नेपालमा रूसी खोप स्पुतनिक-५ लाई आपत्कालीन प्रयोगको अनुमति
काठमाडौँ — नेपालमा रुसले बनाएको कोरोना खोपलाई आपत्कालीन अनुमति दिइएको छ । मंगलबार औषधि व्यवस्था विभागले रूसको गामेलया रिसर्च इन्स्टिच्युट अफ इपिडिमियोलोजी एन्ड माइक्रोबायोलोजीले विकास गरेको कोरोना खोप स्पुतनिक–५लाई आपत्कालीन अनुमति दिएको हो ।
स्पुतनिक-५ खोप ९१.६ प्रतिशतसम्म प्रभावकारी देखिएको दाबी गरिएको छ । उक्त खोप २ देखि ८ डिग्री सेल्सियस तापक्रममा सुरक्षित तरिकाले भण्डारण गर्न सकिने पनि कम्पनीले जनाएको छ । नेपालमा स्पुतनिक खोप आयातका लागि लोमस फर्मास्युटिकल्सलाई अनुमति दिइएको विभागका प्रवक्ता सन्तोष शर्माले जानकारी दिए ।
नेपालले यसअघि अक्सफोर्ड-एस्ट्राजेनेकाको सहयोगमा भारतीय कम्पनी सिरम इन्स्टिच्युटले बनाएको 'कोभिसिल्ड', भारत बायोटेकले बनाएको 'कोभ्याक्सिन' र चीनको सिनोफार्मअन्तर्गतको बेइजिङ इन्स्टिच्युट अफ बायोलोजिकल प्रोडक्टस कम्पनी लिमिटेड (बीआईबीपी) ले उत्पादन गरेको 'भेरोसेल' खोपलाई अनुमति दिइसकेको छ ।
केही दिनअघि मात्रै भारतले पनि रुसमा विकसित स्पुतनिक–५ खोपलाई आपतकालीन प्रयोगका लागि अनुमति दिएको थियो ।
