काठमाडौँ — विभिन्न पार्टीका पार्टी अध्यक्ष तथा सभापतिले चुनावी प्रतिस्पर्धाका लागि उम्मेदवारी दर्ता गराएका प्रतिनिधिसभाको निर्वाचन क्षेत्रमा स्वतन्त्रहरुले पनि उल्लेखनीय रुपमा उम्मेदवारी दर्ता गराएका छन् ।

नेकपा एमालेका अध्यक्ष केपी शर्मा ओलीको निर्वाचन क्षेत्रमा झापा-५ मा १४ जनाले स्वतन्त्र उम्मेदवारी दिएका छन् । यस्तै माओवादी केन्द्रका अध्यक्ष पुष्पकमल दाहालको निर्वाचन क्षेत्र गोरखा-२ र राप्रपा अध्यक्ष राजेन्द्र लिङ्देनको निर्वाचन क्षेत्र झापा-३ मा भने ३-३ जनाले मात्रै स्वतन्त्र उम्मेदवारी दिएका छन् ।

नेपाली कांग्रेसका सभापति तथा प्रधानमन्त्री शेरबहादुर देउवाको निर्वाचन क्षेत्र डडेल्धुराबाट पनि ५ जनाले स्वतन्त्र उम्मेदवारी दिएका छन् । एमाले अध्यक्ष ओलीको निर्वाचन क्षेत्रपछि सबैभन्दा धेरै स्वतन्त्र उम्मेदवारी लोसपा अध्यक्षको निर्वाचन क्षेत्र महोत्तरी-३ मा ११ जनाले स्वतन्त्र उम्मेदवारी दिएका छन् । यस्तै, जसपाका अध्यक्ष उपेन्द्र यादवको निर्वाचन क्षेत्र सप्तरी-२ बाट केवल ४ जनाको मात्रै स्वतन्त्र उम्मेदवारी परेको छ ।

नेकपा(एस)का अध्यक्ष माधव नेपालको निर्वाचन क्षेत्र रौतहट-१ मा पनि ९ जनाले स्वतन्त्र उम्मेदवारी दिएका छन् । पत्रकारिता छोडेर राजनीतिमा होमिएका राष्ट्रिय स्वतन्त्र पार्टीका अध्यक्ष रवि लामिछानेको निर्वाचन क्षेत्र चितवन-२ मा पनि ८ जनाले स्वतन्त्र उम्मेदवारी दिएका छन् ।