नेपालगन्ज — बाँकेमा कोरोना संक्रमितको संख्या दिन प्रतिदिन बढ्न थालेपछि घरमै आइसोलेसन बस्नेहरुको संख्या बढ्न थालेको छ । हाल नेपालगन्ज उपमहानगरपालिकामा दुई हजार ३६६ जना घरमै आइसोलेसनमा बसेको सम्पर्क व्यक्ति राजन शाहीले बताए ।

नेपालगन्ज उपमहानगरपालिकाका २३ वटा वडामध्ये वडा नम्बर १० मा सबैभन्दा बढी ६५० जना घरमै आइसोलेसनमा बसेका छन् । नेपालगन्ज उपमहानगरपालिकाले सामान्य लक्षणसहितका बिरामीलाई ह्वाइट हाउसस्थित आइसोलेसनमा राख्ने व्यवस्था गरिएको छ भने रामलिला मैदानस्थित तालिम केन्द्रमा अक्सिजन सहितको आईसोलेसन केन्द्र सञ्चालनमा छ ।

घरमै आइसोलेसनमा बसेकाहरुलाई सुरुमा सम्पर्क व्यक्तिले स्वास्थ्य अवस्थाबारे जानकारी लिने र पछि पनि समय समयमा परामर्शको काम गर्दै आएको स्वास्थ्य शाखा प्रमुख रामबहादुर चन्दले बताए । ‘घरमै बसेकाहरुलाई वडाकै स्वास्थ्यकर्मीले फलोअप गर्नुहुन्छ,’ उनले भने, ‘समस्या गम्भीर भएमा कोभिड वार्डमा रिफर गर्छौं ।’