काठमाडौँ — बुधबारको प्रतिनिधिसभा बैठकमा नेकपा एमाले र नेकपा माओवादी केन्द्रका सांसदहरू अलगअलग बस्ने भएका छन् । संसद् सचिवालयका अनुसार एमाले र माओवादी केन्द्रका सांसदहरूलाई सत्तापक्षकै लहरमा अलग–अलग बस्ने गरी व्यवस्था मिलाइएको हो ।

संसद् सचिवालयका प्रवक्ता रोजनाथ पाण्डेले भने, ‘आजदेखि उहाँहरू नेकपा एमाले र नेकपा माओवादी केन्द्रका रूपमा संसद्‍मा उपस्थित हुनुहुन्छ । उहाँहरू सत्ता पक्षमै बस्ने भए पनि अलगअलग बस्ने व्यवस्था गरिएको छ ।’

२३ गतेदेखि सुरु भएको संसद् अधिवेशन त्यस दिन कांग्रेसको अवरोध र साबिकको नेकपाका दाहाल–नेपाल समूहको बहिष्कारका कारण प्रभावित भएको थियो । बुधबार १ बजेदेखि पुन: संसद् बैठक बस्दै छ । सर्वोच्च अदालतको आइतबारको फैसलासँगै नेकपा एकता खारेज भएको ठहर भएपछि नेकपा एमाले र नेकपा माओवादी केन्द्र पूर्ववत् अवस्थामै फर्किएका हुन् ।