काभ्रे — खोला किनार र जोखिमयुक्त बस्तीमा रहेकालाई सुरक्षित स्थानमा स्थानान्तरण गराइने भएको छ । शनिबार बसेको जिल्ला विपद् व्यवस्थापन समितिले खोला किनार र जोखिमयुक्त बस्तीमा रहेकालाई सुरक्षित स्थानमा स्थानान्तरण गर्ने निर्णय गरेको छ ।

खोला किनार र जोखिमयुक्त बस्तीमा रहेका नागरिकहरूलाई स्थानीय विपद् व्यवस्थापन समितिहरूले नजिकको सुरक्षा युनिटहरूको सहयोग लिएर पालिकाका वडा अध्यक्षहरूमार्फत अस्थायी बसोबासका लागि सुरक्षित स्थानमा स्थानान्तरण गराउन अनुरोध गरिएको जिल्ला विपद् व्यवस्थापन समितिका संयोजक एवं प्रमुख जिल्ला अधिकारी उमेश कुमार ढकालले जानकारी दिए । 

मनसुनजन्य विपद्बाट काभ्रेका ३ सय ९५ वटा बस्ती उच्च जोखिममा परेको जिल्ला विपद् व्यवस्थापन समितिले जनाएको छ । केही समयअघि समितिले तयार पारेको विवरण अनुसार, स्थानीय तह, जिल्ला प्रहरी मातहत रहेका विभिन्न चौकीमार्फत जिल्ला विपद् व्यवस्थापन समितिले छलफल गरेर संकलन गरेको विवरण अनुसार बाढी र पहिरोबाट काभ्रेका १३ पालिकामा रहेका ३ सय ९५ वटा बस्ती जोखिममा परेको पहिचान भएको हो ।