चार वटा संघीय निर्वाचन क्षेत्र भएको बारामा सबै पुरानै अनुहारलाई उम्मद्ववार बनाउन अघि सारिएको छ।
बारा — प्रतिनिधिसभा सदस्यका लागि एमालेले बारामा पुरानै अनुहारलाई टिकट दिएको छ।
चार वटा संघीय निर्वाचन क्षेत्र भएको जिल्लामा निर्वाचन क्षेत्र नम्बर १ मा अच्युत मैनालीलाई उम्मेदवार बनाएको छ। उनले २०७९ मा यस क्षेत्रबाट कांग्रेसका तत्कालीन सहमहामन्त्री तथा पूर्वमन्त्री उमाकान्त चौधरीलाई झन्डै दोब्बर मतले पराजित गरेका थिए।
क्षेत्र नम्बर २ बाट बलबीर चौधरीले टिकट पाएका छन्। उनी २०७९ मा यस क्षेत्रबाट पराजित भएका थिए।
निर्वाचन क्षेत्र ३ मा पूर्वमन्त्री ज्वालाकुमारी साह उम्मेदवार बनेकी छिन् । केन्द्रीय सदस्य रहेकी उनी यसअघि मन्त्री पनि भइसकेकी छिन्। माओवादी पृष्ठभूमिकी उनी नेकपा फुटेपछि उनी एमालेमै बसिन्।
उनी २०७४ मा प्रदेशसभा सदस्य र २०७९ मा यस क्षेत्रबाट प्रतिनिधिसभामा निर्वाचित भएकी थिइन्। क्षेत्रीय कमिटिबाट सिफारिसमा नपरेपछि उनलाई जिल्लाले क्षेत्र नतोकी सिफारिस गरेको थियो।
क्षेत्र नम्बर ४ बाट केन्द्रीय सदस्य किसानकुमार श्रेष्ठले टिकट हात पारेका छन्। उनी यसअघि २०७९ मा यस क्षेत्रबाट तत्कालीन एकीकृत समाजवादीबाट प्रतिनिधिसभा सदस्यमा निर्वाचित भएका थिए । उनी व्यवसायिक घरानाका हुन् । एकीकृत समाजवादी र माओवादीसहितका दलले नेपाली कम्युनिष्ट पार्टी बनाएपछि उनी रामकुमारी झाक्रीसँगै एमालेमा फर्किएका थिए ।
