देउवाद्वारा १० केन्द्रीय सदस्य मनोनीत- समाचार - कान्तिपुर समाचार

देउवाद्वारा १० केन्द्रीय सदस्य मनोनीत

कान्तिपुर संवाददाता

काठमाडौँ — नेपाली कांग्रेसको चौधौं महाधिवेशन समाप्त भएसँगै पार्टी सभापति शेरबहादुर देउवाले केन्द्रीय कार्यसमितिमा १० जनालाई मनोनयन गरेका छन् ।

कांग्रेसको विधान, २०१७ (संशोधन सहित) को धारा २१ को उपधारा (१०) बमोजिम पार्टी सभापतिले केन्द्रीय कार्यसमितिमा रामचन्द्र पौडेल, प्रकाशमान सिंह, विमलेन्द्र निधि, विजयकुमार गच्छदार, कृष्णप्रसाद सिटौला, डा. प्रकाशशरण महत, डा. नारायण खड्का, उमा रेग्मी, सुजाता कोइराला र मीनबहादुर विश्वकर्मालाई मनोनयन गरेका कांग्रेसका मुख्यसचिव कृष्णप्रसाद पौडेलले बताए ।

देउवाले मनोनीत गरेकामध्ये गच्छदार,महत र कोइराला महाधिवेशनमा पराजित उम्मेद्वारहरू हुन् । गच्छदार र कोइराला उपसभापतिमा र महत महामन्त्रीमा पराजित भएका थिए ।

देउवाले महाधिवेशन प्रतिनिधिहरुबाट ३३ जनालाई केन्द्रीय सदस्यमा मनोनयन गर्न पाउँछन् । मनोनयनमध्ये सिंह र निधि देउवासंगै पार्टी सभापतिमा प्रतिस्पर्धा गरेका थिए । पहिलो चरणको निर्वाचनमा ५० प्रतिशत नकटेपछि भएको दोस्रो चरणको निर्वाचनमा उनीहरुले देउवालाई सघाएका थिए । पौडेल, सिटौलासहितका अन्य नेताहरु चुनावी प्रतिस्पर्धामा थिएनन् ।

सभापतिका मुख्य प्रत्यासी शेखर कोइराला भने स्वत: केन्द्रीय सदस्यमा मनोनयन हुने प्रावधान छ । सभापतिको निकट्म प्रतिद्धन्दी स्वत: सदस्य हुने प्रावधान विधानमा राखिएको छ ।

प्रकाशित : पुस १७, २०७८ १६:५४
प्रतिक्रिया
पठाउनुहोस्

हिउँमा फसेका बाबुछोरा उद्धारमा गएको हेलिकप्टर रित्तै फर्कियो 

आनन्द गौतम

ताप्लेजुङ — चार दिनदेखि हिउँमा फसेका बाबुछोरा खोज्न गएको हेलिकप्टर फर्किएको छ । अल्टिच्युट एयरको हेलिकप्टरले पापुङको गाउँमा बसेर दुई पटक प्रयास गर्दा पनि नभेटेपछि सुकेटार विमानस्थल फर्किएको हो । उक्त क्षेत्रको मौसम बिग्रिएकाले आइतबार फेरि प्रयास गर्नेगरी सुकेटारमै राखिने वडाध्यक्ष डण्डु शेर्पाले बताए । 

जिल्लाको मिक्वाखोला गाउँपालिका ५ पापुङका लाक्पाटाँसी शेर्पा र उनका १४ वर्षका छोरा पासाङ १४ गते बेलुकादेखि हिउँमा फसेका छन् । उनीहरु चौंरी गोठ सार्ने क्रममा हिउँमा फसेको वडाध्यक्ष शेर्पाले बताए । शनिबार बिहान ५ बजेतिर टेलिफोन गरेर हेलिकप्टरबाट आफूहरुको उद्धार गरिदिन अध्यक्ष शेर्पालाई अनुरोध गरेका थिए । शुक्रबार दिउँसोदेखि टेलिफोन सम्पर्कमा रहेका उनीहरुले ओडारमा बसेको बताएको शेर्पा बताउँछन् ।

शनिबार बिहान वडाध्यक्ष डण्डु शेर्पालाई टेलिफोन गरेर आग्रह गरेका छन् । ‘उहाँहरुसँग हिजो पनि टेलिफोन सम्पर्क भएको थियो, हामीलाई चौंरीसँगै हिउँ पहिरोले बगायो तर ओडार भेटेर बसेका छौं निस्कन सक्छौं होला भन्नु भयो,’ वडाध्यक्ष शेर्पाले भने, ‘आज बिहान ५ बजे फोन गरेर हामी निस्कन नसक्ने भयौं हेलिकप्टरबाट निकालीदिनु भन्नुभयो र प्रयास गरिरहेका छौं ।’ पाथीभरा तीर्थयात्री लिएर आएको माउन्टेन एयरको हेलिकप्टरले सुरुमा जाने भनेको पछि हिउँमा ल्यान्ड गर्न सक्दिनँ भनेपछि काठमाडौंबाट फेरि अल्टिच्युट एयरको हेलिकप्टर झिकाएको डण्डु बताउँछन् ।

माउन्टेनले माथिबाट सामान झार्न पनि नसकिने बताएको थियो । ‘बिहान चाँडो भएको भए सम्भव हुन्थ्यो होला,’ वडाध्यक्ष शेर्पाले भने, ‘ढिला भएकाले मौसम बिग्रियो ।’ गाउँबाट खोज्न गएको युवाको टोली पनि हिउँ छिचोल्न नसकेर फर्किएको शेर्पा बताउँछन् ।

प्रकाशित : पुस १७, २०७८ १६:४४
पूरा पढ्नुहोस्
प्रतिक्रिया
पठाउनुहोस्
×