सत्ता गठबन्धन बैठकमा उपसभामुख बाहिर रहँदा हटाउन नहुने भन्दै जसपाले हस्ताक्षर गर्न अस्विकार गरेको छ ।
काठमाडौँ — उपेन्द्र यादवको नेतृत्वमा रहेको जनता समाजवादी नेपालले उपसभामुख इन्दिरा रानालाई हटाउने प्रस्तावमा हस्ताक्षर गर्न अस्वीकार गरेको छ।
सत्ता गठबन्धनले बोलाएको बैठकमा उपस्थित भएको जसपा नेपालले उपसभामुख बाहिर रहेको समयमा हटाउन नहुने तर्क गर्दै हस्ताक्षर नगरेको हो।
जसपा नेपालकी सचेतक रेखा यादवले आफ्नो दल उपसभामुख बाहिर रहेको बेला हटाउन पक्षमा नभएको जानकारी दिइन्। उनले भनिन्, ‘उपसभामुख हटाउने प्रस्तावका सम्बन्धमा छलफल गर्न कांग्रेस संसदीय दलमा बोलाउनु भएको थियो। उहाँ बाहिर रहेको बेला प्रस्ताव ल्याउनु ठिक होइन भन्ने हाम्रो धारणा हो। हाम्रो पार्टीमा छलफल पनि भएको छैन, त्यसैले निर्णय दिइएको हो।’
यदि जसपाले मत दिएन भने सरकारलाई दुई तिहाइ पुर्याउन अन्य दलको साथ लिनुपर्नेछ। जसपासँग ७ सांसद छन्।
