भागरथीको बलात्कार तथा हत्याका अभियुक्तलाई ५ दिन म्याद थप गरेर अनुसन्धान गर्न अदालतको अनुमति- समाचार - कान्तिपुर समाचार

भागरथीको बलात्कार तथा हत्याका अभियुक्तलाई ५ दिन म्याद थप गरेर अनुसन्धान गर्न अदालतको अनुमति

तृप्ति शाही

बैतडी — भागरथी भट्टको बलात्कार तथा हत्या प्रकरणमा पक्राउ परेका उनका छिमेकी १६ वर्षका किशोरलाई ५ दिन म्याद थप गरेर अनुसन्धान अगाडि बढाउन अदालतले प्रहरीलाई अनुमति दिएको छ ।

हत्या आरोपीलाई ५ दिन म्याद थप गरेर अनुसन्धान गर्न बुधबार जिल्ला अदालत बैतडीले अनुमति दिएको प्रदेश प्रहरी प्रमुख डीआईजी उत्तमराज सुवेदीले जानकारी दिए ।

बुधबार दिउँसो २ बजे जिल्ला प्रहरी कार्यालयमा पत्रकार सम्मेलन गर्दै प्रहरीले अभियुक्तलाई सार्वजनिक गरेको हो । आरोपित किशोर भागरथी पढ्ने सनातन धर्म माविमा कक्षा ११ अध्ययनरत छन् ।

भागरथीका दाइ केशवराज भट्टले बुधबार बिहान आरोपीविरुद्ध किटानी जाहेरी दर्ता गराएका थिए । 'अभियुक्तले आफूले हत्या गरेको बयान स्वीकारिसकेका छन्,' डीआईजी सुवेदीले भने,'घाँटी थिचेर मारेको बयान दिए पनि हत्या गर्नुको कारण उनले भनेका छैनन् । उनलाई आजै अदालतमा उपस्थित गराएका छौं । अदालतले ५ दिन म्याद थप गरेको छ ।'

आरोपीलाई प्रहरीले मंगलबार साँझ उनको घरबाटै नियन्त्रणमा लिएको थियो ।

दोगडाकेदार गाउँपालिका–७ चडेपानीकी १७ वर्षीया किशोरी भागरथीको शव माघ २२ गते खोचलेक–चडेपानी ग्रामीण सडकखण्डको लवलेक जंगलमा सडकबाट १ सय मिटर तल झाडीमा फेला परेको थियो । वडा नम्बर ३ स्थित सनातनधर्म माविमा कक्षा १२ मा अध्यनरत उनी २१ गते बिहान १० बजे विद्यालय गएकी थिइन् । त्यही दिन बेपत्ता भएकी उनको भोलिपल्ट शव भेटिएको थियो ।

प्रकाशित : फाल्गुन ५, २०७७ १५:१८
प्रतिक्रिया
पठाउनुहोस्

प्रदेशसभाको बैठक नराख्‍नु संघीयतामाथिको प्रहार : दाहाल–नेपाल समूह

सुवास विडारी

मकवानपुर — वाग्मती प्रदेशमा मुख्यमन्त्री डोरमणि पौडेलविरुद्ध अविश्वासको प्रस्ताव दर्ता गराएको दाहाल–नेपाल समूहले प्रदेशसभाको बैठक पटक/पटक सूचना टाँसेर स्थगित गर्नुलाई संघीयताको मर्ममाथिको प्रहारको रुपमा टिप्पणी गरेको छ ।


सभामुख सानुकुमार श्रेष्ठले बुधबार दिउँसो २ बजेका लागि बोलाइएको प्रदेशसभाको बैठक बिहान ६:३५ बजे सूचना टाँसेर स्थगित गरेको विषयमा दाहाल–नेपाल समूहले प्रदेशसभा सचिवालयमा पत्रकार सम्मेलन गरेर विरोध जनाएको हो । 'अल्पमतमा रहेको सरकारको दबाबमा आएर सभामुखले प्रदेशसभाको बैठक पटक/पटक स्थगित गर्नु संघीयता मर्ममाथिको प्रहार हो । तत्काल अर्को बैठक बोलाएर अविश्वासको प्रस्तावको टुंग्याउन जरुरी रहेको छ, ' नेतृ अष्टलक्ष्मी शाक्यले भनिन्,' अविश्वासको प्रस्ताव नटुंगिएसम्म अन्य विधेयकहरु सदनमा ल्याउन नमिल्ने भएका कारण सदन अवरुद्ध गरे जस्तो देखिएको छ ।' उनले लामो समयसम्म प्रदेशसभा सञ्चालन नहुँदा सांसदहरुले विजनेशविहीन हुनुपरेको टिप्पणी गरे ।

उनले अल्पमतमा रहेको सरकारको संरक्षण नगर्न र दबाबमा नपरी तत्काल बैठक बोलाउन समेत सभामुख श्रेष्ठलाई आग्रह गरिन् । मंगलबार दाहाल–नेपाल समूहको दबाब र सर्वदलीय बैठकपश्चात् प्रदेशसभा सञ्चालन गर्ने प्रतिबद्धता जनाएका सभामुख श्रेष्ठले सत्तापक्षको दबाबका कारण पुन: बैठक स्थगित गरेको उनको टिप्पणी छ ।

यसअघि माघ १९ गतेका लागि तय भएको बैठक मुख्यमन्त्रीको दबाबमा अघिल्लो राति सूचना जारी गर्दै सभामुख श्रेष्ठले फागुन ५ गतेसम्मका लागि स्थगित गरेका थिए । पुस १० गते प्रदेशसभामा दर्ता भएको अविश्वासको प्रस्ताव माघ ९ गते प्रदेशसभामा टेबुल भएको थियो ।

प्रकाशित : फाल्गुन ५, २०७७ १४:३२
पूरा पढ्नुहोस्
प्रतिक्रिया
पठाउनुहोस्
×