संसद्, सरकार र न्यायपालिकाको अराजकता हामीले ल्याएका हौं भनेर स्वीकार गर्नुपर्छ : केसी - समाचार - कान्तिपुर समाचार

संसद्, सरकार र न्यायपालिकाको अराजकता हामीले ल्याएका हौं भनेर स्वीकार गर्नुपर्छ : केसी 

कान्तिपुर संवाददाता

काठमाडौँ — राष्ट्रिय जनमोर्चाका अध्यक्ष चित्रबहादुर केसीले संसद्, सरकार र न्यायपालिकामा जारी विवाद, अस्तव्यवस्तताको जिम्मेवारी राजनीतिक दलहरूले लिनुपर्ने बताएका छन् ।

देश अगाडि बढाउनका लागि राजनीतिक दलहरू एकजुट हुनुको विकल्प नभएको बताउँदै केसीले वर्तमान व्यवस्थाको जस लिने दलहरूले अव्यवस्थाको पनि जिम्मेवारी लिएर मिलेर अगाडि बढ्नुपर्ने बताए ।

एमालेको दसौं महाधिवेशनको उद्घाटन सत्रलाई शुक्रबार सम्बोधन गर्दै थापाले भने, 'गणतन्त्र, धर्म निरपेक्षता ल्याएको जस लिइरहेका छौं । अहिले संसद्को किचलो, कार्यकारिणी र न्याय पालिका भएको अस्तव्यवस्ता पनि हामीले गरेको हो भन्न सक्नुपर्‍यो ।'

अहिले राजनीतिक दलका कारण जनतामा नैराश्यता भइरहेको र मुलुकमा अराजकता भएको भन्दै केसीले ती सबैको जिम्मेवारी राजनीतिक दलहरूले लिनुपर्ने बताए ।

राजनीतिक दलहरूले एक-अर्कालाई अराजकताको जिम्मेवार भन्न नहुने पनि केसीको भनाइ थियो । राजनीति गर्ने व्यक्ति नसुध्रिइकन राज्य र जनताको स्वार्थलाई अगाडि राखेर राजनीति नगरे समस्या झन् बढ्ने उनले बताए ।

प्रकाशित : मंसिर १०, २०७८ १४:३५
प्रतिक्रिया
पठाउनुहोस्

ड्रोनबाट यस्तो देखियो एमाले महाधिवेशन

कान्तिपुर संवाददाता

काठमाडौँ — नेकपा (एमाले)को १० औँ महाधिवेशनको उद्घाटन सत्र सुरु भएको छ । चितवनको नारायणी नदी किनारमा १० औँ महाधिवेशनको उद्घाटन सत्रमा सरिक हुन देशभरबाट नारायणी नदी किनारमा महाधिवेशन पदाधिकारी, नेता तथा कार्यकर्ताहरुको ठूलो संख्यामा भीड लागेको छ ।

नेकपा एमालेको दशौं राष्ट्रिय महाधिवेशन पूर्वप्रधानमन्त्री तथा पार्टी अध्यक्ष केपी शर्मा ओलीले नेपालको राष्ट्रिय झन्डा, पार्टीको चिह्न तथा चुनाव चिह्न अंकित तीनवटा झन्डाहरू सँगै झन्डोत्तोलन गरेर उद्घाटन गरेका छन् ।उनले झन्डोत्तोलन गरे लगत्तै महाधिवेशनको मस्कटको पनि औपचारिक अनावरण गरेका थिए । मस्कट अनावरण गरेपछि ओलीले मञ्चको अघिल्तिर बसेका कार्यकर्ताहरुबाट अभिवादन समेत ग्रहण गरेका थिए ।

उद्धघाटन कार्यक्रममा भारतलगायत विभिन्न छिमेकी मुलुकबाट समेत प्रतिनिधिको सहभागिता रहेको छ । यस्तै, नेपाली कांग्रेसका सभापति एवं प्रधानमन्त्री शेरबाहदुर देउवा लगायत अन्य पार्टीका नेताहरुको समेत सहभागिता रहेको छ ।


प्रकाशित : मंसिर १०, २०७८ १४:३४
पूरा पढ्नुहोस्
प्रतिक्रिया
पठाउनुहोस्
×