एसपीपीसम्बन्धी कुनै सम्झौता वा समझदारी गरेका छैनौं : नेपाली सेना- समाचार - कान्तिपुर समाचार
कान्तिपुर वेबसाईट
AdvertisementAdvertisement

एसपीपीसम्बन्धी कुनै सम्झौता वा समझदारी गरेका छैनौं : नेपाली सेना

कान्तिपुर संवाददाता

काठमाडौँ — नेपाली सेनाले अमेरिका सेना वा सरकारसँग स्टेट पार्टनरसिप प्रोग्राम (एसपीपी) सम्बन्धी कुनै पनि सम्झौता वा समझदारी नगरेको जनाएको छ । सेनाले बुधबार साँझ विज्ञप्ति प्रकाशित गर्दै एसपीपी सम्झौता गर्नेतर्फ कुनै प्रक्रियामा समेत नभएको प्रस्ट पारेको छ ।

यसअघि नेपालस्थित अमेरिकी दूतावासले नेपालले एसपीपीमा सहभागी हुन दुई पटक निवेदन दिएपछि सन् २०१९ मा अमेरिकाले त्यसलाई स्वीकार गरेको जनाएको थियो ।

'नेपालले अवलम्बन गरेको असंलग्न परराष्ट्र नीति, नेपालको विशिष्ट भूराजनैतिक अवस्थिति र सामरिक संवेदनशीलतालाई प्रतिकूल असर गर्नेगरी कुनै पनि सैनिक साझेदारी भविष्यमा कोहीसँग पनि गर्न नहुने वस्तुगत यथार्थतामा नेपाली सेना सदैव प्रस्ट र सचेत रहेको बेहोरा सम्पूर्ण जनमानस तथा सञ्चारजगतलाई जानकारी गराइन्छ,' सेनाको विज्ञप्तिमा भनिएको छ ।

काठमाडौंस्थित अमेरिकी राजदूतावासका उपप्रमुख मानुएल पी. मिकलरले बुधबार पत्रकारहरुसँग कुरा गर्दै भने, ‘नेपालले सन् २०१५ र २०१७ मा निवेदन दिएपछि हामीले सन् २०१९ मा अनुरोध स्वीकार गर्‍यौं ।’ अमेरिकाले सन् २०१९ मा उटाह नेशनल गार्डसँग सहकार्य गर्ने गरी उक्त अनुरोध स्वीकारेको बताए । अमेरिकी दूतावासले भनेको समयमा नेपाली सेनाका प्रधानसेनापति राजेन्द्र क्षत्री थिए ।


प्रकाशित : असार १, २०७९ २०:५९
प्रतिक्रिया
पठाउनुहोस्

अमेरिकाविरुद्ध नेपालको पहिला फिल्डिङ

विनोद पाण्डे

ह्युस्टन, अमेरिका — नेपालले विश्वकप लिग २ क्रिकेटमा अमेरिकाविरुद्ध बुधबार पहिला बलिङ गर्ने भएको छ । कप्तान सन्दीप लामिछानेले टस जितेपछि घरेलु टोली अमेरिकालाई ब्याटिङमा बोलाएको हो । ओमानलाई अघिल्लो दिन ७ विकेटले पराजित गरेको खेलबाट नेपाली टोलीमा कुनै परिवर्तन गरिएको छैन । अमेरिकाको टोलीमा तीब्र बलर अली खान फर्किएका छन् । उनले रस्टी थेरोनको स्थान लिने छन् । थेरोनले शनिबार नेपालविरुद्धको खेलमा ४ विकेट लिएका थिए ।

तस्बिर : हेमन्त श्रेष्ठ, कान्तिपुर

क्यारेबियन प्रिमियर लिग र इन्डियन प्रिमियर लिगमा समावेश भइसकेका खानलाई ओमानविरुद्धको अघिल्लो खेलमा विश्राम दिइएको थियो ।

नेपाल पहिलो खेलमा ओमानसँग १३ रनले पराजित भएको थियो भने त्यसपछिको अर्को खेलमा ओमानलाई मंगलबार ७ विकेटले पराजित गरेको थियो । नेपाल र अमेरिका बीच शनिबार भएको खेल ‘टाई’मा टुंगिएको थियो । नेपालले पहिला ब्याटिङ गरी २ सय ७४ रन बनाएको थियो भने जबाफमा आएको अमेरिकाले पनि २ सय ७४ रन नै बनाएको थियो ।

पहिलो खेलमा ओमानलाई पहिलो खेलमा १ सय १४ रनले पराजित गरेको अमेरिका त्यसपछि ओमानसँगको अर्को खेलमा १३ रनले पराजित भएको थियो । लिग २ मा अमेरिका २३ खेलमा २१ र नेपाल १५ खेलमा १५ अंक जोडि अंक तालिकामा क्रमश: चौथो र पाँचौं स्थानमा छ ।

लिग २ अर्को वर्ष हुने एकदिवसीय विश्वकप छनोट र एकदिवसीय अन्तर्राष्ट्रिय मान्यताको आधार हो । अमेरिकामा भइरहेको लिग २ नेपालको चौथो शृंखला हो । लिग २ मा सहभागि ७ टोलीले ९ शृंखला अर्थात् ३६ एकदिवसीय अन्तर्राष्ट्रिय खेल खेल्नु पर्ने प्रावधान छ । लिग २ को शीर्ष ३ टोली सोझै जुलाईमा हुने एकदिवसीय विश्वकप छनोटमा पुग्ने छन् भने चौथो र पाँचौं हुने टोलीले शीर्ष तीन टोलीले जस्तै एकदिवसीय अन्तर्राष्ट्रिय मान्यता कायम राख्दै विश्वकप छनोटमा पुग्ने अर्को मौका पाउनेछन् ।



प्रकाशित : असार १, २०७९ २०:५८
पूरा पढ्नुहोस्
प्रतिक्रिया
पठाउनुहोस्
×