भाषणमा पटक-पटक फेक न्युजको सहारा - समाचार - कान्तिपुर समाचार

भाषणमा पटक-पटक फेक न्युजको सहारा 

प्रधानमन्त्री ओलीले पटक पटक आफूइतरका नेताले भन्दै नभनेको र फेक न्युज भनेर पुष्टि भइसकेको झूटको सहारा लिएर लाञ्छना लगाइरहेका छन्
जनकराज सापकोटा

काठमाडौँ — विभाजित नेकपाको ओली समूह निकट पत्रकारहरुको संगठन प्रेस संगठन नेपालको दोस्रो राष्ट्रिय भेलामा प्रधानमन्त्री केपी शर्मा ओलीले आफूइतर समूहकालाई कटाक्ष गर्न फेक न्यूजको सहारा लिए ।

प्रधानमन्त्री केपी शर्मा ओली । फाइल तस्बिर ।

उनले दाहाल–नेपाल समूहका नेता भिम रावलतिर संकेत गर्दै उनले महिलाको किड्नी राखेका कारण दिमाग खुस्कियो भनेर भनेको आरोप लगाउँदै भने, ‘महिलामाथि कत्रो अपमान । लेख्या छन डा. !’

प्रधानमन्त्रीले आफूइतरका नेताले भन्दै नभनेको र फेक न्युज भनेर पुष्टि भइसकेको यही झूटको सहारा लिएर लाञ्छना लगाउने काम १९ पुसमा कार्की ब्याङ्क्वेटमा आयोजित अनेरास्ववियुको कार्यक्रममा पनि गरेका थिए । ओलीकै शैली पछ्याउँदै २३ पुसमा राष्ट्रिय सभाको बैठकमा विमला पौडेलले पनि फेक न्युजलाई पत्याउँदै भाषण ठोकेकी थिइन् । उक्त दिन उनले महिलाको अंग परेको कारण प्रधानमन्त्रीको दिमाग खुस्किएको छ भनेर एकजना माननीयले भनेको भन्दै भाषण सुरु गरिन् । उनले यस्तो कसले भन्यो भनेर नाम त तोकिनन् तर उनले अन्तिममा भनिन, ‘मेरो अनुरोध छ नेताज्यूहरुलाई बोल्दा खेरी राजनीतिक संस्कार सम्झेर बोल्नुस् । होइन भने राजनीति छोडदिनुस् ।’

पौडेलले संकेत गर्न खोजेका माननीय थिए, नेकपाका दाहाल–नेपाल समूहका भिम रावल । १३ पुसमा नै रावलले धनगढीमा आयोजित एक कार्यक्रममा बोलेको अभिव्यक्तिलाई तोडमोड गरी एक अनलाइनले समाचार राखेपछि त्यो भाइरल भएको थियो । ओलीको शरीरमा स्त्रीको अंग मिसिएको हुँदा दिमागले काम गरेन भनेर रावलले बोलेको भन्दै केही अनलाइनले समाचार सार्वजनिक गरेका थिए । तिनै समाचारमा विश्वास मान्दै रावलप्रति सामाजिक सञ्जालमार्फत थुप्रै मानिस खनिएका थिए । १४ पुसमा सेन्टर फर मिडिया रिसर्च र माइसंसारले भाइरल भएको उक्त अभिव्यक्तिको तथ्य जाँच गरी नेता रावलले उक्त भाषणमा त्यस्तो नबोलेको र हचुवाको भरमा केही भिजिटर बढाउनका लागि भन्दै नभनेको कुरा थपेर भाइरल बनाएको तथ्य उधिनेको थियो । लगत्तै रावलले पनि सामाजिक सञ्जालमार्फत नै आफूले बोल्दै नबोलेको कुरामा अफवाह फैलाइएको भन्दै स्पष्टीकरण पनि दिए ।

राष्ट्रिय सभामा पौडेलले झूटो खबरमाथि विश्वास गरेर बोल्नुका अघि नै १९ पुसमा प्रधानमन्त्री ओलीले यही झूटमाथि टेकेर लाञ्छना लगाएका थिए । जबकी प्रधानमन्त्रीले त्यस्तो आरोप लगाउनुअघि नै फेक न्युज फैलिएको तथ्यसहित पुष्टि भइसकेको थियो । तर ओलीले त्यसलाई नजरअन्दाज गर्दै सोही विषयलाई सत्य झै मानेर भाषण दिए । विरोधीप्रति निर्मम रुपमा प्रस्तुत हुन रुचाउने ओलीले कार्यक्रममा नेता रावलको नाम त लिएनन् तर फेक न्युजमाथि नै टेकेर भने, ‘एउटा नेताले चर्को भाषण गरेछ । केपी ओलीमा महिलाको किड्नी लगाएर दिमाग नै बिग्रियो भनेर ।’ फेक न्युजलाई विश्वास गरेका ओली यतिमै अडिएनन् । उनले थपे, ‘महिलामाथि कत्रो अपमान हो । महिलाको त किड्नीमात्र लगायो भने पनि मान्छे पागल हुन्छ अरे ।’

गलत तथ्यमाथि विश्वास गर्दै ओलीले भाषण गरेको यो पहिलो पटक भने थिएन । आफूले बोल्ने तथ्य तथ्यांकको स्रोत र आधिकारिकतामाथि उतिसारो सचेत नहुने तर आफ्नो तर्क बलियो पार्न अनेकन गलत तथ्यांकको पछि सहारा लिने प्रधानमन्त्री ओलीको पुरानै बानी हो । असार ४ मा राष्ट्रिय सभामा बोल्दै प्रधानमन्त्री ओलीले सामाजिक सन्जालमा भाइरल भइरहेको एउटा गलत तथ्यमाथि टेकेर बोलेका थिए ।

इटालीमा कोरोना संक्रमितको ग्राफ ह्वात्तै बढिरहेका बेला सामाजिक सञ्जालमा केही वाक्य लेखिएको एउटा तस्बिर भाइरल भइरहेको थियो । इटालीका प्रधानमन्त्री गिउसेप्पे कोन्ट रोइरहेको भन्दै भाइरल बनाइएको उक्त तस्बिरमा हाम्रो नियन्त्रण गुम्यो, संक्रामक रोगले हामीलाई मारिरहेको छ, सम्भवतः सबै प्रयासहरु सकिए, अब आकाशतिर हेर्नुको विकल्प छैन लेखिएको थियो । जबकी अन्तर्राष्ट्रिय तथ्य जाँचकीहरुले उक्त फोटो इटालीका प्रधानमन्त्रीको पनि नभएको र उनले त्यस्तो कहिल्यै नभनेको भनेर उक्त खबर फेक भइसकेको लेखिसकेका थिए । तर प्रधानमन्त्री ओलीले भने सोही फेक खबरमाथि विश्वास गर्दै राष्ट्रिय सभामा भनेका थिए, ‘अब भगवानको भरोसा छ, हामीबाट केही पनि हुन सक्दैन भनेर विभिन्न देशका कार्यकारी प्रमुखले भनेको र लाचारी प्रकट गरेको हामीले देखेका छौं ।’ उनले कार्की ब्याङक्वेटमा जस्तै उक्त भाषणमा पनि इटालीको नाम त लिएनन्, तर प्रधानमन्त्रीको भाषणाको सारमा सामाजिक सञ्जालमार्फत फैलिएको फेक सूचनाको प्रभाव प्रष्ट देखिन्थ्यो ।

सार्वजनिक पद धारण गरेका व्यक्तिका भनाइ र दाबी कति सही छन् भनेर तथ्य जाँच गर्ने अनलाइन पोर्टल साउथ एसिया चेकका सम्पादक दीपक अधिकारी प्रधानमन्त्रीकै तहबाट झूटो स्थापित भइसकेको तथ्यमाथि टेकेर बोल्ने अभ्यासलाई आफ्नो एजेन्डा स्थापित गर्न फेक न्युजलाई हतियार बनाउने शैलीका रुपमा टिप्पणी गर्छन् । उनले भने, ‘सत्य असत्यको ख्याल नगरी आफ्नो अघि जम्मा भएका मान्छेले जे मन पराउँछन् त्यही बोल्ने र वाहवाही बटुल्ने शैली प्रधानमन्त्रीले अँगालेको देखिन्छ । त्यही शैलीबाट उनका नेताहरु पनि धेरथोर प्रभावित छन् ।’ उनले भीडले जे मन पराउँछन् त्यही बोल्ने शैलीले सधैं टिकिराख्‍न नसकिने बताउँदै भने, ‘झूटा कुराहरुको जाँच पडताल हुन समय लाग्न सक्छ । तर त्यही सत्य त एकदिन स्थापित हुन्छ नै । केही मान्छेलाई केही समय ढाँट्न सके पनि सबैलाई सधैं ढाँट्न सकिँदैन ।’

प्रकाशित : माघ ८, २०७७ १८:५१
प्रतिक्रिया
पठाउनुहोस्

ओलीले चुनाव हुन्छ भनेर भ्रम छर्दैछन् : माधव नेपाल

चाँदनी कठायत

वीरेन्द्रनगर — नेकपा (दाहाल–नेपाल समूह) का अध्यक्ष माधवकुमार नेपालले प्रधानमन्त्री केपी शर्मा ओलीले चुनाव हुन्छ भन्ने भ्रम फैलाइरहेको बताएका छन् । उनले प्रतिनिधिसभा विघटन गर्ने अधिकार नै नभएका प्रधानमन्त्रीले प्रतिगमनकारी कदम चालेर अहिले वैशाखमा चुनाव हुन्छ भनेर भ्रम फैलाइरहेको दाबी गरे ।

बिहीबार सुर्खेतमा आयोजित विरोध सभालाई सम्बोधन गर्दै नेपालले सर्वोच्च अदालतले संविधानसम्मत् व्याख्या गरी प्रतिनिधिसभा पुन:स्थापना गर्ने बताए । ‘आफ्नो निजी बदलाको भावना राखी ओलीले यस्तो कदम चाले,’ उनले भने, ‘ओलीको यो कदमविरुद्ध अदालतले पनि सही निर्णय गर्नेमा हामी विश्वस्त छौं ।’

पुष्पकमल दाहाललाई इमान्दार नेता बताएका नेपालले ओलीलाई कुलंगार नेताको संज्ञा दिए । उनले पार्टीका निम्ति कलंकित भएको भन्दै ओलीलाई साधारण सदस्य समेत नरहने गरी पार्टीबाट निष्कासन गर्ने दाबी गरे । ‘तीनदिन अघि चिठी पठाएर स्पष्टीकरण माग्यौं, तर ओलीले जवाफ दिने आँट गरेनन्,’ उनले भने, ‘पार्टीभन्दा माथि रहेर काम गरेका कारण आजै चिठी लेखेर नेकपाको साधारण सदस्यसमेत नरहने गरी ओलीलाई निष्कासन गर्दैछौं, संसद्ले पनि दण्डित गर्ला तर त्यो भन्दा अगाडि पार्टीले ओलीलाई दण्डित गर्छ ।’ उनले आफैले प्रधानमन्त्रीमा प्रस्ताव गरिएका व्यक्ति तानाशाह निस्किएको बताए । आफूहरुको पक्षमा बहुमत भएको भन्दै उनले बहुमत नमान्ने व्यक्ति लोकतान्त्रिक हुन नसक्ने टिप्पणी पनि गरे ।

नेकपाका स्थायी समिति सदस्य तथा कर्णाली प्रदेश इन्चार्ज जनार्दन शर्माले ओली पुँजीवाद र दलालहरुको पक्षमा गएको बताए । उनले आफूहरुले संघीय लोकतन्त्रलाई बचाउन प्रयास गरिरहेको भन्दै ओली निरंकुशतर्फ गइरहेको जनाए । राष्ट्रिय स्वाधिनतालाई नै ओलीले खतरामा पारेको शर्माको आरोप छ । ‘हामी समृद्धिको बाटोतर्फ जाने बेला हो यो तर ओली सीमित ठेकेदारसँग सम्झौता गर्न पुग्नुभयो,’ उनले भने, ‘कृषिमा विदेशी लगानी लगाउनेजस्ता राष्ट्रघाती कदमसमेत उहाँले चाल्नुभयो ।’

विरोधसभामा बोल्दै नेकपा स्थायी समिति सदस्य शक्तिबहादुर बस्नेतले संविधानको मूल्य र मान्यतालाई कमजोर बनाउन दुष्प्रयास ओलीले गरेको बताए । ओलीले पार्टीको गरिमा र औचित्यलाई सम्मान गर्न नसक्दा अहिले कम्युनिष्ट पार्टी विभाजित भएको उनको भनाइ छ ।

प्रकाशित : माघ ८, २०७७ १८:४२
पूरा पढ्नुहोस्
प्रतिक्रिया
पठाउनुहोस्
×