सानोपाइला सहकारी ठगीमा अनुसन्धानका लागि लामिछानेलाई वीरगन्ज ल्याइयो
वीरगन्ज — सहकारी ठगी, किर्ते, संगठित अपराध र सम्पत्ति शुद्धीकरणसम्बन्धी कसुरमा अनुसन्धानका लागि प्रहरी हिरासतमा रहेका पूर्वगृहमन्त्री तथा रास्वपाका सभापति रवि लामिछानेलाई सोमबार वीरगन्ज ल्याइएको छ । वीरगन्जको सानोपाइला बचत तथा ऋण सहकारी ठगी आरोपमा अनुसन्धानका लागि वीरगन्ज ल्याइएको हो ।
लामिछानेलाई पोखराबाट जहाजमा काठमाडौं हुँदै सिमरा पुर्याइएको र त्यहाँबाट सडकमार्फत वीरगन्ज ल्याइएको पर्सा प्रहरीका प्रवक्ता प्रहरी नायब उपरीक्षक (डीएसपी) किशोर लम्सालले बताए । सिमरा विमानस्थल र जिल्ला प्रहरी कार्यालय पर्सा अगाडि केहीबेर रास्वपाका कार्यकर्ताले नाराबाजी गरेका थिए । लामिछानेसँगै गोर्खा मिडिया नेटवर्कका सञ्चालक पूर्वडीआईजी छविलाल जोशीलाई पनि सहकारी ठगीमा अनुसन्धानका लागि वीरगन्ज ल्याइएको प्रहरीले जनाएको छ । डीएसपी लम्सालका अनुसार मंगलबार अनुसन्धान अधिकृत र सरकारी वकिलले लामिछाने र जोशीसँग बयान लिनेछन् । बयान सकिएपछि दुवैलाई पोखरा पठाइनेछ ।
वीरगन्ज महानगरपालिका–६ आदर्शनगरमा रहेको सानोपाइला सहकारीबाट गोर्खा मिडिया नेटवर्कको बैंक खातामा ८ करोड ५८ लाख रुपैयाँ जम्मा गरेको पाइएको संसदीय छानबिन विशेष समितिको प्रतिवेदनमा उल्लेख छ । २०७८ वैशाख ५ देखि २०७९ साउन १९ सम्म सानोपाइला सहकारीबाट गोर्खा मिडियामा रकम सारिएको हो । लामिछाने २०७७ माघ १ देखि २०७९ असार १ सम्म गोर्खा मिडियामा प्रबन्धक निर्देशकको भूमिकामा थिए ।
२०७८ साउन १९ मा एकैदिन चार करोड ९१ लाख ९४ हजार रुपैयाँ सारिएको समितिको प्रतिवेदनमा उल्लेख छ । जोशीका नाममा पनि उक्त सहकारीबाट १ करोड ८६ लाख ९४ हजार रुपैयाँ गएको समितिको अनुसन्धानमा देखिएको छ । यसबाहेक सानोपाइलाबाट ९३ करोड ६२ लाख ९७ हजार रुपैयाँ गैरकानुनी रूपले कार्यक्षेत्रबाहिर ऋण प्रवाह गरिएको छ ।
डेढ वर्ष अगाडि उजुरी दर्ता गराउने बेला गोर्खा मिडियामा सानोपाइला सहकारीबाट रकम सारिएको प्रमाण नहुँदा निवेदनमा नाम समावेश गर्न नसकिएको बचतकर्ताले बताए । ‘त्यसबेला प्रमाण नपुग्दा प्रहरीले सहकारीको सञ्चालक समिति र कर्मचारीविरुद्ध उजुरी दर्ता गर्यो,’ बचतकर्ता विक्रम अग्रवाल भन्छन्, ‘गोर्खा मिडियाको नाम राख्न खोज्दा प्रहरीले प्रमाण माग गरेको थियो । प्रमाण नहुँदा नाम हटाउन बाध्य भयौं ।’
एक सय ७९ बचतकर्ताले सानोपाइलाका सञ्चालक समिति, लेखा समिति तथा कर्मचारीविरुद्ध सहकारी ठगीमा उजुरी दर्ता गराएका थिए । सहकारीकी पूर्वउपाध्यक्ष नेहा पौडेल गत साउन २१ मा जिल्ला अदालत पर्साबाट न्यायिक परीक्षण हुँदा ठहरेबमोजिम हुने गरी १ करोड १० लाख धरौटीमा रिहा भएकी थिइन् । यसैगरी सहकारीका कर्मचारी राधेचन्द्र यादव पनि ३५ लाख रुपैयाँ धरौटीमा रिहा भएका छन् । प्रहरीका अनुसार सानोपाइला सहकारीका अध्यक्ष अनन्तबाबु राई, सचिव देवेन्द्रबाबु राई, प्रबन्धक असरफ अली सिद्धिकी, संरक्षक गीतेन्द्रबाबु (जीबी) राईलगायत ११ जना फरार छन् ।
