शान्तिका लागि विदेशी हिमाल

यसअघि सगरमाथासहित आल्यान्ड पिक र लामटाङ हिमालको आरोहण गरेका ३४ वर्षीय सेर्माले यही सिजनमा रुस र युरोपको माउन्ट एल्ब्रस तथा तान्जानियाको माउन्ट किल्ली मन्जारो आरोहण गर्ने तालिका छ ।

उनले दुईवटै हिमाल आरोहणका लागि प्रक्रिया थालिसकेका छन् । तर आरोहणको मिति भने मे ३१ मा टुंगो लाग्ने बताइएको छ । ‘ट्रेकिङ कम्पनी र आरोहण दलका कतिपय साथीहरू सगरमाथा जानुभएको छ, उहाँहरू फर्कनासाथ मेरो आरोहण तालिका टुंगो लाग्छ,’ सेर्माले भने । उनका अनुसार ती हिमाल आरोहणका लागि ५/५ लाख रुपैयाँ खर्च लाग्छ । २०१७ को मे २० मा सगरमाथाको चुचुरोमा पुगेका उनले त्यसअघि आल्यान्ड पिकको आरोहण गरेका थिए । यीबाहेक उनीसँग लामटाङ हिमाल आरोहण तथा देशकै होचो भूभागदेखि विश्वको तेस्रो अग्लो हिमाल कञ्चनजंघा आधारशिविरसम्म पैदल यात्रा गरेको अनुभव छ । आरोही सेर्मालाई संविधान दिवस २०७९ को अवसर पारेर सरकारले ‘सगरमाथा आरोहण पदक’ मार्फत पनि विभूषित गरिसकेको छ । ‘अफ्रिका र युरोपका हिमाल आरोहण गरिसकेपछि विश्व शान्ति, मानव एकता र परमाणु निःशस्त्रीकरणको सन्देश लिएर ७ महादेशका प्रमुख ७ वटा हिमाल आरोहण गर्ने योजना छ,’ उनी भन्छन् ।

हिमाल आरोहणका लागि सेर्मालाई विभिन्न व्यक्ति र संघसंस्थाले आर्थिक सहयोग गर्दै आएका छन् । यसपटक भने उनलाई हिमाल आरोहणकै लागि कोरियामा रहेका पाँचथरका सेर्मा दाजुभाइले एक लाख ३ हजार रुपैयाँ सहयोग गरिसकेका छन् । सेर्मा पाँचथरको पहिलो र एक्लो सगरमाथा आरोहीपनि हुन् । लिम्बू समुदायले उनलाई पहिलो पुरुष आरोहीका रूपमा लिने गरेका छन् ।