काठमाडौँ — सहकारी ठगी आरोप लागेका सत्तारुढ कांग्रेसका उपसभापति तथा पूर्वमन्त्री धनराज गुरुङसँग प्रहरीले सोधपुछ गरेको छ । नेपाल प्रहरीको केन्द्रीय अनुसन्धान ब्युरो (सीआईबी)ले प्रतिनिधिसभा सदस्यसमेत रहेका गुरुङसँग मंगलबार दोस्रोपटक बयान कागज गराएको हो ।

सीआईबी  प्रमुख एआईजी दीपक थापाका अनुसार ललितपुरको मितेरी सहकारी ठगी प्रकरणमा गुरुङसँग सीआईबीको लाजिम्पाटस्थित कार्यालयमा बोलाएर बयान कागज गराइएको हो । 

सीआईबीसमक्ष गुरुङले सहकारीले घर पनि लगेको र परिवार पनि बिगारेको भन्दै सहकारी ठगीमा आफ्नो संलग्नता इन्कार गरेका छन् । एआईजी थापाले ठगीको अनुसन्धान जारी रहेको र अझै तथ्य प्रमाणहरू संकलनका क्रममा रहेको बताए । 

'अनुसन्धानकै क्रममा गुरुङलाई सोधपुछ बयानका लागि डाकिएको हो । हामीले संकलन गरेका तथ्य, प्रमाणलाई टेकेर केही कुरा बुझ्नका लागि बोलाएका हौं । अनुसन्धान अझै जारी रहेकाले अरू कुरा खुल्दै जाला,' थापाले भने, 'ठगी प्रकरणमा केही व्यक्ति फरार छन् । उनीहरूको खोजीमा इन्टरपोलमार्फत रेड नोटिस नै जारी भइसकेको छ ।'

ललितपुरको मितेरी सहकारीमा श्रीमतीसँग मिलेर गुरुङले करोडौं रकम ठगी गरेको आरोप लागेको छ । उक्त सहकारीमा गुरुङले श्रीमती ज्योती गुरुङलाई २०५७ जेठ १२ मा सहायक स्तरको कर्मचारी बनाएका थिए । त्यसको २ महिनापछि साउन २५ मा ज्योति सहकारीको लेखापाल, २०७० वैशाख ४ मा वरिष्ठ लेखापाल र २०७५ वैशाख ४ मा महाप्रबन्धक बनेकी थिइन् ।