उनले अर्को महत्त्वपूर्ण एजेन्डाका रूपमा विराटनगर-१२ लाई डुबानमुक्त बनाउने प्रतिबद्धता दोहोर्‍याए । वर्षायाममा केसलिया खोलाका कारण स्थानीयवासीले भोग्दै आएको समस्याप्रति संकेत गर्दै उनले तटबन्धन निर्माणलाई प्राथमिकतामा राख्ने बताए । 'केसलिया खोलाले यहाँका बासिन्दालाई वर्षेनी दुःख दिँदै आएको छ,' उनले भने, 'सुदृढ तटबन्धन निर्माण गरेर विराटनगरलाई डुवानमुक्त बनाउने मेरो स्पष्ट योजना छ ।'

उनका अनुसार स्थानीय तह, प्रदेश र संघीय सरकारबीच समन्वय गरेर मात्र दिगो विकास सम्भव छ । विराटनगर-१२ ठूलो र सम्भावनायुक्त वडा भएकाले सडक, पुल-पुलेसा, ढल निकास तथा अन्य पूर्वाधार विकासलाई तीव्रता दिनुपर्ने उनले बताए ।

कोइरालाले विगतमा भएका विकास निर्माणका कामहरूको चर्चा गर्दै आगामी दिनमा अझ प्रभावकारी ढंगले योजना कार्यान्वयन गर्ने प्रतिबद्धता जनाए । उनले भने, 'विकासका काम एक्लैले सम्भव हुँदैनन् । वडा, नगर, प्रदेश र संघ सबैको सहकार्य आवश्यक हुन्छ । त्यसका लागि राजनीतिक स्थिरता र सक्षम नेतृत्व चाहिन्छ ।'

यसैबीच कांग्रेस विराटनगर-१२ ले घरदैलो कार्यक्रमलाई पनि तीव्र बनाएको छ । चुनावी माहोल तातेसँगै विराटनगर-१२ मा विकास, पूर्वाधार र डुवान नियन्त्रण मुख्य एजेन्डाका रूपमा उभिएका छन् । कोइरालाको विज्ञान भवन निर्माण दाबी र डुबानमुक्त नगर बनाउने प्रतिबद्धताले स्थानीय राजनीतिक वातावरण थप चासोपूर्ण बनेको छ ।