन्छ । कमादा भन्छन्, जापानले फुटबलमा प्रगति गर्ने हो भने यो स्थितिमा सुधार हुनुपर्छ । उनी भन्छन्, ‘विश्वकप जित्ने सपना बोक्ने हो भने जापानको फुटबल स्तर अझ माथिल्लो स्थानमा हुनुपर्छ ।’

क्रिस्टल प्यालेसका खेलाडीको तर्क थियो, ‘हामी सबैले जापानको फुटबल विकासमा प्रयास गरिरहनुपर्छ । जति बेलासम्म यो जापानको प्रमुख खेल हुन्न, हामीले विश्वकप जित्न सक्दैनौं ।’ 

जापानले ब्राजिलविरुद्ध पहिलो हाफमा अग्रता लिएर पनि त्यसलाई कायम राख्न सकेको थिएन । खेल अतिरिक्त समयतर्फ अग्रसर भएको बेला ब्राजिलका ग्याब्रियल मार्टिनेलीले ९५ औं मिनेटमा निर्णायक गोल गरे । यस जितसँग ब्राजिल प्रतियोगिताको अन्तिम १६ चरणमा पुग्यो भने जापानले भने त्यो प्रश्नको उत्तर खोजेको छ, जसले सोधेको छ, विश्वकप जित्न साँच्चै के गर्नुपर्छ ? 

जापानी डिफेन्डर सोगो तानिगुची भन्छन्, ‘हामी जसरी हारेका छौं, त्यो असाध्यै निराशाजनक छ । जसरी हामीले यो विश्वकपका लागि तयारी गरेका थियौं, त्यस अनुसार हाम्रो प्रदर्शन अहिलेभन्दा राम्रो हुनुपर्ने हो ।’