काठमाडौंमा कोरोनाको जोखिम उस्तै- समाचार - कान्तिपुर समाचार
कान्तिपुर वेबसाईट
AdvertisementAdvertisement

काठमाडौंमा कोरोनाको जोखिम उस्तै

कान्तिपुर संवाददाता

काठमाडौँ — कोभिड–१९ को सबैभन्दा बढी प्रभाव काठमाडौंमा रहेकाले जनस्वास्थ्यको मापदण्ड निरन्तर पालना गर्नु आवश्यक देखिएको छ । हाल जनस्तरमा देखिएको व्यापक उदासीनताका कारण काठमाडौंमा कोभिडको दोस्रो लहरको जोखिम कायमै छ ।

बिहीबार देशभरि देखिएका कुल संक्रमितमध्ये करिब आधा जति (४८.०५ प्रतिशत) काठमाडौं जिल्लाका छन् । ५ हजार १ सय ३२ पीसीआर परीक्षण गर्दा ४ सय १२ जना संक्रमित देखिएकामा काठमाडौंका मात्र १ सय ९८ जना छन् । देशभरिमा हालसम्म कोभिडले भएको कुल (१९०३ जना) मृत्युको एक चौथाइ काठमाडौंको हो ।

‘अझै काठमाडौं कोभिडको हटस्पट छ’, वरिष्ठ जनस्वास्थ्यविद् डा.राजेन्द्र बीसीले भने, ‘देशभरि देखिएका संक्रमितमध्ये करिब एकतिहाइभन्दा बढी र मृत्युको एक चौथाइजति भार काठमाडौं जिल्लाले लिएको छ ।’ सेप्टेम्बरसम्म मोटामोटी रूपमा देशभरि देखिएको कुल संक्रमितको एक चौथाइसम्म काठमाडौं जिल्लामा थियो । अक्टोबर मध्यबाट कुल कोभिड संक्रमितको एक तिहाइभन्दा बढी काठमाडौंमा देखिएको छ ।

बेलायतमा कोभिडको लहर पुनः फैलिएको औंल्याउँदै डा.बीसीले भने, ‘हामीकहाँ त्यहाँको नयाँ भाइरस छिरेको हुन सक्ने भए पनि त्यसलाई प्रयोगशालामार्फत किटान गर्न बाँकी रहेको अवस्था छ ।’ कोभिडविरुद्धको खोप दिइरहेको बेलायतले पुनः लकडाउन गर्नुपरेको तथ्य नेपालीले बिर्सन नहुने इपिडिमियोलोजी तथा रोग नियन्त्रण महाशाखाका पूर्वनिर्देशक डा.जीडी ठाकुरले बताए । ‘सरकारले छिट्टै खोपको उपलब्धता सुनिश्चित गर्नुपर्छ भने आमव्यक्तिले मास्कको उपयोग, सामाजिक दूरी र निरन्तर हातको सफाइजस्ता मापदण्डलाई राम्ररी पालना गर्नुपर्छ,’ उनले भने ।

मुलुकका अन्य ठाउँको दाँजोमा काठमाडौंमा हालसम्म कोभिड संक्रमणको चेन नतोडिएको उनले बताए । ‘कोभिड संक्रमणको कडी तोड्नै पर्छ, हाल आशाका रूपमा देखिएको खोपसमेत संक्रमणको कडी तोड्ने एउटा औजार हो,’ उनले भने ।

मुलुकभर होम आइसोलेसनमा बसेका कोरोना संक्रमितमध्ये झन्डै ६६ प्रतिशतलाई कुनै पनि लक्षण नदेखिएको पाइएको छ । स्वास्थ्य मन्त्रालय र नेपाल स्वास्थ्य अनुसन्धान परिषद्ले अध्ययन गरी बिहीबार सार्वजनिक प्रतिवेदनअनुसार होम आइसोलेसनमा बसेका ६५.९ प्रतिशत संक्रमितलाई लक्षण नदेखिकनै निको भएको हो ।

कोरोनाको लक्षण देखा परेकामध्ये धेरैलाई उच्च ज्वरो आउने, खोकी लाग्ने, चिसो र कमजोर अनुभव हुने, स्वादको कमी, गन्ध गुमाउने, मांसपेशी, टाउको, घाँटी, जोर्नी र छाती दुख्ने, श्वास फेर्न गाह्रो हुने र वाक्वाकी लागेको प्रतिवेदनमा उल्लेख छ । अध्ययनमा सामेलमध्ये १२.५ प्रतिशत सहभागीले सामाजिक दूरी कायम नगरेको बताएका छन् ।

यस्तै, ५२.५ प्रतिशत सहभागीले परिवारसँग पूर्णरूपले र ३५ प्रतिशतले कहिलेकाहीं मात्रै सामाजिक दूरी पालना गरेको पाइएको छ । कोरोना संक्रमणविरुद्ध उपचार गरिरहेका ५९.०३ प्रतिशत सहभागीले घरेलु उपचार, ५.३ प्रतिशतले आयुर्वेदिक र २९.६ प्रतिशतले एलोपेथिक औषधि तथा उपचार सेवा लिएको पाइएको प्रतिवेदनमा जनाइएको छ ।

प्रकाशित : पुस २४, २०७७ ०८:५०
प्रतिक्रिया
पठाउनुहोस्

अस्ट्रेलियामा अर्को महिनादेखि खोप अभियान

एक महिनामा ४० लाखलाई पहिलो डोज दिइने
नारायण खड्का

अस्ट्रेलिया — अस्ट्रेलियाले कोरोना भाइरसविरुद्धको खोप फेब्रुअरीको दोस्रो सातादेखि सुरु गर्ने तयारी गरेको छ । अस्ट्रेलियाली प्रधानमन्त्री स्कट मरिसनले मार्चदेखि मात्र सुरु गर्ने भनिएको भ्याक्सिन कार्यक्रम एक महिनाअघि नै सुरु हुन सक्ने बताएका हुन् । खोप दिनका लागि सरकारले विभिन्न ५ तहको कार्यक्रमसमेत सार्वजनिक गरेको छ ।


अस्ट्रेलियाले कोरोना भाइरसविरुद्धको खोप कार्यक्रमलाई मार्चदेखि मात्र सुरु गरिने जनाएको थियो । तर प्रधानमन्त्री मरिसनले बिहीबार पत्रकार सम्मेलन गर्दै अस्ट्रेलियाको औषधि विभाग (थेराप्युटिक गुड्स एडमिनिस्ट्रेसन, टीजीए) ले उपलब्ध धेरै खोपको परीक्षण गरिरहेको र स्वीकृत हुनेबित्तिकै खोप कार्यक्रम सुरु हुने जनाएका हुन् । प्रधानमन्त्री मरिसनले टीजीएमार्फत खोपलाई स्वीकृति प्रदान गर्ने तथा स्वीकृत भएका खोपलाई अस्ट्रेलियासम्म ढुवानी गर्ने कार्यमा तीव्रता दिइएको भए पनि खोप सुरु हुने यकिन मिति भने भनेनन् । तर उनले उच्च प्राथमिकतामा रहेका स्वास्थ्यकर्मी लगायतलाई खोप दिने कार्य अर्को महिनाको दोस्रो वा तेस्रो सातासम्ममा सुरु हुने बताए ।

अस्ट्रेलियाले मार्चको अन्त्यसम्ममा ४० लाख अस्ट्रेलियाली नागरिकलाई खोप दिइसक्ने लक्ष्य राखेको छ । प्रधानमन्त्री मरिसनले हरेक साता ८० हजार लाई खोप दिने र त्यसलाई बढाउँदै लैजाने उद्देश्यका साथ कार्यक्रम अघि बढाइएको समेत जानकारी दिए । फाइजर खोपले यही महिनाको अन्त्यसम्ममा पहिलो स्वीकृति पाउने सञ्चारमाध्यमले उल्लेख गरेका छन् । अस्ट्रेलियाले १० लाख फाइजर खोप खरिद गर्ने निर्णय गरिसकेको छ । प्रधानमन्त्री मरिसनले अस्ट्रेलियाले खोप उपलब्ध गराउने सम्पूर्ण कार्य अपेक्षाभन्दा तीव्र गतिमा गइरहेको भए पनि खोपसम्बन्धी सबै कार्यहरू पूरा गर्न सावधानीका साथ काम गरिरहेको बताए । टीजीएले स्वीकृति दिएपछि थप दुई साता ढुवानीका लागि समय लाग्ने बताइएको छ ।

प्रधानमन्त्रीले विभिन्न पाँच तहको खोप कार्यक्रम सार्वजनिक गरेका छन् । जसअनुसार पहिलो चरणमा अग्रपंक्तिमा काम गर्ने स्वास्थ्यकर्मी, सिमाना तथा क्वारेन्टाइनमा काम गर्ने कर्मचारी, नर्सिङ होममा रहेका वृद्धवृद्धालाई प्राथमिकताका साथ खोप दिइनेछ भने दोस्रो तहमा ७० वर्षमाथिका वृद्धवृद्धा, अन्य स्वास्थ्यकर्मी, ५५ वर्षमाथिका रैथाने आप्रवासी नागरिक, प्रहरी, सुरक्षा, आकस्मिक सेवालगायतका क्षेत्रमा काम गर्नेलाई खोप दिइने भएको छ ।

दोस्रो तहको कार्यक्रमसम्ममा १ करोड ४८ लाखसम्मलाई खोप दिइसक्ने योजना बनाइएको छ । यसैगरी ५० वर्षमाथिका नागरिक, उच्च जोखिममा रहेका कर्मचारी, १८ वर्षमाथिका रैथाने आप्रवासी नागरिकलाई प्राथमिकतामा राखिएको छ । अर्को चरणमा खोप पाउन बाँकी रहेका अन्य नागरिकलाई भाइरसविरुद्धको खोप दिइनेछ भने अन्त्यमा १८ वर्षभन्दा कम उमेरका बालबालिकालाई स्वास्थ्य अधिकारीको सल्लाह र सुझावअनुसार खोप दिइनेछ ।

स्थानीय समाचारमा जनाइएअनुसार खोप कार्यक्रम सफल बनाउनका लागि अस्ट्रेलियाभरि १ हजार ‘भ्याक्सिन हब’ को निर्माण गरिने भएको छ । खोप लगाइसकेका नागरिकको तथ्यांक विद्युतीय रूपमा राखिनेछ भने फाइजरपछि अक्सफोर्ड युनिभर्सिटी तथा अस्ट्राजेनेकाद्वारा निर्माण गरिएको खोपले स्वीकृति पाउने अपेक्षा गरिएको छ ।

अस्ट्रेलियाले ५ करोड ४० लाख अक्सफोर्ड अस्ट्राजेनेका खोप खरिद गर्ने निर्णय गरेको छ जसमा ५ करोड खोप स्थानीयस्तरमा क्युन्सल्यास्डमा नै उत्पादन गरिने बताइएको छ । अस्ट्रेलियाका प्रधानमन्त्री, स्वास्थ्यमन्त्री, विपक्षी दलका नेता, विपक्षी दलका छाया स्वास्थ्यमन्त्रीले समेत पहिलो चरणमै खोप लगाउने बताइएको छ ।

प्रकाशित : पुस २४, २०७७ ०८:३३
पूरा पढ्नुहोस्
प्रतिक्रिया
पठाउनुहोस्
×