काठमाडौँ — भदौ २४ मा काठमाडौंको डल्लुस्थित घरसँगै जलेर सख्त घाइते भएकी पूर्वप्रधानमन्त्री झलनाथ खनालकी श्रीमती रविलक्ष्मी चित्रकारले अपराधीलाई कारबाही गर्न माग गरेकी छन् ।

भदौ २३ र २४ घटनासम्बन्धी जाँचबुझ आयोगलाई दिएको बयानमा उनले त्यो घटनाको त्रासदी सुनाएकी छन् । ‘भदौ २४ गते घरमा ढुंगामुढा भइरहेको अवस्थामा को आयो थाहा भएन, हामी ढुंगा नलाग्ने ठाउँमा बसेका थियौँ । उनीहरू मानौँ आएकै हुनुपर्थ्यो, म कराउन नपाएर बेहोस भएँ । मेरो हात जलिहाल्यो र श्वास फेर्न नसकेर बेहोस भएँ,’ उनको भनाइ आयोगको प्रतिवेदनमा समेटिएको छ, ‘मलाई खोज्न प्रहरी भाइहरूलाई १ घण्टा जति लागेको होला । प्रत्यक्षदर्शीअनुसार, एकजना नेपाल प्रहरीका सई साब सन्तोष रुपाखेती, सरोज खड्का र सशस्त्रका विमल पन्तलगायत प्रहरीले मलाई खोजेर फेला पारे । अहिले पनि मेरो शरीर पोल्छ र आफ्नो काम आफैं गर्न सक्दिनँ । दाहिने हात राम्ररी चल्दैन ।’ 

उनले अपराधीलाई ठाउँमा ल्याउन सरकार सचेत हुनुपर्ने बताएकी छन् । ‘अपराधका नायक निर्भीक रूपमा हिडिरहँदा सरकारले किन पक्राउ गर्न सकेको छैन ?,’ उनले सोधेकी छिन् । आगोले गहिरो पोलेका कारण उनको देब्रे हात काटिएको छ । उनी अझै उपचारका क्रममा छिन् ।

त्यस घटनाबारे खनालले आफूलाई नेपाली सेनाले उद्धार गरेर लगे पनि श्रीमती घाइते भएको आयोगलाई दिएको बयानमा उल्लेख गरेका छन् । आफूलाई उद्धार गरेको ४५ मिनेटमा घर जलेको उनले बताएका छन् । ‘४५ मिनेटको अन्तरालमा मेरो घर र गाडी जलाए । मेरो परिवारजन तेस्रो तलाबाट पनि माथि गएर हारगुहार, रोइकराई गरे, तर कसैले वास्ता गर्ने कुरा भएन । यसबीच मैले मेरो छोरा निर्विकलाई फोन गर्दा “बा, हामीलाई जलाए” भनेर भन्यो र फोन बन्द भयो,’ प्रतिवेदनमा खनालको भनाइ छ, ‘मेरी श्रीमती बेहोस भइसकेकी रहिछिन् । श्वासनली तलैसम्म जलेको रहेछ । अढाई महिनासम्म उनको बोली थिएन । श्रीमती बेहोस हुँदा घोप्टो परेर भएकाले माथिल्लो भाग जलेन । मेरो म्याडमको देब्रे हात भने चौथो डिग्रीसम्म जलेको रहेछ, उनी अहिलेको कथित सरकारका लागि घाइतेसमेत भइनन् ।’