काठमाडौँ — शुक्रबार रातिदेखिको अविरल वर्षापछि देशैभरको सडक प्रभावित भएका छन् भने सम्भावित दुर्घटनाको मध्यनगर गर्दै सरकारी स्तरबाटै ती सडकमा आउजाउ बन्द गरिएको छ । यस्तो छ बाटोको अहिलेको अवस्था :

१. भक्तपुरको साँगास्थित  झोलुङ्गेपुल नजिकै झरेको पहिरोले  गर्दा आवतजावत प्रभावित  भएको छ ।

२.नारायणगढ-मुग्लिन सडकखण्ड अन्तर्गत चितवनको इच्छाकामना गाउँपालिका ५ तुइन खोला पुल नजिकै पहिरो केही हटाइएसँगै सवारी साधन एक लेनमा आलोपालो सञ्चालन भइरहेका छन् । 

३.कान्तिलोकपथ ललितपुरको बागमती गाउँपालिका ३ टाकुचेमा खसेको पहिरोले आवातजावत बन्द छ । 

४.फर्पिङ- सस्नेरी अन्तर्गत मकवानपुरको इन्द्रसरोवर गाउँपालिका ४ महालक्ष्मी खोला पहिरो माथिबाट खसेको पहिरोले पनि आवतजावत रोकिएको छ ।

५.बीपी राजमार्गमा पर्ने काभ्रेपलाञ्चोकको रोशी गाउँपालिका ११ माम्तीखोला र बुलढुंगामा खसेको पहिरोका कारण सवारी आवागमन रोकिएको छ । 

६.अरनिको राजमार्ग अन्तर्गत सिन्धुपाल्चोकको भोटेकोशी गाउँपालिका ४ चारकिलोमा सडक भासिँदा ठूला सवारी साधन चल्न सकेका छैनन् । 

७.कोशी राजमार्गमा पर्ने संखुवासभाको मकालु गाउँपालिका ३ एकुवा र भोटखोला गाउँपालिका ४ वरुणमा खसेको पहिरोका कारण सवारी साधन आज पनि चल्न सकेका छैनन् ।

८.पासाङल्हामु राजमार्गमा पर्ने रसुवाको गोसाईंकुण्ड गाउँपालिका २ स्थित घट्टेखोला, बालुवाखानी र तातोपानीमा खसेको पहिरोको कारण सवारी साधन चल्न सकेका छैनन् । 

९.रसुवाको गोसाईंकुण्ड गाउँपालिका २ रसुवागढीस्थित नेपाल र चीन नाका जोड्ने मितेरी पुलमा गत असार २४ गते आएको बाढीले क्षति पुर्‍याएकाले सवारी आवागमन अवरुद्ध रहेको छ ।

१०.ओखलढुङ्गाको मानेभञ्ज्याङ गाउँपालिका ६ र ७ को सिमानास्थित सिद्धिचरण लोकमार्गमा पर्ने भँडारे खोलामा आएको बाढीले गर्दा आवागमन रोकिएको छ ।