समुदायमा संक्रमण फैलिएको निष्कर्षसहित गोरखाको भिमसेन थापा गाउँपालिकाको तीन गाउँ सिल

हरिराम उप्रेती

गोरखा — समुदायस्तरमा कोरोना संक्रमण फैलिएको निकर्षसहित भिमसेन थापा गाउपालिकाको तीन गाउँ सिल गरिएको छ । भिमसेन थापा गाउँपालिका–५ को रिठ्ठेपानी, वडा नम्बर ८ को महादेवटार, वडा नम्बर ६ को झिंगटे र मोहरिया पूर्ण रुपमा सिल गरिएको गाउँपालिकाले जनाएको छ । ती गाउँमा पाँचजनामा कोरोना संक्रमण पुष्टि भएपछि कन्ट्याक्ट ट्रेसिङ भइरहेको छ ।

सुरक्षा समितिको शुक्रबार बसेको बैठकले सिल भएका गाउँमा थप सुरक्षाकर्मी खटाइ लकडाउन प्रभावकारी बनाउने निर्णय समेत गरेको छ । कोरोना संक्रमणको जोखिम उच्च रहेको र कोरोनाभाइरस समुदायस्तरमा फैलिएको निष्कर्ष निकाल्दै उच्च सतर्कता अपनाएको गाउँपालिका अध्यक्ष इश्वर पाण्डेले बताए ।

कोरोना संक्रमण हुनसक्ने सम्भावित स्थानहरुमा एकसाताका लागी मानिसहरुको आवातजावात पूर्ण रुपमा बन्देज लगाइएको गाउँपालिका अध्यक्षले बताए । ‘पालिका भित्रका एक वडाबाट अर्को वडामा अत्यावश्यक अवस्था बाहेक आउजाउमा रोक लगाएका छौँ,’ उनले भने । एक साताका लागी गाउँपालिका भित्रका स्वास्थ्य सेवा बाहेक सम्पूर्ण सरकारी कार्यालयबाट प्रवाह हुने सेवा पनि बन्द गरिएको उनले बताए ।

बैंक तथा वित्तिय संस्था उद्योग व्यवसाय र पसल बन्द गर्ने र खाद्यान्न तरकारी फलफुल दुग्ध जन्य पदार्थ विक्रि गर्ने पसल बिहान ६ देखि १० बजेसम्म मात्र संचालन गर्ने गरी समयसिमा तोकिएको छ ।

समाजमा जुवातास खेल्ने हुलहुज्जत तथा समुह बनाइ हिँड्‌डुल गर्ने कार्यलाई पूर्ण रुपमा निषेध गरिएको गाउँपालिकाले जनाएको छ ।

उत्त गाउँपालिकामा कोरोना संक्रमितको संख्या २६ पुगेको छ । ती मध्ये चारजना संक्रमित निको भएर घर फर्किएका छन् । ‘समुदायस्तरका पाँचजनामा कोरोना संक्रमण पुष्टि भएपछि कन्ट्याक्ट ट्रेसिङको काम पनि भइरहेको छ,’ गाउँपालिकाका स्वास्थ्य शाखा प्रमुख भेषराज खनालले भने ।

प्रकाशित : असार १२, २०७७ १७:०६
प्रतिक्रिया
पठाउनुहोस्

कोरोनाबाट थप एकको मृत्यु, मृत्यु हुनेको संख्या २७ पुग्यो 

कान्तिपुर संवाददाता

काठमाडौँ — कोरोना संक्रमणबाट थप एकको मृत्यु भएको छ । स्वास्थ्य तथा जनसंख्या मन्त्रालयले मृत्युको पुष्टि गरेको हो । शुक्रबार मन्त्रालयले आयोजना गरेको नियमित मिडिया ब्रिफिङमा प्रवक्ता डा जागेश्वर गौतमले मृत्यु हुनेमा अन्दाजी २५ देखि ३० वर्षीया महिला रहेकी छिन् ।

ती महिलाको बेवारिसे शव दाङको राप्ती स्वास्थ्य विज्ञान प्रतिष्ठानमा असार ११ गते भेटिएको थियो । उनको स्वाब परीक्षण गर्दा कोरोना पोजिटिभ पाइएको थियो । मन्त्रालयका अनुसार उनको ठेगाना खुलेको छैन ।

योसँगै नेपालमा कोरोनाबाट मृत्यु हुनेको संख्या २७ पुगेको छ ।

हालसम्म कोरोना संक्रमणले सिन्धुपाल्चोकका १, बाँकेका २, गुल्मीका ३, बाराका १, ललितपुरका २, अर्घाखाँचीका २, दैलेखका २, बाजुराका १, दोलखाका १, पाल्पाका १, सुर्खेतका १, कैलालीका ३, डोल्पाका १, स्याङ्जाका २, चितवनका १, पर्साका १ गरी २७ जनाको मृत्यु भएको छ ।

प्रकाशित : असार १२, २०७७ १६:४६
पूरा पढ्नुहोस्
प्रतिक्रिया
पठाउनुहोस्
×