उपत्यकामा सामान्य वार्डमा भर्ना हुने संक्रमितको संख्या घट्यो, आईसीयूमा चाप उस्तै- समाचार - कान्तिपुर समाचार
कान्तिपुर वेबसाईट
AdvertisementAdvertisement

उपत्यकामा सामान्य वार्डमा भर्ना हुने संक्रमितको संख्या घट्यो, आईसीयूमा चाप उस्तै

बाहिरी जिल्लाबाट रिफर भएर आउने संक्रमित बढे
बुनु थारु

काठमाडौँ — उपत्यकामा कोरोना संक्रमितको संख्या घट्दै गएपछि अस्पतालमा पनि चाप कम हुँदै गएको छ । कुनैबेला बेड अभावमा अस्पताल परिसरमै बिरामी राखेर उपचार गर्न बाध्य अस्पतालहरुको अवस्था अहिले फरक भएको छ ।

टेकुस्थित शुक्रराज ट्रपिकल तथा सरुवा रोग अस्पतालका निर्देशक डा. सागर राजभण्डारीले १ हप्ता यता कोभिड बिरामीको संख्या कम हुँदै गएको बताए । ‘बिरामीको संख्या केही घटेको भने हो,’ उनले भने, ‘आँगनमा राखेर उपचार गर्ने बाध्यता कम भएको छ । यसका साथै पीसीआर गराउन आउनेको संख्यामा पनि उल्लेखनीय रुपमा कमी आएको छ । हाललाई बेड पुगेको छ ।’

डा. राजभण्डारीका अनुसार सामान्य वार्डमा बसेर उपचार गराउने बिरामीकोे संख्यामा कमी आएपनि आईसीयु तथा भेन्टिलेटरमा उपचार गराउनेको चाप उस्तै रहेको छ । ‘अहिले पनि हामीकहाँ आईसीयू फूल नै छ । बाहिरी जिल्लाबाट रिफर भएर आउने सिकिस्त बिरामी भने बढेका छन्,’ डा. राजभण्डारीले भने ।

उनका अनुसार हाल अस्पतालमा काठमाडौं उपत्यकाका बिरामीहरु कमै मात्र आएका छन् । ‘अहिलेको अवस्था हेर्दा काठमाडौं उपत्यकामा संक्रमणको दर घटेको देखिन्छ,’ उनले भने, ‘यहाँ संक्रमण नियन्त्रण भएको देखिन्छ । उपत्यका बाहिरका समुदायमा संक्रमण बढिसक्यो । त्यसैले उताबाट धेरै बिरामी रिफर भएर आएका छन् ।’

धादिङ, सर्लाही ,सिन्धुली, नवलपरासी, उदयपुर, रसुवा, खोटाङ, दाङ, काभे्र लगायतका स्थानहरुबाट गम्भिर प्रकृतिका बिरामीहरु भने आइरहेको डा. राजभण्डारीले बताए । उनले परीक्षण नै नगरी होमआइसोलेसनमा बसेका बिरामीहरु पनि उपचारका लागि आएको बताउँदै गाउँमै आरडिटी गर्ने र सिकिस्त भएपछि उपचारका लागि काठमाडांै आउने गरेको दाबी गरे ।

स्वास्थ्य तथा जनसंख्या मन्त्रालयले वेबसाइटमा राखेको तथ्यांक अनुसार काठामाडौं उपत्याकामा विगत जेठ १३ गते यता संक्रमित हुनेको संख्या १९ हजार ९ सय ९७ रहेको छ । जबकी वैशाख २९ देखि जेठ १२ गतेसम्म मात्रै उपत्यकामा कुल ४२ हजार ३ सय ८ जना संक्रमित फेला परेको जानकारी साइटमा उपलब्ध छ । काठमाडौं उपत्यकासँग सीमा जोडिएका जिल्लाहरुमा पनि विगत केही समय यता संक्रमितको संख्या घटेको देखिएपनि परीक्षण निकै कम हुनुका साथै त्यहाँ समुदायमा नै संक्रमण फैलिएको अनुमान विज्ञहरुले गरेका छन् ।

सशस्त्र प्रहरी बल अस्पताल बलम्बुका फोकल पर्सन डा. प्रविन नेपालले पनि हालको अवस्था हेर्दा रामेछाप, रोल्पा, रुकुम, मकवानपुर, दोलखा लगायतका जिल्लाहरुबाट बिरामीहरु रिफर भएर आइरहेका छन् । ‘हामीले अहिलेसम्म उच्च संख्यामा राखेको बिरामीको संख्या २०० हो । १३० को हाराहारीमा बिरामी अहिले भर्ना रहेका छन्,’ उनले भने, ‘एक हप्ता यता बिरामीको संख्या कम हुँदै गएको छ ।’ उनले पहिलेको तुलनामा ननकोभिडका बिरामी पनि उपचारका लागि आउने संख्या बढिरहेको बताएपनि आईसीयू तथा भेन्टिलेटरमा बिरामीको चाप रहेको बताए ।

वैशाख महिनामा नेपालमा कोरोना संक्रमणको दोस्रो लहर उच्चतम विन्दुमा पुगेको समयमा २०० जनासम्म संक्रमित भर्ना गरेर उपचार गरेको वीर अस्पतालका फोकल पर्सन डा. अच्युत कार्की दाबी गरे । उनका अनुसार अहिले एक साता यता वीरमा औसतमा१२० जना बिरामीमात्रै भर्ना भएर उपचार सेवा लिइरहेका छन् । ‘समुदायमा अझै धेरै परीक्षण बढाएर लाने हो भने संख्यामा कमी आउने देखिन्छ,’ उनले भने, ‘आईसीयू र एचडीयूमा बिरामीहरु नघटेपनि अक्सिजन चाहिने बिरामी भने घटेको छ ।’

त्रिवि शिक्षण अस्पतालका फोकल पर्सन राम विक्रम अधिकारीले केही समय पहिला कोभिड इमरजेन्सीमा दैनिक ३० देखि ४० जनासम्म बिरामी आउँदा बाहिर उपचार गर्नुपर्ने अवस्था अहिले हटेको छ । ‘संक्रमा पिकमा पुगेको बेला जनरल बेडमापनि कोरोनाका बिरामी राखेर उपचार गरेका थियौँ । ४०० भन्दा बढी बिरामीहरु उपचार भएकोमा आजको तथ्यांक हेर्दा १६२ जना उपचाररत रहेका छन्,’ उनले भने, ‘आईसीयूमा भने बिरामी छन् ।’ उनका अनुसार अस्पतालमा म्यूक्रो माइक्रोसिसका ६ जना उपचार गराएकोेमा एक जनाको मृत्यु समेत भएको छ ।

निजीमा पनि बिरामीको संख्या घट्दै
ठूलो सरकारी अस्पतालमा मात्रै नभएर कोभिड बिरामी उपचार गर्ने निजी अस्पतालहरुमा पनि बिरामीको चाप कम हुँदै गएको छ । तर, निजी अस्पतालका सघन उपचार कक्ष तथा भेन्टिलेटरमा उपचाररत बिरामीको संख्यामा भने कमि आएको छैन ।

नेपाल मेडिसिटी अस्पतालका सुपरिटेन्डेन्ट डा. राज रानाले विगत १५ दिनको तुलनामा अहिले आएर १० देखि १५ प्रतिशतसम्म बिरामीको संख्यामा कमी आएको बताए । ‘सिकिस्त बिरामीको संख्या आईसीयूमा उस्तै रहेपनि अरु सामान्य वार्डमा भर्ना हुने बिरामीमा कमी आएको छ,’ उनले भने । उनका अनुसार जनकपुर, भैरहवा लगायत जिल्लाबाट सिकिस्त बिरामीहरु एम्बुलेन्स तथा हेलिकप्टरबाट उपचारका लागि अस्पताल आइरहेको बताए ।

ह्याम्स अस्पतालका निर्देशक डा ज्योतिन्द्र शर्माका अनुसार पनि साता–दश दिनको अवस्था हेर्दा फिभर क्लिनीक, वार्ड तथा इमरजेन्सीमा आउने बिरामी संख्या घटिरहेको छ । तर उनले पनि आईसीयू चाहिने बिरामीको संख्यामा भने खासै कमी नआएको बताए । डा. ज्योतिन्द्रले संक्रमण पिकमा पुगेको बेलामा व्यवस्थापन मिलाउन एकदम गाह्रो भएको बताउँदै हाल भने अस्पताल आउने बिरामीको चाप धान्नका लागि समस्या नरहेको जानकारी दिए । ९० जनासम्म भर्ना गरेर उपचार गरेको यस अस्पतालमा बिहीबार भने ४० जना कोरोना संक्रमित उपचाररत छन् ।

संक्रमण उच्चतम विन्दुमा पुगेको समयमा ६० जना बढी कोरोना संक्रमित भर्ना गरेर उपचार गर्ने स्टार अस्पतालमा हाल सरदर २५ देखि ३० जनाको बिरामीहरु उपचाररत छन् । अस्पतालका निर्देशक डा. शैल रुपाखेतीले पोजिटिभिटी रेट घट्दै गएकोले बिरामीको संख्या अस्पतालमा घट्दै गइरहेको सुनाए । ‘हाम्रोमा मात्र होइन होला अरुको पनि संख्या घट्दै गएको हुनुपर्छ,’ उनले भने ।

प्रकाशित : जेष्ठ २७, २०७८ १९:०९
प्रतिक्रिया
पठाउनुहोस्

प्रदेश १ को नीति तथा कार्यक्रम स्वास्थ्य क्षेत्रमा केन्द्रित [पूर्णपाठ]

देवनारायण साह

मोरङ — प्रदेश १ सरकारले स्वास्थ्य क्षेत्रलाई प्राथमिकतामा राखेर आर्थिक वर्ष २०७८/७९ को नीति तथा कार्यक्रम ल्याएको छ । विगतका नीति तथा कार्यक्रमलाई निरन्तरता दिँदै थप नयाँ कार्यक्रमहरुसमेत ल्याएको हो ।

प्रदेशसभामा बिहीबार प्रदेश प्रमुख सोमनाथ अधिकारीले प्रस्तुत गरेको नीति तथा कार्यक्रममा जनस्वास्थ्य, अस्पताल, स्वास्थ्य केन्द्र, सरसफाई र पोषणसँग सम्बन्धित कार्य प्रदेश सरकारको मुख्य प्राथमिकता रहेको उल्लेख छ ।

प्रदेश सरकार गठन भएपछि मुख्यमन्त्री शेरधन राई नेतृत्वको सरकारले ल्याउन लागेको पूरकसहित पाँचौ नीति तथा कार्यक्रममा कोभिड प्रतिकार्यमा संलग्न स्वास्थ्यकर्मी लगायत सुरक्षा निकायका राष्ट्रसेवकहरुको मनोबल अभिवृद्धि गर्न अतिरिक्त पारितोषिकको व्यवस्था गरिने उल्लेख छ । ‘गुणस्तरीय स्वास्थ्य सेवा प्रदेश सरकारको प्रतिबद्वता’ मूल नारासहित प्रदेशमातहतका सबै अस्पतालहरुको गुरुयोजना तयार गरी अक्सिजन प्लान्ट, सघन उपचार कक्ष निर्माण, विशेषज्ञ चिकित्सक तथा स्वास्थ्यकर्मी, आवश्यक औजार तथा यन्त्रउपकरण र भौतिक पूर्वाधारको व्यवस्था गर्ने नीति तथा कार्यक्रममा भनिएको छ ।

‘मेची अस्पताललाई २०० शय्या, धनकुटा र पाँचथर जिल्ला अस्पताललाई १००/१०० शय्या र अन्य जिल्ला अस्पताललाई न्युनतम ५० शय्यामा स्तरोन्नति गरिनेछ,’ नीति तथा कार्यक्रममा भनिएको छ, ‘विपन्न तथा गरिब वर्ग र असहायहरुको स्वास्थ्य उपचारको लागि एक उपचार कोषको स्थापना गरिनेछ ।’ उलाबारीको मंगलबारेस्थित मदन भण्डारी अस्पताल तथा ट्रमा सेन्टरलाई स्तरोन्नति गरि प्रभावकारी सेवा सञ्चालन गरिने नीति लिएको छ ।

प्रदेशका प्रमुख स्थानमा रहेका अस्पताललाई विस्तार गरी रेफरल अस्पतालको रुपमा विकास गरिने, जिल्ला अस्पताल र रेफरल अस्पताल मार्फत टेली–मेडिसिन सेवा सुरु गरिने उल्लेख छ ।

पूर्वाञ्चल आयुर्वेद चिकित्सालयलाई प्रादेशिक अस्पतालको रुपमा विकास गरी सेवा विस्तार गरिने, जिल्ला आयुर्वेद स्वास्थ्य केन्द्र तथा औषधालयलाई क्रमिक रूपमा आर्युवेद अस्पतालमा स्त्तरोन्नति गरिने नीति लिएको छ । प्रदेश सरकारद्वारा सञ्चालित कोसी कोभिड उपचार केन्द्रलाई कोभिडको पुर्ण रोकथाम र नियन्त्रण पश्चात प्रादेशिक प्रसूति तथा स्त्रीरोग अस्पतालमा रुपान्तरण गरिने नीति तथा कार्यक्रममा उल्लेख छ । ‘व्यावसायिक शिक्षा र तालिमको प्रादेशिक नीति, कानुन तथा निर्देशिकाहरु तयार गरी लागू गरिनेछ,’ नीति तथा कार्यक्रममा भनिएको छ, ‘प्रादेशिक पाठ्यक्रम विकास केन्द्र स्थापना गरी प्रदेशको विशेषता र आवश्यकता अनुरूपका पाठ्यक्रम निर्माण गरिनेछ ।’ विद्यालय नर्सिङ शिक्षालाई १४ वटै जिल्लामा विस्तार गरिने, पछाडि परेका वर्ग र समुदायका जेहन्दार विद्यार्थीलाई दिइने गरेको छात्रवृत्तिलाई निरन्तरता दिइनेछ ।

भाषा आयोगसँगको समन्वय र सहकार्यमा प्रदेशमा प्रचलित भाषाहरूको अभिलेख व्यवस्थापन, संरक्षण तथा प्रचार गरिनेछ । प्रदेश प्रमुख जेष्ठ नागरिक दन्त उपहार कार्यक्रम, ज्येष्ठ नागरिक तीर्थाटन, स्वास्थ्य परीक्षण तथा आँखा उपचार कार्यक्रमलाई निरन्तरता दिइने उल्लेख छ ।

अति विपन्न समुदायबाट समाजमा महत्वपूण योगदान गरेका आमाहरुलाई सम्मान गर्न राष्ट्रपति आमा सम्मान कार्यक्रमका साथै सासू बुहारी सम्मान तथा पुरस्कार कार्यक्रम सञ्चालन गरिने नीतिमा उल्लेख छ ।

प्रदेश खेलकुद बोर्ड गठन गरी यस क्षेत्रको व्यावसायिक उन्नतिलाई सहयोग गरिने, प्रदेशका सबै माध्यमिक विद्यालयमा स्काउटको कार्यक्रम सञ्चालन गरिने, मुख्यमन्त्री कप तथा राष्ट्रिय लिग फुटबल प्रतियोगितालाई निरन्तरता दिइने नीति तथा कार्यक्रममा उल्लेख छ ।

यस्तो छ पूर्णपाठ :

प्रकाशित : जेष्ठ २७, २०७८ १८:३२
पूरा पढ्नुहोस्
प्रतिक्रिया
पठाउनुहोस्
×