काठमाडौँ — प्रतिनिधिसभाको आजको बैठकमा सांसदहरूले भारत र पाकिस्तानबीच विकसित पछिल्लो तनाव र त्यसले नेपालमा पार्न सक्ने सम्भावित प्रभावबारे सरकार समयमै सचेत रहनुपर्नेमा जोड दिएका छन्।

नेपाली कांग्रेसका सांसद सञ्जयकुमार गौतमले भूराजनीतिक संवेदनशीलता र खुला सिमानाका कारण भारत–पाकिस्तानबीच युद्ध सुरु भएको अवस्थामा नेपालमा पार्न सक्ने अल्पकालीन र दीर्घकालीन असरबारे सरकार समयमै छलफल अघि बढाउनुपर्ने धारणा व्यक्त गरे।

गौतमले दक्षिणपूर्वी एसियाली मुलुकमा द्वन्द्व चर्किएको समयमा राष्ट्रिय राजनीतिक दलहरूबीच एकता आवश्यक रहेको उल्लेख गरे। संविधान संशोधन, संघीयताको सुदृढीकरण, संस्कृतिको संरक्षण र प्रवर्द्धनलगायत विषयमा न्यूनतम सहमति कायम गरी आम जनतालाई आशा जगाउनुपर्ने धारणा उनले राखे।

उनले राष्ट्रिय निकुञ्ज क्षेत्रमा जङ्गली जनावरको त्रास बढ्दै गएको उल्लेख गर्दै पछिल्लो तीन महिनामा बर्दियामा चितुवाको आक्रमणबाट दुई जनाको मृत्यु र ११ जना घाइते भएको तथ्य प्रस्तुत गर्दै जङ्गली जनावरबाट नागरिकलाई सुरक्षित राख्ने वातावरण निर्माण गर्न सरकारको ध्यानाकर्षण गराएका छन्।

नेपाल कम्युनिष्ट पार्टी (एमाले) का सांसद अच्युतप्रसाद मैनालीले सरकारले नयाँ योजनासहित नीति तथा कार्यक्रम ल्याएको भन्दै त्यसलाई पारित गराउने दिशामा सकारात्मक पहल आवश्यक रहेको बताए। उनले परम्परागत नीति तथा कार्यक्रमको क्रमभंग गर्दै सरकारले हिम्मतका साथ कार्यक्रम अघि सारेको बताए।

मैनालीले प्रतिपक्षी दलका सांसदहरूले तथ्यपरक र सकारात्मक टिप्पणी गर्नुपर्ने सुझाव दिँदै संघीय लोकतान्त्रिक गणतन्त्रको संस्थागत विकास र मुलुकको आर्थिक उन्नतिका लागि राजनीतिक दलबीच साझा दृष्टिकोण आवश्यक रहेको धारणा राखे।

नेपाल कम्युनिष्ट पार्टी (माओवादी केन्द्र) की सांसद रुपा सोशी (चौधरी) ले भ्रष्टाचार र अनियमितता नियन्त्रणमा सरकार सक्रिय हुनुपर्नेमा जोड दिइन्। उनले समाजवादोन्मुख अर्थतन्त्र निर्माण गर्न सार्वजनिक–निजी साझेदारीलाई प्राथमिकता दिनुपर्ने धारणा व्यक्त गरिन्। नेपाल विद्युत् प्राधिकरण घाटामा गएको विषय सार्वजनिक भएपछि त्यसलाई प्रभावकारी बनाउन सरकारलाई ध्यानाकर्षण गराएकी छन्।