'ओलीसँग छापामार तरिकाको एकता गम्भीर सैद्धान्तिक गल्ती थियो'- समाचार - कान्तिपुर समाचार
दाहालको प्रतिवेदनमा न्यौपानेको फरक मत

'ओलीसँग छापामार तरिकाको एकता गम्भीर सैद्धान्तिक गल्ती थियो'

कान्तिपुर संवाददाता

काठमाडौँ — माओवादी केन्द्रको ८ औँ महाधिवेशनमा अध्यक्ष पुष्पकमल दाहालले प्रस्तुत गरेको राजनीतिक प्रतिवेदनमा नेता लेखनाथ न्यौपानेले फरक मत राखेका छन् । अध्यक्ष दाहालले विगतमा गरेका राजनीतिक निर्णय र आगामी कार्यदिशाबारे न्यौपानेले फरक मत राखेका हुन् । 

प्रज्ञा भवन कमलादीमा जारी बन्दसत्रको चौथो दिन बिहीबार न्यौपानेले फरक मत राखेका हुन् । उनले एमालेसँगको एकतादेखि लिएर अध्यक्ष दाहालको व्यक्तिवादी प्रवृत्तिको आलोचना फरक मतमा राखेका छन् ।

'एमालेसँगको चुनावी तालमेल र कार्यगत मोर्चासम्मलाई सही मान्न सकिन्छ तर शान्तिपूर्ण संसद्‌वादमा डुबेको, उदारवादी अर्थतन्त्रको घोडा चढ्ने र ओलीजस्तो दक्षिणपन्थी विचारको नेतृत्वसँग छापामार तरिकाले गरिएको एकता सैद्धान्तिक र प्रक्रियागत हिसाबले गम्भीर गल्ती थियो,' न्यौपानेले राखेको फरक मतमा लेखिएको छ, 'हामी सबै मुख्यतः कमरेड अध्यक्षमा आत्मकेन्द्रित व्यक्तिवादको समस्या देखिएको छ । तपाईंका प्राय: सबै सार्वजनिक अभिव्यक्तिमा हाम्रो वर्ग, हाम्रो पार्टी, हाम्रो आन्दोलन र हाम्रो केन्द्रीय समितिको निर्णय भन्ने कतै सुनिँदैन । सुनिन्छ त म, मेरो, मेलै, प्रचण्डले मात्र । यसको एउटा उदाहरण तपाईंले नेकपाकालमा केपी ओलीलाई लेखेको पत्रमा म भन्ने शब्द ३४ पटक दोहोरिएको छ भने हामी भन्ने एक ठाउँमा मात्र ।'

एमालेमा देखिएको 'बा' प्रवृत्ति माओवादीमा पनि देखिन थालेको भन्दै न्यौपानेले फरक मतमा लेखेका छन्, 'हामीले ओलीभित्रको 'बा' प्रवृत्तिले कम्युनिस्ट आन्दोलनमा पारेको नकारात्मक प्रभावको खण्डन गर्दै गर्दा हामीभित्र पनि अर्को रुपको 'बा' प्रवृत्ति देखिएको छ ।'

न्यौपानेले श्रम नगर्ने तर लाखौं खर्च गर्ने नेता र कार्यकर्ताका कारण पार्टीमा समस्या उत्पन्न भएको बताएका छन् । 'श्रम नगर्ने वा उत्पादनसँग नजोडिएका नेता–कार्यकर्ताको सघनता जब पार्टीमा देखा पर्दछ तब त्यहाँ दलाल पुँजीले हैकम चलाउँछ । बिनापसिना, उत्पादनसँगको बिनासहकार्य दैनिक लाखौं गरिने हाम्रा नेता–कार्यकर्ताहरूको खर्चको स्रोत के हो ? हामीमाथि विरोधीले आक्रमण गर्ने हतियार यही हो,' उनले लेखेका छन् ।

अध्यक्ष दाहालको प्रतिवेदनले धरातलीय यथार्थ नबोकेको पनि न्यौपानेको फरक मतमा उल्लेख छ । 'यो प्रतिवेदन माथि-माथि उडान गरेको तर जमिनमा खुट्टा टेकेको छैन । जमिनमा खुट्टा टेकाउनका लागि नेपाली समाजको आजको चरित्र अथवा अन्तरविरोधहरू, वर्गहरूबीचको सम्बन्ध र संघर्ष, उत्पादन प्रणाली, उत्पादनका साधनमाथिको स्वामित्व र वितरण प्रणालीबारे अनिवार्य विश्लेषण हुनुपर्छ,' उनले लेखेका छन् ।

पढ्नुहोस् पूर्णपाठ :

प्रकाशित : पुस १५, २०७८ १६:३३
प्रतिक्रिया
पठाउनुहोस्

बाक्लो हिमपातका कारण सोलुखुम्बु–ओखलढुंगा सडक अवरुद्ध

भानुभक्त निरौला

सोलुखुम्बु — बुधबार बिहानदेखि लगातार परेको हिमपातका कारण हिमाली जिल्ला सोलुखुम्बुमा सवारी आवागमन प्रभावित बनेको छ । सिद्धिचरण राजमार्ग अन्तर्गत पर्ने ओखलढुंगा र सोलुखुम्बुको सिमानामा पत्ताले डाँडामा बाक्लो हिउँ जमेका कारण सडक यातायात ठप्प बनेको हो ।

पत्ताले बजारको सडकमा एक फिट भन्दा बढी बाक्लो हिउँ जमेपछि सवारीसाधन आहोरदोहोरमा समस्या उत्पन्न भएको हो ।

सोलुदुधकुण्ड नगरपालिका ८ मा पर्ने पत्ताले क्षेत्रको पत्ताले बजारदेखि ठाडेसम्म ७ किलोमिटर भन्दा बढी सडकमा हिउँ जमेकोले सवारी आवागमनमा समस्या भएको हो । ‘बिहानदेखि फाट्टफुट्ट बाहेक नियमित सवारीसाधानहरु कठमाडौं जान सकेका छैनन्,' जिल्ला ट्राफिक इन्चार्ज कृष्ण कटुवालले कान्तिपुरसँग भने, ‘यात्रु बोक्ने जिप एउटै पनि पत्तालेबाट पास हुन सकेका छैनन् ।’

सोलुखुम्बुबाट राजधानी र अन्य क्षेत्रका लागि न्युनतम दैनिक ३० वटाको संख्यामा जिप छुट्ने गरेका छन् । ‘आज एउटै पनि गाडी पत्ताले क्रस गर्न सकेनन्’ दुधकुण्ड यातायात समितिका काउण्टर इन्चार्ज छिरिङ तामाङले भने, ‘गन्तब्य तय गरेका सैयौं यात्रुहरु अलपत्र छन् ।’

पत्ताले क्षेत्रको सडक अवरुद्ध भएसँगै जिल्ला भित्रिने तथा बाहिरिने सवारीसाधनको लागि वैकल्पिक मार्ग नहुँदा जिल्लासँग सडक सम्बन्ध नै विच्छेद हुन पुगेको छ । जसका कारण यात्रुबाहक सवारीसाधनका अलावा खाद्यान्न ढुवानी र निर्माण सामाग्री बोक्ने मालबहाक गाडी पनि सीमामै अलपत्र परेका छन् । जिल्ला निर्माणाधिन आधा दर्जन भन्दा बढी ठूला जलविद्युत आयोजनालाई यसको प्रत्यक्ष असर परेको छ ।

अवरुद्ध सडक खुलाउनका लागि पहल भइरहेको स्थानीय प्रशासनले जनाएको छ । ‘सडकको हिउँ हटाउनका लागि सडक विभागबाट सानो स्काभेटर झिकाएर काम सुरु गरिएको छ,’ सोलुखुम्बुका प्रमुख जिल्ला अधिकारी गणेश विक्रम शाहीले भने । समुन्द्री सतहबाट ३ हजार मिटरको उचाइमा पर्ने उक्त सडक खण्डमा बर्सेनि हिमपातका कारण सडक अवरुद्ध हुने गर्दछ ।

प्रकाशित : पुस १५, २०७८ १६:३३
पूरा पढ्नुहोस्
प्रतिक्रिया
पठाउनुहोस्
×