काठमाडौँ — नेकपा एमालेको अध्यक्षमा केपी शर्मा ओली तेस्रो कार्यकालका लागि विजयी भएका छन् ।

ओली प्यानलबाटै महासचिवमा शंकर पोखरेलले दोस्रो कार्यकालका जित हासिल गरेका छन् । १९ पदाधिकारीमध्ये १७ जना ओली प्यानलका छन् ।

ओली टिमको वर्चस्व भए पनि राजनीतिक हिसाबले यसको दीर्घकालीन सन्देश दिएको छ । पार्टीभित्र लोकतन्त्र र विधि बसाल्ने भन्दै छुट्टै प्यानल बनाएर निर्वाचनमा होमिएका ईश्वर पोखरेल टिमले राजनीतिक रुपमा भने विजय हासिल गरेको छ ।

पोखरेल पक्षको प्यानल घोषणा भएपछि संस्थापन पक्षले आफ्नो पक्षका उम्मेदवार जिताउन निकै कसरत गर्नुपरेको थियो । पोखरेल पक्षका पदाधिकारीका उम्मेदवारले पनि उल्लेखनीय भोट ल्याएकाले यो आगामी दिनमा एमालेभित्रको शक्ति सन्तुलनका हिसाबले पनि महत्त्वपूर्ण मानिनेछ ।

एमालेको १९ पदाधिकारीमा ओली प्यानल हाबी, पोखरेल पक्षका दुई जना मात्रै निर्वाचित

एमालेभित्र ओलीको विजयलाई स्वाभाविक रुपमा लिइए पनि पोखरेल पक्षका दुई पदाधिकारीको 'इन्ट्री'ले भोलि एमालेमा कस्तो भूमिका निर्वाह गर्छ त्यो हेर्न बाँकी छ ।

२०७८ चितवनमा भएको महाधिवेशनमा छुट्टै प्यानल थिएन । त्यसैले ओलीले उम्मेदवार भएका नेताहरूमाथि विभिन्न ढंगले राजनीतिक दमन सुरु गरेका थिए । तर यसपटकको नेतृत्व चयनको निर्वाचनले पोखरेल पक्षको राजनीतिक धार स्थापित गरेको छ । 

पदाधिकारी र केन्द्रीय कमिटीमा ओलीको बहुमत भए पनि अबको १२औं महाधिवेशनसम्म आफ्नो पक्षका नेताहरूलाई सन्तुलनमा राख्न भने चुनौतीपूर्ण हुनेछ । किनकि पोखरेल पक्षका नेताहरुले पार्टीमा आन्तरिक लोकतन्त्र, विधिको शासन र जेन-जी आन्दोलनपछि नेतृत्व हस्तान्तरणका विषयमा बहस उठाइरहनेछन् ।