काठमाडौँ — कांग्रेस नेता महेश आचार्यले जेन–जी विद्रोहको भावभूमिमा हुन लागेको चुनावमा सुशासनको विषय नै दलहरूले मुख्य एजेन्डा बनाउनुपर्ने बताएका छन्।

कान्तिपुरसँगको विस्तृत कुराकानीमा उनले जेन–जी आन्दोलन सुशासनको खोजीमा भएको बताउँदै भने, ‘आर्थिक क्षेत्रमा चाँडै फड्को मारोस्। आयआर्जनका अवसर बढून्। रोजगारीका अवसर बढून्। पीडादायक पलायनको अवस्था नरहोस्। पारदर्शिता होस्। सरकार र राज्यले जे गर्छु भन्दै छन्, त्यसबारे जनताले सुन्ने र देख्ने गरी निर्णय होस्।’

अहिलेको नयाँ पुस्ताले बाबुआमाले भनेको वा सरकारले भनेको भनेर कुनै पनि विषयलाई आँखा चिम्लेर मान्दैन। प्रश्न गर्छ।उनले नेपालका दलहरूमा राजनीतिक रूपमा ठूलो मतभिन्नता नभएको बताउँदै दलहरूको राजनीतिक दस्तावेजमा पनि उस्तै खालका समानता रहेको बताए। आचार्यले जेन–जी आन्दोलनले सम्भावना देखाएको बताउँदै युवाहरूले इन्टरनेटबाट संसार देखेकाले उनीहरू प्रश्न सोध्न सक्ने भएको बताए। उनले भने, ‘युवाहरूले प्रश्न सोधेका छन्– संसारका अरू देशजस्तो नेपाल किन भएको छैन ? विदेशमा रहेका ४० लाख युवाले सोधेका छन्– नेपाल किन अरू देशजस्तो भएन ? नेतृत्वको अक्षमता, प्रशासन संयन्त्रमा भएको भ्रष्टाचार, नीतिगत अन्योल, सत्ताका निम्ति गरिएको लुछाचुँडीले हाम्रा महत्त्वपूर्ण वर्षहरू व्यर्थ हुँदै गएका छन्। जेन–जी आन्दोलनले उठाएको सवाल यही हो। यो यथार्थ पनि हो।