पैदलै घर फर्कन लागेका १४५ भारतीय मजदुर साँगाबाट फिर्ता 

मजदुर भन्छन् : उता बालबच्चा भोकै छन्, बोर्डरसम्म पुर्‍याइदिनुस्
लीला श्रेष्ठ

भक्तपुर — पैदलै घर फर्किन लागेका २ इँटा भट्टाका १ सय ४५ भारतीय मजदुरलाई प्रहरीले इँटाभट्टामै फिर्ता गरेको छ । चाँगुनारायण नगरपालिका–३ झौखेलमा सञ्चालित कुमारी र चाँगुनारायण इँटाभट्टामा कार्यरत भारतीय मजदुरलाई काभ्रे र भक्तपुरको सिमाना साँगाबाट फर्काइएको हो ।

शुक्रबार राति हिँडेर साँगा हुँदै सिन्धुलीको बाटो पैदल जान तयार भारतीय मजदुरलाई प्रहरीले च्याम्हासिंहबाट फिर्ता गरे पनि भित्री पैदल मार्ग हुँदै उनीहरु साँगासम्म पुगेका थिए ।

महानगरीय प्रहरी परिसर भक्तपुरका प्रहरी निरीक्षक कृष्ण विष्ट र महानगरीय प्रहरी वृत्त जगातीका प्रहरी निरीक्षक झलक शर्माको नेतृत्वमा इँटाभट्टाबाटै ५ वटा ट्रक मगाएर ती मजदुरलाई इँटाभट्टामै फिर्ता गरिएको हो । प्रहरीले कुमारी र चाँगुनारायण इँटाभट्टा सञ्चालकलाई आवश्यक सोधबुझका लागि भन्दै नियन्त्रणमा लिएको छ ।

विश्वव्यापी महामारीको रुपमा फैलिएको कोरोना भाइरस (कोभिड–१९) संक्रमण नियन्त्रणका लागि सरकारले लकडाउनलाई थप कडाई गर्दै जाँदा इँटाभट्टाको काम ठप्प छ । काम रोकिएपछि इँटाभट्टाका मजदुर कामविहीन बनेका छन् । स्वदेशी मजदुर महिना दिनअघि नै गन्तव्यमा पुगिसकेका छन् भने भारतीय मजदुरहरु मात्र इँटाभट्टामा अल्झिएका छन् ।

महानगरीय प्रहरी परिसर भक्तपुर प्रमुख एसपी सबिन प्रधानका अनुसार जिल्लाको ६३ इँटाभट्टामा कार्यरत २ हजार ९ सय ४० भारतीय मजदुर छन् । विशेषगरी इँटा पोल्ने काममा कार्यरत उनीहरु कामविहीन भएपछि घर जान आँतुर छन् । ‘उता बालबच्चा भोकै छन्, हामी यत्ता भोकै छौं,’ भारत बिहारका एक मजदुरले भने, ‘हामीलाई भारतको बोर्डरसम्म पु¥याइदिनुस् ।’ मजदुरलाई धान्न गाह्रो भएपछि इँटाभट्टा सञ्चालकले प्रतिव्यक्ति १ हजार रुपैयाँ बाटो खर्च दिएर पठाएको भारतीय मजदुरले बताएका छन् ।

इँटाभट्टा व्यवसायी संघ भक्तपुरका अध्यक्ष नातीभाइ हेम्बाका अनुसार लकडाउन सुरु भएयता इँटाभट्टाले प्रतिव्यक्ति मासिक २५ सय रुपैयाँ रासन खर्च उपलब्ध गराउँदै आएको छ । ग्यास, बत्ती, पानी निःशुल्क वितरण गर्दै आएको समेत जनाएको छ । ‘काम छैन, समूह–समूह मिलेर झै–झगडा गर्छन्, हामीलाई भारतीय मजदुर धान्न निकै गाह्रो भइसक्यो,’ अध्यक्ष हेम्बाले भने, ‘कूटनीतिक पहलमा उनीहरुलाई आफ्नो घर फिर्ता गर्नु जरुरी छ ।’ प्रशासनको अनुमति पाए इँटाभट्टा व्यवसायीले आफ्नै गाडीमा भारतीय मजदुरलाई बोर्डरसम्म पुर्‍याउन तयार रहेको उनले बताए ।

प्रकाशित : जेष्ठ ९, २०७७ १२:४२
ADVERTISEMENT
प्रतिक्रिया
पठाउनुहोस्
ADVERTISEMENT

दार्चुलाको घाँटीबगरमा गोरेटो बाटो निर्माण गर्न पुग्यो नेपाली सेना 

असारसम्ममा निर्माण कार्य सम्पन्न गर्ने लक्ष्य छ : सैनिक प्रवक्ता पाण्डे 
असारपछि लिपुलेक र तिंकर जान भारतीय भूमि प्रयोग गर्नु नपर्ने
कान्तिपुर संवाददाता

काठमाडौँ — महाकाली करिडोर (दार्चुला–तिंकर सड्क योजना) सडकखण्डअन्तर्गत पर्ने दार्चुला जिल्लाको व्यास गाउँपालिका वडा नम्बर–२ स्थित घाँटीबगर इलाकामा नेपाली सेनाको टोली खटिएको छ ।

सैनिक प्रवक्ता विज्ञानदेव पाण्डेका अनुसार उक्त क्षेत्रमा बाटो निर्माणको लागि शुक्रबारै काठमाडौबाट प्राविधिक तथा इन्जिनियरको टोली दार्चुलाको सदरमुकाम खलंगा गएको थियो । त्यसबाट बिहीबार एक प्लाटुन (करिब ४५ जना) को सैनिक टोली घाँटीबगर पुगेको हो ।

घाँटीबगर इलाकामा करिब दुई मिटर चौडाइको ४५० मिटर गोरेटो बाटो निर्माण कार्यको लागि आवश्यक सुरक्षा तथा बन्दोबस्तीको निमित्त सेनाको एक सेक्सन प्लस फौज तैनाथ भएको सेनाले जनाएको छ । साथै बाटो निर्माण कार्यका लागि दक्ष प्रावधिक जनशक्ति र थप सुरक्षा तथा बन्दोबस्तीको निमित्त आवश्यक नफ्रिको फौज, उपकरण एवं अन्य सामग्रीहरु सहितको टोली शुक्रबारबाट खटिएको छ ।

नेपाल सरकारको मन्त्रिपरिषदको वैशाख १४ को निर्णयअनुसार महाकाली करिडोर (दार्चुला–तिंकर सड्क योजना) अन्तर्गत उत्तरतर्फ रहेको ८७ किलोमिटर सडकखण्ड नेपाली सेनामार्फत् निर्माण गराउने निर्णय भएको छ ।

चीन र भारतको सीमा नाकासमेत पर्ने दार्चुला जिल्लाको व्यास गाउँपालिका वडा नम्बर–१ मा पर्ने छाङरु र तिंकर गाउँका करिब १८२ घर परिवारको करिब एक हजार २ सय जना स्थानीयलाई जिल्ला सदरमुकाम खलङ्गा आवतजावत गर्नका लागि सोही गाउँपालिकाको वडा नम्बर–२ मा पर्ने मौरीभिरमा ठूलो चट्टान र घाँटीबगर भन्ने स्थानमा पहिरोसमेत गएकोले आवतजावत गर्न समस्या भएको छ । उक्त समस्याको कारणले हालसम्म स्थानीय बासिन्दाले नेपालको माथिल्लो भागबाट तल्ला भागमा आउन र तल्लो भागबाट माथिल्ला भागमा जानु पर्दा भारततर्फ रहेको बाटो प्रयोग गर्दै आउने पर्ने बाध्यता छ ।

घाँटीबगर र मौरीभिर इलाकामा पर्ने चार सय ५० मिटर सडक खण्ड अविलम्ब सुचारु गर्न दार्चुला जिल्ला सुरक्षा समितिबाट निर्णय भएबमोजिम सडकखण्ड निर्माणका लागि सेनाको प्रावधिक जनशक्तिसहित फौज घाँटीबगरको थी इलाकामा तैनाथ गर्ने योजना अनुसार बिहीबार फौजलाई खटाइएको सेनाले जनाएको छ ।

सैनिक प्रवक्ता पाण्डेले उक्त खण्डको बाटो असार मसान्त भित्रमै बनाइसक्ने सेनाको योजना रहेको र त्यसपछि नेपालीहरुले दार्चुलाको सदरमुकामबाट माथिल्लो क्षेत्रमा जानको लागि भारतीय बाटो प्रयोग गर्नु पर्ने बाध्यता नभएको बताए ।

सम्बन्धित समाचार

असारपछि लिपुलेक र तिंकर जान भारतको भूमि प्रयोग गर्नु नपर्ने

प्रकाशित : जेष्ठ ९, २०७७ १२:३९
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×