काठमाडौँ — निर्वाचन आयोगले प्रतिनिधिसभा सदस्य निर्वाचनका क्रममा अन्तर्राष्ट्रिय सीमा नाका ७२ घण्टा सिल गर्न सरकारसमक्ष सिफारिस गरेको छ । आयोगका सदस्य सगुन शमशेर जबरा नेतृत्वको उच्चस्तरीय निर्वाचन सुरक्षा समितिले फागुन २१ का लागि तय भएको निर्वाचनअन्तर्गत नेपाल-भारत र नेपाल-चीन सीमा नाका सिल गर्न सिफारिस गरिएको हो । 

भारतसँग नेपालको खुला सीमा छ । करिब १ हजार ८ सय ८० किलोमिटर लम्बाइमा नेपाल-भारत सीमा कायम छ । त्यसैगरी नेपाल-चीन सीमा नियन्त्रित अवधारणाअन्तर्गत छ । दुवै देशका नागरिक भिसा र सीमावर्ती जिल्लाका हकमा स्थानीय प्रशासनले जारी गरेको अस्थायी पासका आधारमा आवागमन गर्न पाइन्छ । आयोगले निर्वाचनका बेला अत्यावश्यक वस्तु तथा सेवाको हकमा जाँच गराएर  र बाँकीको हकमा आवागमन पूर्ण रूपमा बन्द गराउन सिफारिस गरिएको हो । 

यसैगरी मतदान र अघि गरी एक साताका लागि देशभर मदिरा बिक्रीलाई समेत रोक लगाउन सिफारिस गरेको छ । मदिरा सेवन गरेर शान्ति सुरक्षामा खलल पुर्‍याउने, सामाजिक सद्भाव बिथोल्नेलगायत गतिविधि नियन्त्रणका लागि १ सातालाई बिक्री वितरण रोक लगाउन सिफारिस गरेको आयोगका प्रवक्ता नारायणप्रसाद भट्टराईले बताए ।

सुरक्षा समितिमा निर्वाचन तयारी र व्यवस्थापनका क्रममा गरिएका प्रयास र रणनीतिबारे समीक्षा भएको भट्टराईको भनाइ छ । उनका अनुसार निर्वाचनका दिन गाडी चल्न नदिने, अत्यावश्यक पासवाहकबाहेकलाई आवागमनमा रोक लगाइने, मौन अवधिमा हुन सक्ने प्रचारप्रसार निगरानी र नियन्त्रण गर्ने,सामाजिक सञ्जालबाट हुने निर्वाचन आचारसंहिताविपरीतका गतिविधि नियन्त्रण गर्नेलगायतका विषयमा छलफल भएको थियो ।

निर्वाचन सुरक्षा तयारीअन्तर्गत नै माघमै सशस्त्र प्रहरी बल र भारतीय सीमा सुरक्षा बलका वाहिनीपति(डीआईजी) स्तरीय बैठकले नेपालको निर्वाचनलाई ध्यानमा राखेर सीमानाका ७२ घण्टा सिल गर्ने सहमति गरिसकेका छन् ।