अँध्यारा कोठामा बुनिएका तानाबानाले सरकार ढल्दैन : अर्थमन्त्री पौडेल- समाचार - कान्तिपुर समाचार
कान्तिपुर वेबसाईट
AdvertisementAdvertisement

अँध्यारा कोठामा बुनिएका तानाबानाले सरकार ढल्दैन : अर्थमन्त्री पौडेल

सन्जु पौडेल

तिलोत्तमा — अर्थमन्त्री विष्णुप्रसाद पौडेलले अहिलेको सरकार नै लोकतन्त्रको रक्षा गर्ने सरकार भएको बताएका छन् ।

बिहीबार रुपन्देहीको तिलोत्तमा नगरपालिकाको प्रशासनिक भवनको उद्घाटन गर्दै उनले मध्यरातमा अँध्यारा कोठामा बुनिएका तानाबानाले सरकार ढाल्न नसक्ने बताए ।

‘आफ्नै पार्टी फुटाएर, कहिले कांग्रेस त कहिले जनता समाजवादीका नेता भेट्ने र आफ्ना समर्थनमा सरकारमा बसिदिन आग्रह गर्नेहरु सफल हुँदैनन्’, उनले भने, ‘जनताले साथ दिएको केपी शर्मा ओली नेतृत्वको सरकार नै हरेक तरिकाबाट लायक सरकार हो ।’ उनले अप्राकृतिक ढंगबाट सरकारलाई गिराउने काम गर्नेहरुले सरकारको विकासका योजनामा असर नगर्ने बताए ।

विकासका योजनामा धेरै काम गर्न बाँकी रहेको भन्दै पौडेलले विकासमा अघि बढ्नका लागि विकासको सपना देख्नुपर्ने बताए । उनले सपनलाई योजनामा ढालेर कार्यान्वयन गर्नका लागि सरकार हरदम प्रयासरत रहेको पनि बताए । विकासदेखि हरेक सन्दर्भमा गुणात्मक काम भइरहेको र काम गरेको देख्न नसक्नेहरुले धारिलो प्रहार गरे पनि असफल भएको उनले बताए ।

लोकतन्त्रको स्थापना भएपछि जनता नै सर्वव्यापी भएको सन्दर्भमा अहिलेको सरकार जनताको फैसलालाई सर्वस्व मानी अघि बढेको उनले बताए । ‘राजाको शासन फालेर जनतालाई नै शासनको जिम्मेवारी दिएका हौं’, उनले भने, ‘जनतालाई केन्द्र भागमा राखेर प्रधानमन्त्री नेतृत्वको पार्टीले काम गरिरहेको छ ।’ बाहिरदेखि सरकारलाई ढलाउने प्रयास भइरहे पनि जनताले रुचाएको वर्तमान सरकार पछि नहट्ने पौडेलको भनाइ थियो । विकास, स्वास्थ्य, शिक्षा लगायत हरेक क्षेत्रमा वर्तमान सरकार अन्तर्राष्ट्रिय मुलुककै गतिमा अघि बढेको पौडेलको दाबी गरे ।

प्रकाशित : फाल्गुन २०, २०७७ १६:३४
प्रतिक्रिया
पठाउनुहोस्

अब सत्तामा रमाउँदा कांग्रेसलाई घाटा : पौडेल

नारायण शर्मा

नवलपरासी — दुई/चार महिनाका लागि सत्तामा रमाउँदा कांग्रेसलाई घाटा हुने वरिष्ठ नेता रामचन्द्र पौडेलले बताएका छन् । 'जनादेश कांग्रेसलाई प्रतिपक्षमा रहने भन्ने नै छ । अहिले सत्तामा गएर रमाउँदा दीर्घकालीन रुपमा पार्टीलाई घाटा हुन्छ । अर्को निर्वाचनलाई ध्यान दिएर कांग्रेसले सोच्न पर्छ,' नेपाली कांग्रेस पूर्वी नवलपरासीद्वारा कावासोतीमा बिहीबार आयोजित कार्यकर्ता भेटघाटमा बोल्दै पौडेलले भने, 'मिलिजुली सरकारमा गएर जनताको पक्षमा कति परिणाममुखी काम गर्न सकिन्छ भनेर सोच्ने बेला हो ।' 

'कांग्रेस सत्तामा नगएर अब बन्ने सरकारले जनताका पक्षमा यो यो काम गर भनेर कम्युनिष्टसँग सहमति गरेर उनीहरुलाई सरकार चलाउन दिँदा पार्टीलाई फाइदा हुन्छ', पौडेलले भने, 'अहिलेको सरकारले सरकारी कर्मचारीतन्त्र तलदेखि माथिसम्म एकलौटी बनाएर बिगारेको छ, यस्तो बेलामा सरकारमा गएर जनताको पक्षमा परिणाम दिन सकिँदैन ।'

पौडेलले पार्टी सभापति शेरबहादुर देउवा तर्फ इंगित गर्दै अगाडि भने, 'प्रधानमन्त्री हुनैका लागि जाने र झन्डा हल्लाएर रमाउने हो भने अर्को कुरा हो । नत्र जनताको पक्षमा कति काम गर्न सकिन्छ भनेर सोच्ने उपयुक्त बेला यही हो ।' सिद्धान्त र नीतिविहीन झण्डै दुई तिहाइको कम्युनिष्ट सरकारले जनताको पक्षमा काम गर्न नसकेका कारण जनाता कांग्रेसमा गोलबद्ध हुन चाहेको परिस्थितिको सही मूल्यांकन गर्ने बेला भएको उनले दोहोर्‍याए ।


प्रकाशित : फाल्गुन २०, २०७७ १६:३२
पूरा पढ्नुहोस्
प्रतिक्रिया
पठाउनुहोस्
x
×