त्रिवि मैदानमा टस हारेर ब्याटिङ थालेको चितवनले २० ओभरमा सात विकेट गुमाउँदै १४२ रन बनाएको छ, बोपाराले ६६ रनको योगदान दिए।
What you should know
काठमाडौँ — रवि बोपाराले लगातार दोस्रो खेलमा अर्धशतक बनाएपछि चितवन राइनोजले नेपाल प्रिमियर लिग (एनपीएल) क्रिकेटमा बिहीबार लुम्बिनी लायन्सलाई १ सय ४३ रनको लक्ष्य दिएको छ ।
टस हारेपछि ब्याटिङमा आएको चितवनले त्रिवि क्रिकेट अन्तर्राष्ट्रिय मैदानमा निर्धारित २० ओभर खेली ७ विकेट गुमाई १ सय ४२ रन बनाएको हो ।
बोपाराले ५५ बलमा ६६ रन बनाए । उनले ४ चौका र ३ छक्का प्रहार गरे । बोपारालाई अन्तिम ओभरमा गुलबदिन नैबले दीलिप नाथबाट क्याच गराए ।
चितवनको सुरुआत राम्रो थिएन । पहिलो ओभरमै रुबेन ट्रम्पलमनले डेबिड मलानलाई शून्यमै बोल्ड गरे । देव्रेहाते स्पिनर अभिषेक गौतमले दीपक बोहरालाई १० र देव खनाललाई १४ रनमा आउट गरेपछि चितवन आठौं ओभरमा ४१–३ को स्थितिमा पुगेको थियो ।
कप्तान कुशल मल्लले १८ बलमा २१ रन बनाए । १२ रनमा शेर मल्लबाट रिटर्न क्याच हुन जोगिएका कुशलले १ छक्का प्रहार गरे । उनी ट्रम्पलमनको दोस्रो सिकार भए । ट्रम्पलमनले सैफ जैबलाई पनि आउट गरे । जैबले ७ बल खेली २ चौका र १ छक्का प्रहार गर्दै १५ रन बनाए । सोहेल तन्बिर ५ रनमा आउट भए ।
ट्रम्पलमनले ४ ओभरमा २३ रन खर्चेर ३ विकेट लिए । नैबले ४ ओभरमा २३ र अभिषेकले ३ ओभरमा १५ रन खर्चेर २–२ विकेट लिए ।
चितवनले अघिल्लो खेल खेलेको टोलीबाट एक खेलाडी परिवर्तन गरेको छ । विपिन आचार्यको स्थानमा टोलीले अमरसिंह राउटेलालाई खेलाइरहेको छ ।
लुम्बिनीको यो पहिलो खेल हो । चितवनले भने पहिलो खेलमा कर्णाली याक्सलाई ४ विकेटले पराजित गरेको थियो । चितवनले १ सय ६७ रनको लक्ष्य ५ बल अगाडि १ सय ७१ रन बनाउँदै पूरा गरेको थियो ।
गत वर्ष लुम्बिनी पुछारमा रहेको थियो र टोलीले लिग चरणमा ७ मध्येको ६ खेल हारेको थियो । तर चितवनसँगको खेलमा लुम्बिनी ३३ रनले विजयी भएको थियो । लुम्बिनीले जितेको सो एकमात्र खेलमा कप्तान रोहित पौडेलले ५७ बलमा ८० रन बनाउनुका साथै ४ ओभरमा १७ रन खर्चेर ४ विकेट लिएका थिए ।
