काठमाडौँ — स्वास्थ्य तथा जनसंख्या मन्त्रालयले कोभिड-१९ को संक्रमणको उपचार गरिरहेका अस्पतालहरुलाई अनुदान उपलब्ध गराउने भएको छ । मन्त्रालयले 'कोरोना भाइरसको संक्रमणको उपचार बापत अस्पतालहरुलाई अनुदान उपलब्ध गराउने सम्बन्धी आदेश २०७७' बमोजिम कोभिड-१९का शंकास्पद तथा पोजिटिभ व्यक्तीहरु राखि उपचार गर्ने सबै किसिमका अस्पतालहरुलाई अनुदान उपलब्ध गराउन लागेको हो ।

उपचार बापत अनुदान पाउन दाबी गर्नका लागि दुई दिनभित्र विवरण बुझाउन आग्रह गर्दै मन्त्रालयले सूचना प्रकाशित गरेको छ । 

सूचनामा तोकिएको समयभित्र विवरण उपलब्ध नगराउने अस्पतालहरुको हकमा कुनै कठिनाइ हुन गएमा सम्बन्धित अस्पताल आफैं जिम्मेवार हुनुपर्ने मन्त्रालयका सहप्रवक्ता डा. समिरकुमार अधिकारीले जनाएका छन् ।