सन् १९४० मा आजकै दिन : अमेरिकी धाविका रुडोल्फको जन्म
काठमाडौँ — सन् १९४० मा आजकै दिन (२३ जुन) मा चर्चित अमेरिकी धाविका विल्मा रुडोल्फको जन्म भएको थियो । अमेरिकाका टेनेसी राज्यको एक गरिब परिवारमा उनको जन्म भएको हो ।
रुडोल्फले सन् १९६० को रोम ओलम्पिकमा ट्र्याक एन्ड फिल्डका विभिन्न स्पर्धामा तीनवटा स्वर्ण जितेकी थिइन् । रुडोल्फले सय मिटर, दुई सय मिटर र चार गुणा सय रिले स्पर्धामा स्वर्ण जित्न सफल भएकी थिइन् ।
योसँगै उनी एउटै ओलम्पिकमा ट्र्याक एन्ड फिल्डमा तीनवटा स्वर्ण जित्ने पहिलो अमेरिकी धाविकासमेत बनेकी थिइन् । रुडोल्फलाई सन् १९८३ मा अमेरिकाको ओलम्पिक हल फेममा समावेश गरिएको थियो । सन् १९९४ नोभेम्बर १२ मा ५४ वर्षको उमेरमा ब्रेन क्यान्सरबाट उनको निधन भएको थियो ।
प्रकाशित : असार ९, २०८१ ०८:११प्रतिक्रिया