कार्यवाहक सभापति खड्काले बैठकमा पेस गरेको कार्यतालिकामा २०८३ साल वैशाख २८-३१ मा काठमाडौंमा महाधिवेशन गर्ने उल्लेख छ ।
काठमाडौँ — कांग्रेसका कार्यवाहक सभापति पूर्णबहादुर खड्काले चुनावपछि महाधिवेशन गर्नेगरी कार्यतालिका प्रस्तुत गरेका छन् । शुक्रबार केन्द्रीय कार्यसम्पादन समितिको बैठकमा कार्यवाहक सभापति खड्काले प्रतिनिधिसभा चुनावपछि महाधिवेशन गर्ने कार्यतालिका प्रस्तुत गरेका हुन् ।
कार्यवाहक सभापति खड्काले बैठकमा पेस गरेको कार्यतालिकामा २०८३ साल वैशाख २८-३१ मा काठमाडौंमा महाधिवेशन गर्ने उल्लेख छ । तर खड्काको प्रस्ताव मान्न महामन्त्रीद्वय तयार छैनन् । उनीहरूले नयाँ नेतृत्वसहित चुनावमा भाग लिन जानुपर्नेमा जोड दिइरहेका छन् ।
पार्टीका दुई महामन्त्री गगन थापा र विश्वप्रकाश शर्माले २७–२९ पुसमा विशेष महाधिवेशन बोलाउने तयारी गरेपछि पार्टीभित्र गुटगत विवाद चुलिएको छ । महामन्त्रीद्वयकै दबाबमा पार्टीले २६–२९ पुसमा नियमित महाधिवेशनको कार्यतालिका ल्याएको थियो । तर, देशैभरको क्रियाशील सदस्यताको विषय नै टुंगिन नसक्दा नियमित महाधिवेशन नहुने भएको छ ।
नियमित नहुने भएपछि महामन्त्रीद्वयले विधानअनुसार विशेष महाधिवेशन बोलाउने तयारी गरेका हुन् । पार्टी सभापति शेरबहादुर देउवा पक्षधर संस्थापन पक्षीय नेताहरु विशेष महाधिवेशन स्विकार्न तयार छैनन् ।
