काठमाडौँ — कांग्रेस महाधिवेशनसम्बन्धी विवाद चुलिएपछि पार्टी कार्यसम्पादन समितिको बैठक शुक्रबार बोलाइएको छ । 

पार्टी प्रवक्ता प्रकाशशरण महतले क्रियाशील सदस्यता टुंग्याउने र नियमित महाधिवेशन गर्ने विषय नै बैठकको एजेन्डा हुने बताएका छन् । अपराह्न ३ बजेलाई कार्यसम्पादन समिति बैठक बोलाइएको छ ।

पार्टीका दुई महामन्त्री गगन थापा र विश्वप्रकाश शर्माले २७–२८ पुसमा विशेष महाधिवेशन बोलाउने तयारी गरेपछि पार्टीभित्र गुटगत विवाद चुलिएको छ । महामन्त्रीद्वयकै दबाबमा पार्टीले २६–२९ पुसमा नियमित महाधिवेशनको कार्यतालिका ल्याएको थियो । तर, देशैभरको क्रियाशील सदस्यताको विषय नै टुंगिन नसक्दा नियमित महाधिवेशन नहुने भएको छ ।

कांग्रेस महामन्त्रीद्वयले लिए जोखिम

नियमित नहुने भएपछि महामन्त्रीद्वयले विधानअनुसार विशेष महाधिवेशन बोलाउने तयारी गरेका हुन् । पार्टी सभापति शेरबहादुर देउवा पक्षधर संस्थापन पक्षीय नेताहरु विशेष महाधिवेशन स्विकार्न तयार छैनन् । तोकिएको मितिमा नियमित महाधिवेशन नभएपछि अब २१ फागुनको आम निर्वाचनपछि गर्नुपर्ने पक्षमा उनीहरु देखिन्छन् । महाधिवेशनलाई लिएर पार्टीभित्र देखिएको फरक-फरक अडानले चुनावको मुखमा पार्टीमा विवाद चुलिएको छ ।