मेलम्ची पहिरो : बेपत्ता ८ जनाकै शव भेटियो [अपडेट]- समाचार - कान्तिपुर समाचार

मेलम्ची पहिरो : बेपत्ता ८ जनाकै शव भेटियो [अपडेट]

अनिश तिवारी

काठमाडौँ — मेलम्ची नगरपालिका वडा नम्बर ११ मा पहिरोले निर्माणाधीन कभर्ड हल पुरिँदा बेपत्ता भएका आठै जनाको शव भेटिएको छ । सोमबार बिहान साढे ३ बजेतिर गैह्रीबजारको केही भाग भासिएर कभर्ड हल पुरिँदा बेपत्ता भएका ८ जनाको शव भेटिएको जिल्ला प्रहरी कार्यालय सिन्धुपाल्चोकका प्रवक्ता डीएसपी माधवप्रसाद काफ्लेले जानकारी दिए ।

मृत्यु हुनेहरुमा कभर्ड हल निर्माणमा खटिएका मजदुर रहेको प्रहरीले बताएको छ । मृत्यु हुनेहरुमा एक जना भारतीय नागरिक, दुई जना पर्सा र ५ जना सिमराका भएको डीएसपी काफ्लेले जानकारी दिए ।

मृत्यु हुनेहरुमा ४२ वर्षीय भारतीय नागरिक राजेन्द्र चौरसिया, पर्साको वीरगन्जका ३५ वर्षीय प्रदीप चौरसिया र २१ वर्षीय राजेश चौधरी, बाराको सिमराका २५ वर्षीय विक्रम थिङ, मानबहादुर रुम्बा, २० वर्षीय सिमन घलान, २१ वर्षीय शिवबालक धामी र १७ वर्षीय सोनाम लामा रहेका छन् ।

पहिरोले कभर्ड हलको आधा भाग र मजदुर बस्ने टहरो पूरै पुरेको पनि डीएसपी काफ्लेले जानकारी दिए । पहिरोमा परी घाइते भएका ३५ वर्षीय भारतीय नागरिक बारु साहलाई उद्धार गरी थप उपचारका लागि हेलिकप्टरबाट काठमाडौंको ह्याम्स अस्पताल लगिएको छ ।

प्रकाशित : श्रावण १९, २०७७ १२:०८
प्रतिक्रिया
पठाउनुहोस्

धरानमा संस्थानकै नेतृत्वमा बोर्डले बनाएको पाइपलाइन तोडफोड

प्रदीप मेन्याङ्बो

सुनसरी — नेपाल खानेपानी संस्थानका शाखा प्रमुखकै अगुवाइमा धरानस्थित सर्दुखोला मुहानको पाइपलाइन तोडफोड गरिएको छ । संस्थानको धरान शाखाका प्रमुख रामकुमार श्रेष्ठ र स्थानीय हर्क साम्पाङ राईको टोलीले धरान खानेपानी व्यवस्थापन बोर्डले निर्माण गरेको पाइपलाइन फुटाइदिएको हो ।

मन्त्रिपरिषद्को डेढ वर्षअघिको निर्णयबमोजिम संस्थानको सम्पत्ति, दायित्व र जिम्मेवारी बोर्डमा हस्तान्तरण गर्ने विषयमा संस्थान र बोर्डबीच विवाद हुँदै आएको छ । बोर्डका व्यवस्थापक इन्जिनियर राजु पोखरेलका अनुसार धरान–१३ फुस्रे सिस्टममा आउने सर्दु र खर्दुको मुहानमा बिछ्याइएको पाइपलाइन संस्थानकै प्रमुखको नेतृत्वमा गएको टोलीले भत्काएको हो । उनका अनुसार मुहानका विभिन्न ठाउँमा मुख्य पाइलाइन र पानी शुद्धीकरण गर्ने ट्यांकीमा जाने अन्य पाइपललाइन पूर्णरूपमा क्षतिग्रस्त भएका छन् ।

‘क्षतिको विवरण प्रहरीले संकलन गर्दै छ । खानेपानीजस्तो संवेदनशील विषयसँग जोडिएको सार्वजनिक सम्पत्ति तोडफोड गर्नेलाई के भनेर हामी छलफल गर्दै छौं,’ पोखरेलले भने । मुहानमा उक्त पाइपलाइन दुई दिनअघि मात्र विस्तार गरिएको उनले जानकारी दिए ।

यसैबीच धरान उपमहानगरप्रमुख तिलक राईले खानेपानी मुहानमा भएको तोडफोडबारे बुझ्ने क्रम जारी रहेको बताए । ‘धरान खानेपानी आयोजना प्रमुख पोखरेललाई अध्ययन गर्न जिम्मा दिएकाले त्यहाँबाट रिपोर्ट आएपछि कारबाही प्रक्रिया अगाडि बढाउनेछौं,’ उनले भने ।

धरान–१७ का वडाध्यक्ष मनोज भट्टराईले पाइपलाइन तोडफोड गर्नेबाटै खर्च भरपाई गरेर जस्ताको तस्तै बनाउन लगाउनुपर्ने बताए । संस्थान र बोर्डबीच विवाद भए पनि मुहानमा पाइपलाइन र पानी शुद्धीकरण गर्ने ट्यांकी बनाउन एक वर्षअघि संस्थानले नै अनुमति दिएको थियो ।

प्रकाशित : श्रावण १९, २०७७ १२:०३
पूरा पढ्नुहोस्
प्रतिक्रिया
पठाउनुहोस्
×