राप्रपा अध्यक्षमा राजेन्द्र लिङ्देनको उम्मेदवारी घोषणा- समाचार - कान्तिपुर समाचार
राप्रपा महाधिवेशन

राप्रपा अध्यक्षमा राजेन्द्र लिङ्देनको उम्मेदवारी घोषणा

कान्तिपुर संवाददाता

काठमाडौँ — राष्ट्रिय प्रजातन्त्र पार्टी (राप्रपा) को आगामी महाधिवेशनमा पार्टी नेतृत्वलाई चुनौती दिने गरी नेताद्वय राजेन्द्रप्रसाद लिङ्देन अध्यक्षमा उम्मेदवारी घोषणा गरेका छन् ।

बिहीबार काठमाडौंमा एक कार्यक्रममा बीच राप्रपाका तर्फबाट एक मात्र प्रतिनिधिसभा सदस्य झापाका लिङ्देनले अध्यक्ष पदमा उम्मेदवारी दिने घोषणा गरेका हुन् । लिङ्देनलाई नेपालगन्ज उपमहानगरपालिकाका मेयर धवलशमशेर राणा, अभिनेत्री रेखा थापालगायतका नेताहरूको साथ रहेको छ ।

पार्टी स्थापनाकालदेखि नै नेतृत्व तहमा रहँदै आएका शीर्ष नेताहरूले आसन्न महाधिवेशनमा पनि अरूलाई अवसर नदिने संकेत गरेपछि लिङ्देन र राणाको समूह अघि सरेको हो । दुवै नेता दुई वर्षयता पार्टीमा जिम्मेवारीविहीन छन् । ‘प्यानल’ नै बनाएर महाधिवेशनमा जाने उनीहरूको योजना छ । यसअघि दुवै जना राप्रपाका तीन अध्यक्षमध्येका एक कमल थापानिकट थिए । अहिले राप्रपामा पशुपतिशमशेर राणा र प्रकाशचन्द्र लोहनी पनि अध्यक्ष छन् । तीनै जना यस पटक पनि अध्यक्षका दाबेदार हुन् ।

तस्बिर : मकर श्रेष्ठ

लिङ्देन राप्रपानिकट राष्ट्रिय प्रजातान्त्रिक विद्यार्थी संगठन (राप्रविसं) का संस्थापक अध्यक्ष पनि हुन् । राणा एमालेको राजनीतिबाट उदाएका युवा नेता हुन् । राणा २०५४ मा एमालेका तर्फबाट नेपालगन्ज नगरपालिकाका मेयर थिए । राजतन्त्रविरुद्ध एमालेसहितका दलहरू एकजुट भएपछि राणा पार्टी परित्याग गरी राप्रपामा लागेका हुन् । पछिल्लो पटक २०७४ को स्थानीय तह निर्वाचनमा राप्रपाले देशभर नराम्ररी पराजय व्यहोरेका बेला नेपालगन्ज उपमहानगरको मेयरमा राणा निर्वाचित भएका थिए ।

तस्बिरहरू : इलिट जोशी/कान्तिपुर

पार्टीले कांग्रेससँग तालमेल गरेर प्रतिनिधिसभा र प्रदेशसभाको चुनाव लडेका बेला लिङ्देन एमाले–माओवादी गठबन्धनसँग तालमेल गरेर प्रतिनिधिसभा सदस्यमा निर्वाचित भएका थिए । झापामा अरू निर्वाचन क्षेत्रमा एमालेलाई सहयोग गरेर लिङ्देनले क्षेत्र नम्बर ३ मा कांग्रेस नेता कृष्णप्रसाद सिटौलालाई पराजित गरेका थिए ।

काठमाडौंमा मंसिर १५–१७ मा हुने राप्रपाको एकता महाधिवेशनमा करिब ४ हजार ५ सय प्रतिनिधि छनोट भइसकेका छन् ।

प्रकाशित : मंसिर ९, २०७८ ११:४३
प्रतिक्रिया
पठाउनुहोस्

कांग्रेस महाधिवेशन : मोरङमा संस्थापन पक्ष कमजोर

१ क्षेत्रमा संस्थापन र बाँकी ५ क्षेत्रमा इतरपक्ष विजयी
विनोद भण्डारी

विराटनगर — कांग्रेसको १४ औ महाधिवेशनमा सभापतिका आकांक्षी शेखर कोइरालको गृहजिल्ला मोरङमा संस्थापन पक्ष कमजोर देखिएको छ । संघीय निर्वाचनको ६ वटा क्षेत्र रहेको मोरङमा एक क्षेत्रबाहेक संस्थापन पक्षले सबै क्षेत्रीय सभापतिसहित महाधिवेशन प्रतिनिधि पनि गुमाएको छ ।


संस्थापन पक्षले क्षेत्र नम्बर ५ मा सभापतिसहित महाधिवेशन प्रतिनिधिमा ७५ प्रतिशत जितेको छ । यो क्षेत्रमा क्षेत्रीय सभापति जीवक्ष गच्छदारसहित सबै महाधिवेशन प्रतिनिधि सर्वसम्मत चुनिएका थिए । यो क्षेत्र केन्द्रीय सदस्य अमृत अर्यालका हो । बाँकी ५ वटा निर्वाचन क्षेत्रमा संस्थापन पक्षले सभापति गुमाउँदै छिटफुट महाधिवेशन प्रतिनिधि जितेको छ । मोरङमा पूर्वमहामन्त्री कृष्ण सिटौला गुटका छिटपुट महाधिवेशन प्रतिनिधि निर्वाचित भएका छन् ।

कोइरालाको निर्वाचन क्षेत्र ६ मा संस्थापन पक्षका पाँच जना महाधिवेशन प्रतिनिधि निर्वाचित हुँदा पौडेल–कोइराला प्यानलले सभापति सहित २० जना महाधिवेशन जितेको छ । यो क्षेत्रमा क्षेत्रीय सभापति देवराज तामाङ विजयी भएका छन । क्षेत्र नं ३ मा सभापति गणेश खड्कासहित महाधिवेशन प्रतिनिधिमा पौडेल–कोइराला प्यानल नै विजयी भएका छन् । निर्वाचन क्षेत्र नम्बर १ मा लेटाङ नगर प्रमुख शंकर राई सर्वसम्मत भएका छन् । उनी पौडेल–कोइराला समूहका हुन । यो क्षेत्रमा महाधिवेशन प्रतिनिधिमा संस्थापन पक्षमा २५ र पौडेल कोइराला समूहका ७५ प्रतिशत छन् । यो क्षेत्र जिल्ला सभापति डिगबहादुर लिम्बुको क्षेत्र हो ।

त्यसैगरी रक्षामन्त्री मिनेन्द्र रिजालको क्षेत्र न २ मा पौडेल–कोइराला समूहका नागेश्वर सिंह क्षेत्रीय सभापतिमा निर्वाचित भएका छन् । यो क्षेत्रमा सिटौला समूहका एक र बाँकी सबै पौडेल–कोइराला समूहका महाधिवेशन प्रतिनिधि निर्वाचित भएका छन् ।

महेश आचार्यको क्षेत्र ४ मा मतगणना जारी छ । अन्तिम १ सय ३० मत गन्न बाँकी रहदा पौडेल समूहका विनोद बस्नेत सभापतिमा ५७ मतले अगाडि छन् । यो क्षेत्र संस्थापन पक्षबाट जिल्ला सभापतिका आकांक्षी दिलिप गच्छदारको पनि क्षेत्र हो । उनी महाधिवेशन प्रतिनिधिमा अग्रस्थानमा छन् । यो क्षेत्र महानगर प्रमुख भीम पराजुली र उपप्रमुख इन्दिरा कार्कीको पनि हो । उनीहरु पनि महाधिवेशन प्रतिनिधिमा विजयीउन्मुख छन् ।

कांग्रेस निर्वाचनमा प्रदेश नम्बर १ का प्रदेश सांसदसहित पूर्वमन्त्री र चर्चित नेताहरु समेत पराजित भएका छन् । प्रदेश सांसदहरु बिन्दिया कार्की, शेखरचन्द्र थापा र शान्ता पौडेल पराजित भएका छन् । नेतृ मृदुला कोइराला, नेविसंघका पूर्वनेता बाबुराम कोइराला, दीपक लोहनी, महिला संघ मोरङकी सचिव प्रमिला थापा र तरुण दलका पूर्वकेन्द्रीय सदस्य दामोदर कोइरालालगायत महाधिवेशन प्रतिनिधिमा पराजित भएका छन् ।

प्रकाशित : मंसिर ९, २०७८ ११:३६
पूरा पढ्नुहोस्
प्रतिक्रिया
पठाउनुहोस्
×